ހަތަރު ބިލެއްގެ މަސައްކަތް އަންގާރަ ދުވަހުގެ ޖަލްސާއަށް އެޖެންޑާކޮށްފި
ޓެކްސް ނެގުމާ ބެހޭ އިދާރީ ޤާނޫނަށް އިޞްލާޙު ގެނައުމުގެ ބިލުގެ ފުރަތަމަ ކިޔުން އިއްވުމަށް ވަނީ ހަމަޖެހިފަ
ރައްޔިތުންގެ މަޖިލިސް
ހަތަރު ބިލެއްގެ މަސައްކަތް އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާއަށް އެޖެންޑާކޮށްފިއެވެ.
އަންގާރަ ދުވަހުގެ ޖަލްސާއަށް ސަރުކާރުގެ ފަރާތުން ވަނީ، ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ހުށަހަޅުއްވާފައިވާ، ޓެކްސް ނެގުމާ ބެހޭ އިދާރީ ޤާނޫނަށް އިޞްލާޙު ގެނައުމުގެ ބިލުގެ ފުރަތަމަ ކިޔުން އިއްވުން އެޖެންޑާކޮށްފައެވެ. އަދި ސަރުކާރުގެ ފަރާތުން، ވިލުފުށި ދާއިރާގެ މެންބަރު ޙަސަން ޢަފީފު ހުށަހަޅުއްވާފައިވާ، ބިނާވެށި ޕްލޭންކުރުމާއި ހިންގުމުގެ ބިލުގެ މަސައްކަތްވެސް ވަނީ އެޖެންޑާކޮށްފައެވެ.
ހޯމަ ދުވަހުގެ ޖަލްސާގައި އެޖެންޑާކޮށް، ނުނިމިހުރި މަސައްކަތްތަކުގެ ދަށުން ދެ ބިލެއް ވަނީ އެޖެންޑާކޮށްފައެވެ. އެއީ ސަރުކާރުގެ ފަރާތުން، ފޮނަދޫ ދާއިރާގެ މެންބަރު މޫސާ ސިރާޖު ހުށަހަޅުއްވާފައިވާ، ދިވެހިރާއްޖޭގެ ޤާނޫނުލްޢުޤޫބާތަށް އިޞްލާޙު ގެނައުމުގެ ބިލުގެ ބަހުސް އާއި ސަރުކާރުގެ ފަރާތުން، ފުނަދޫ ދާއިރާގެ މެންބަރު މުޙައްމަދު ޝާހިދު ހުށަހަޅުއްވާފައިވާ އެންޓި-ކޮރަޕްޝަން ކޮމިޝަނުގެ ޤާނޫނަށް އިޞްލާޙު ގެނައުމުގެ ބިލު ގެ ބަހުސްކުރިއަށް ގެންދިއުމެވެ.
މި ދެ ބިލަށް ބަހުސްކޮށް ނިމިއްޖެނަމަ އަންގާރަ ދުވަހުގެ ޖަލްސާގައި މި ބިލުތައް ބަލައިގަތުމަށް ވޯޓަށް އަހާ، ކަމާގުޅޭ ކޮމިޓީއަށް ދިރާސާ ކުރުމަށް ފޮނުވާނެއެވެ.
