ރާއްޖޭގެ ކްލައިމެޓް އެކްޝަން ޕްލޭން ވަރުގަދަވާނެ، އަޕްޑޭޓްވާނެ: ރައީސް
އެންޑީސީތައް މިއަހަރުގެ ޑިސެމްބަރު މަހުގެ 31 ވަނަ ދުވަހުގެ ކުރިން ހުށައަޅަންޖެހޭ
ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު- ރައީސް ސޯލިޙު ވިދާޅުވީ ރާއްޖެއިން ސުންގަޑީގެ ކުރިން އެންޑީސީ ހުށައަޅާނެ ކަމަށް
މޫސުމަށް އަންނަ ބަދަލުތަކުން ރައްކާތެރިވުމުގެ ގޮތުން ދިވެހިރާއްޖެއިން އެކުލަވާލާ "ކްލައިމެޓް އެކްޝަން ޕްލޭން" އިތުރަށް ވަރުގަދަ ކުރަމުންދާ ކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު ވިދާޅުވެއްޖެއެވެ.
ޕެރިސް އެގްރީމަންޓުގެ ދަށުން ޤައުމުތަކުން ހުށައަޅަންޖެހޭ ނޭޝަނަލީ ޑިޓަރމައިންޑް ކޮންޓްރިބިއުޝަންސް (އެންޑީސީ) ތައް މިއަހަރުގެ ޑިސެމްބަރު މަހުގެ 31 ވަނަ ދުވަހުގެ ކުރިން ހުށައެޅުމަށް ކްލައިމެޓް ވަލްނަރެބަލް ފޯރަމް (ސީވީއެފް) އިން ވަނީ ގޮވާލައްވާފައެވެ.
އެކަމަށް ތައުރީފު ކުރައްވައި ބުދަ ދުވަހު ރައީސް ސޯލިޙު ކުރެއްވި ޓްވީޓެއްގައި ވިދާޅުވީ، ރާއްޖެއިން ވެސް ސުންގަޑީގެ ކުރިން އެންޑީސީ ހުށައަޅާނެ ކަމަށާއި، ރާއްޖެއިން އެކުލަވާލާނީ ކުރިއަށްވުރެ ވަރުގަދަ އެކްޝަން ޕްލޭނެއް ކަމަށެވެ.
ރައީސް ސޯލިޙު ވިދާޅުވީ، މި އަހަރު ނިމުމުގެ ކުރިން ޕެރިސް އެގްރީމަންޓުގައި ވާގޮތަށް ރާއްޖެއިން އެންޑީސީ ހުށައަޅާނެ ކަމަށެވެ.
ކްލައިމެޓް ވަލްނިރަބަލް ފޯރަމް އަކީ މޫސުމަށް އަންނަ ބަދަލުތަކުގެ ސަބަބުން ނުރައްކަލަށް ހުށައެޅިފައިވާ ތަރައްގީވަމުން އަންނަ ގައުމުތަކުގެ އަޑު އިއްވުމުގެ ގޮތުން ދިވެހިރާއްޖެއިން އުފައްދާފައިވާ ފޯރަމެކެވެ. 2009 ވަނަ އަހަރު އުފެއްދި މި ފޯރަމްގައި 48 ގައުމަކުން ވަނީ ބައިވެރިވެފައެވެ.
މި ފޯރަމްގެ މައިގަނޑު މަޤްޞަދަކީ މޫސުމީ ބަދަލުތަކުގެ ސަބަބުން ކުރާ ނޭދެވޭ އަސަރުތަކާ ގުޅޭގޮތުން ޤައުމުތައް އަހުލުވެރިކޮށް، ތިމާވެށްޓާ ރަޙްމަތްތެރި ސިޔާސަތުތަކެއް ތަންފީޒުކޮށް މެންބަރު ޤައުމުތަކުން ބޭނުން ކުރާ ހަކަތަ އަކީ 100 އިންސައްތަ އިޔާދަކުރަނިވި ހަކަތަ އަށް ބަދަލު ކުރުމަށް މަސައްކަތް ކުރުމެވެ.
