2019 އަހަރަކީ މިހާތަނަށް މިފްކޯގެ ހަޔާތުގައި އެންމެ ގިނައިން މަސް ގަތް އަހަރު!

މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ)ގެ ހަޔާތުގައި މިހާތަނަށް އެންމެ ގިނައިން މަސްގަތް އަހަރަކީ 2019 އަހަރު ކަމަށް އެކުންފުނިން ހާމަކޮށްފި އެވެ.

އެކުންފުނީގެ އަހަރީ އާންމު ޖަލްސާ އަންގާރަ ދުވަހު ބާއްވާފައިވާއިރު، 2019 އަހަރުގެ އަހަރީ ރިޕޯޓް އާންމުކޮށްފައިވެ އެވެ. އަދި 2018 ވަނަ އަހަރުގެ އަހަރީ ރިޕޯޓާއި ޔައުމިއްޔާ ވަނީ ފާސްކޮށްފަ އެވެ.

Advertisement

މިފްކޯގެ އަހަރީ ރިޕޯޓުން ދައްކާގޮތުން މިހާތަނަށް އެކުންފުނީގެ ހަޔާތުގައިވެސް އެންމެ ގިނައިން މަސް ގަނެފައިވަނީ 2019 އަހަރު ކަމަށާއި އެގޮތުން ސާޅީސް އަށްހާސް ފަސް ސަތޭކަ އަށްވުރެން ގިނަ މެޓްރިކްޓަނުގެ މަސް ވަނީ ކުންފުންޏަށް ގަނެފަ އެވެ.

ތަފާސް ހިސާބު ދައްކާ ގޮތުން އެންމެ ގިނައިން މަސް ގަނެފައިވަނީ ދެކުނުން ކަމަށާއި އުތުރުންނެވެ.

އަދި ފާއިތުވި 2019 ވަނަ އަހަރަކީ މިފްކޯ އިން އެންމެ ގިނަ އަދަދަކަށް ރާއްޖޭގެ މަސްވެރިންނަށް ފައިސާ ދޫކުރި އަހަރު ކަމަށްވެސް ރިޕޯޓްގައިވަނީ ފާހަގަކޮށްފައެވެ.

އެގޮތުން 901 މިލިއަން ރުފިޔާ މަސްވެރިންނަށް ދޫކޮށްފައިވާ ކަމަށާއި މިއީ އެކުންފުންޏަށް ލިބުނު ކާމިޔާބީއެއް ގޮތަށް އޭޖީއެމްގައި ވަނީ ފާހަގަކޮށްފަ އެވެ.

މި ބައްދަލުވުމުގައި ކުންފުނިން މިހާތަނަށް ހޯދާފައިވާ ކާމިޔާބީ ތަކާއި އަދި ކުރިއަށް އޮތް ތަނުގައި ކުުރުމަށް ޕްލޭންކޮށްފައި ހުރި ކަންތައްތައްވެސް ވަނީ ހިއްސާކޮށްފައެވެ.

އެގޮތުން މިފްކޯގެ މިސްރާބް ހުރީ މަސްވެރިން ބާނާ މަސްކިރުވަން އޮންލައިން ޕްލެޓްފޯމަކާއި ދިމާލަށް ގެންދިއުން ކަމަށާއި އެކުންފުނިން މިހާރު ކުރަމުންދާ މަސައްކަތަކީ އެޕްލިކޭޝައެއް ތައްޔާރުގެ މަސައްކަތް ކަން ފާހަގަކުރަމުން، މިއަހަރުގެ ނޮވެމްބަރ މަހުގެ ފަހުކޮޅު މިއެޕްލިކޭޝަން ޓެސްޓް ކުރަން ފައްޓާނެކަން ވަނީ ހާމަކޮށްފައެވެ.

މި އެޕްލިކޭޝަން މެދުވެރިކޮށް މަސްވެރިންނަށް ވަރަށް ބޮޑެތި ލުއި ފަސޭހަތަކެއް ލިބިގެންދާނެއެވެ. އެގޮތުން މިހާރު މަސްކިރުވުމުގައި ދިމާވާ ދަތިތައް ހައްލުވެ، މިއެޕްލިކޭޝަނުން މަސްވެރިންނަށް ވަރަށް ގިނަ މައުލޫމާތުތަކެއް ލިބިގެންދާނެއެވެ.

މަސްބާނައިގެން މަސްކިރުވުމަށް އަންނައިރު އެންމެ ކައިރިން މަސްކިރުވޭނެ ކެޕޭސިޓީ ހުރީ ކޮން ބޯޓެއްގައި ކަމާއި މަސްކިރުވާ ބޯޓް އޮންނަ ލޮކޭޝަންއާއި އަދި ކިޔުގައި ނުޖެހި މަސްކިރުވޭނެ ރަނގަޅު އިންތިޒާމްތަކެއް މި އެޕްލިކޭޝަން މެދުވެރިކޮށް މަސްވެރިންނަށް ލިބިގެންދާނެ އެވެ. އަދި އެޕްލިކޭޝަން މެދުވެރިކޮށް ފެނާއި، ތެޔޮ އަދި މިފްކޯގެ ފިހާތަކުން ކްރެޑިޓް ސްކީމަށް ތަކެތި ބައްލަވައިގަނެވޭނެ ކަމަށާއި މިއީވެސް މަސްވެރިންނަށް ލިބިގެންދާނެ ވަރަށް ބޮޑު ފަސޭހައަކަށް ވެގެންދާނެ އެވެ.

ހަތް އަހަރަށް ފަހު މިފްކޯއިން މަސްވެރިންގެ އަތުން މަސް ގަންނަމުން ދިޔަ އަގުގެ ކޮންޓްރޯލް ވަނީ ދޫކޮށްލާފައެވެ. މިފްކޯއިން އަގު ކޮންޓްރޯލް ކުރުމަށްފަހު މަސް ގަންނަމުން އައިސްފައިވަނީ 20 ރުފިޔާއަށެވެ. ނަމަވެސް މިހާރު ގެނައި ބަދަލާއެކު ދުނިޔޭގެ ބާޒާރުގައި މަހުގެ އަގަށް އަންނަ ކޮންމެ ބަދަލެއް ގެނައުމުގެ ބާރު މިފްކޯއަށް ލިބިގެންދާނެއެވެ.

މިފްކޯއަށް ދިމާވެފައިވާ ސްޓޯރޭޖްގެ މައްސަލަ ހައްލު ކުރުމުގެ މަސައްކަތް ކުރިއަށް އޮތް މަސްދުވަހުގެ ތެރޭގައި ފެށޭނެކަން ވަނީ އޭޖީއެމްގައި ހާމަކޮށްފައެވެ. އެގޮތުން ސްޓޯރޭޖްގެ މައްސަލަ ހައްލު ކުރުމަށް 30 މިލިއަން ޑޮލަރުގެ މަޝްރޫއެއް ކުރިއަށް ގެންދިއުމަށް ވަނީ ތައްޔާރުވެފަ އެވެ.

މިފްކޯގެ ވަސީލަތްތައް ތަރައްޤީ ކުރުމަށް ކުރިއަށްގެންދާ މަޝްރޫއުގެ ދަށުން ސްޓޯރޭޖް އިތުރު ކުރުމުގެ އިތުރުން، ކޫއްޑޫ އާއި ފެލިވަރުގެ ބަނދަރު ތަރައްގީ ކުރެވިގެންދާނެ ކަމަށާއި ކޯލްޑް ސްޓޯރޭޖާއި ކޭނިންގ ކެޕޭސިޓީ ވެސް އިތުރު ކުރެވޭނެ ކަމަށް އެކުންފުނިން ބުންޏެވެ.

މަސްވެރިން ބާނާ މަހަށް ދުވަހުން ދުވަހަށް ފާއިސާ ދެވޭ ކުންފުންޏެއްގެ ގޮތުގައި މިފްކޯ ހެދުމަށް މަސައްކަތްތަކެއް ކުރާއިރު އެންމެ ފުރަތަމަ ވެސް ބޭނުންވަނީ އެކަށީގެންވާ ޕްރޮސެސިން ކެޕޭސިޓީއެއް ކަމަށް އެކުންފުނިން ބުންޏެވެ.

އެގޮތުން މިހާރު ކޫއްޑޫގައި 2000 ޓަނު އަދި ފެލިވަރުގައި 700 ޓަނުގެ ސްޓޯރޭޖެއް ހުރިއިރު ފެލިވަރުގައި ފްރީޒިން ކެޕޭސިޓީއެއް ނެތް ކަމަށާއި އެހެންކަމުން އެންމެ ފުރަތަމަ ފެލިވަރުގައި 200 ޓަނުގެ ފްރީޒިން ކެޕޭސިޓީއެއް ޤާއިމްކޮށް 4000 ޓަނުގެ ކޯލްޑް ސްޓޯރޭޖެއް ޤާއިމް ކުރުމުގެ މަސައްކަތް ވަރަށް އަވަހަށް ފެށޭނެ ކަން ވަނީ އިއުލާންކޮށްފަ އެވެ.

އަދި ކޮވިޑްގެ މިދަނޑިވަޅުގައި އެންމެ ބޮޑު ލުއި ފަސޭހަކަމެއް ލިބިގެން ދިޔައީ މަސްވެރިންނަށް ޚާއްސަކޮށްގެން ދޫކޮށްފައިވާ 'މަސްވެރިޔާ ކާޑު'އެވެ.