އައްޑޫސިޓީ މީދޫއިން ގޯތި ދޫކުރުން: ވަގުތީ ލިސްޓަށް ޝަކުވާ ހުށަހެޅުމުގެ ފުރުސަތު ހުޅުވާލައިފި
6 އޮކްޓޯބަރު 2020 | އަންގާރަ 16:11މިމަހުގެ 25ގެ ކުރިން ޝަކުވާ ހުށަހަޅަން ޖެހޭ
އައްޑޫ ސިޓީ ކައުންސިލް އިދާރާ، ޝަކުވާ ހުށަހަޅަން ބޭނުންވާ ފޯމް ކައުންސިލްގެ ވެބް ސައިޓުން ލިބޭނެ
އައްޑޫސިޓީ މީދޫ އަވަށުން ދިރިއުޅުމަށްޓަކައި ދޫކުރުމަށް ހަމަޖެހިފައިވާ ބަންޑާރަ ގޯއްޗަށް އެދި ހުށަހެޅި ފޯމްތަކަށް ޕޮއިންޓް ދެވުނު ގޮތުގެ ވަގުތީ ލިސްޓު އާންމުކޮށްފިއެވެ.
އައްޑޫސިޓީ ކައުންސިލުން ބުނީ މީދޫ އަވަށުން ދިރިއުޅުމަށް ދޫކުރުމަށް ހަމަޖެހިފައިވާ 50 ބަންޑާރަ ގޯއްޗަށް އެދި ހުށަހެޅި ފޯމްތައް އިވެލުއޭޓްކޮށް ނިމިފައިވާ ކަމަށެވެ. އަދި ޕޮއިންޓް ދެވުނު ގޮތުގެ ވަގުތީ ލިސްޓު އާންމުކޮށްފައިވާ ކަމަށް ކައުންސިލުން ބުނެއެވެ. ކައުންސިލުން ބުނީ ވަގުތީ ލިސްޓު އާންމުކުރުމަށް، 29 ސެޕްޓެންބަރު 2020 ވަނަ ދުވަހު ބޭއްވުނު ކައުންސިލްގެ 2020 ވަނަ އަހަރުގެ 24 ވަނަ ޖަލްސާގައި ނިންމަވާފައިވާތީ، މި ލިސްޓު އާންމުކުރީ ކަމަށެވެ.
މި ލިސްޓަށް ޝަކުވާ ހުށަހަޅަން ބޭނުންވާ ފަރާތެއްވާނަމަ، "ޝަކުވާ ހުށަހަޅާ ފޯމް" ފުރިހަމަ ކުރުމަށްފަހު 25 އޮކްޓޫބަރު 2020 ވާ އާދީއްތަ ދުވަހުގެ 14:00 ގެ ކުރިން މީދޫ އަވަށު އޮފީހަށް ހުށަހެޅުމަށް ކައުންސިލުން ވަނީ އެދިފައެވެ. އަދި meedhoo@adducity.gov.mv މި އީމެއިލް މެދުވެރިކޮށް ވެސް ހުށަހަޅާ ފޯމުތައް ވެސް ބަލައިގަނެވޭނެ ކަމަށް ކައުންސިލުން ބުނެއެވެ.
ކައުންސިލުން ބުނީ ޝަކުވާ ހުށަހަޅާ ފޯމު އެ އިދާރާގެ ވެބްސައިޓުންނާއި ދިވެހި ސަރުކާރުގެ ގެޒެޓުން ޑައުންލޯޑް ކުރެވޭނެ ކަަމަށެވެ. އަދި މީދޫ އަވަށު އޮފީހުން ލިބޭނެ ކަަމަށެވެ.
