ހޮރައިޒަންގެ މައްސަލައަށް ހައްލު ނުލިބޭތީ މެންބަރު ފިރުޝާންގެ ކަންބޮޑުވުން މަޖިލީހުގެ ރައީސަށް
މަސް ފެކްޓްރީ އެޅުމުގެ މަޝްރޫއަށް 14 އަހަރު ވީ އިރުވެސް މަސައްކަތް ނުނިމޭ
ރައްޔިތުން މަޖިލީހުގެ މަޑަވެލި ދާއިރާގެ މެންބަރު ހުސައިން ފިރުޝާން
މަސްފެކްޓްރީ އެއް ހެދުމަށްޓަކައި ހޮރައިޒަން ފިޝަރީޒަށް ގދ. ހޯނޑެއްދޫން ދުކޮށްފައިވާ ބިމުގައި މަސް ފެކްޓްރީ އެޅުމުގެ މަޝްރޫއަށް 14 އަހަރު ވީ އިރުވެސް އެ މަސައްކަތަށް އެއްވެސް ސަރުކާރަކުން އަޅާނުލުމުގެ ސަބަބުން އެކަމުގެ ކަންބޮޑުވުން ހިއްސާ ކުރައްވާ މަޑަވެލި ދާއިރާގެ މެންބަރު ހުސައިން ފިރުޝާން ރައްޔިތުން މަޖިލީހުގެ ރައީސް މުހައްމަދު ނަޝީދަށް ސިޓީއެއް ފޮނުވައިފިއެވެ.
މި މައްސަލަ މެންބަރު ފިރުޝާން ވަނީ މަޖިލީހުގެ ސަމާލުކަމަށް ގެނެސް މިއަހަރުގެ ފެބްރުއަރީ މަހުގެ 10 ވަނަ ދުވަހު ފިޝަރީޒް މިނިސްޓަރ ޒަހާ ވަހީދު މަޖިލީހަށް ހާޒިރުކޮށް ސުވާލު ކޮށްފައެވެ.
ގދ. ހޯނޑެއްދޫއާއި މުޅި ހުވަދު އަތޮޅުގެ ރައްޔިތުންގެ ހުރި ކަންބޮޑުވުން ފާޅުކުރައްވާ މެންބަރު ފިރުޝާން ހޯމަ ދުވަހު މަޖިލީހުގެ ރައީސަށް ފޮނުވި ސިޓީގައި ބުނެފައި ވަނީ ހޮރައިޒަން ފިޝަރީޒަށް ގދ. ހޯނޑެއްދޫން ބިން ދޫކުރެވުނުތާ މިއަހަރުގެ ޑިސެމްބަރު މަހުގެ 8 ވަނަ ދުވަހަށް 15 އަހަރު ފުރޭއިރު، މަސް ފެކްޓްރީ އަދިވެސް ހަދާ ނިމިފައިނުވާތީ ރާއްޖޭގެ އިގްތިސާދަށާއި އެ އަތޮޅުގެ ރައްޔިތުން ކުރާ ސީދާ ފައިދާއެއް ވެސް ނެތް ކަމަށެވެ.
މި ސިޓީގައި މެންބަރު ފިރުޝާން އިތުރަށް ވިދާޅުވެފައިވަނީ، މި މައްސަލައަށް މިހާތަނަށް އެއްވެސް އަލިމަގެއް ފެނިފައިނުވާއިރު، އެ ކުންފުނީގެ ހޯނޑެއްދޫގައި ތިބި މުވައްޒަފުން މަދުކޮށް، ބާކީ ތިބި މުވައްޒަފުންނަށް ކޮވިޑް-19 ކަމަށް ބުނެ މުސާރައިގެ ގޮތުގައި 1000 ރުފިޔާ އަށްވުރެ ދަށް އުޖޫރައެއް ދޭން ނިންމާފައިވާ ކަމަށެވެ. އަދި ހަމަ އެހެންމެ އެތަނުގައި ހުރި ބައެއް މުދަލާއި ވެހިކަލް ފަދަ ތަކެތިވެސް ރަށުން ބޭރުކޮށްފައިވާ ކަމަށް ބުނެފައިވެއެވެ.
މެންބަރު ވިދާޅުވެފައި ވަނީ މި މަޝްރޫއަށް 14 އަހަރަށްވުރެ ގިނަ ދުވަސްވެފައިވީއިރު، މަސައްކަތް އެއްކޮށް ނިމިފައިނުވާއިރު، ސަރުކާރުތަކުން މިކަން މިހާ ފަސޭހަކޮށް ދޫކޮށްލައިގެން ތިބެން ޖެހޭ ސަބަބެއް އެއްގޮތަކަށް ވެސް ވިސްނިވަޑައި ނުގަންނަވާ ކަމަށެވެ.
ހޯނޑެއްދޫގައި މަސް ގަންނަ ސެންޓަރެއް ގާއިމު ކުރުމަށް ބިން ކުއްޔަށް ދޫކުރުމުގެ އެއްބަސްވުމުގައި ސޮއި ކުރެވިފައިވަނީ 2005 ވަނަ އަހަރުގެ ޑިސެމްބަރ މަހުގެ 8 ވަނަ ދުވަހު އެވެ.
މި މައްސަލައާ ގުޅިގެން ފިޝަރީޒް މިނިސްޓަރު ޒަހާ މަޖިލީހަށް ހާޒިރު ކުރުމުން އެކަމަނާ އެދުވަހު ވިދާޅުވެފައި ވަނީ މި މައްސަލަ އޮތްގޮތުން މި މައްސަލަ ދެން ދާނީ ކޯޓަށް ކަމަށެވެ.
އެދުވަހު މެމްބަރުން ތަކުރާރުކޮށް މިނިސްޓަރަށް އަމާޒު ކުރެއްވި ސުވާލަކީ އެގްރިމެންޓާ ހޮރައިޒަން އިން ޚިލާފުވެފައިވާ ކަމަށް ދެކެވަޑައިގަންނަވަންތޯ އާއި އެހެންކަމަށްވާނަމަ ފިޔަވަޅު އަޅުއްވާނީ ކޮންއިރަކުންތޯ އެވެ. މިނިސްޓަރު އެ ސުވާލަށް ސީދާ ޖަވާބެއް ނުދައްވާ ވިދާޅުވީ އުންމީދުކުރެއްވި ހިސާބަށް އެމަސައްކަތް ނުދާކަމަށެވެ. އަދި ހެދިފައިހުރި އެކްސްކުލޫސިވް އެގްރިމެންޓް އުވާލައިގެން ނޫނީ މަސްވެރިންނަށް ހަމައަގު ހޯދައި ނުދެވޭނެކަމަށާއި އެކަމަށްޓަކައި ކުރަންޖެހޭ މަސައްކަތް ކުރައްވަމުން ގެންދަވާ ކަމަށެވެ.
ހޯނޑެއްދޫގައި މަސް ފެކްޓްރީ އެއް އެޅުމަށް ބިން ކުއްޔަށް ދީފައިވަނީ އަކަފޫޓަކަށް 15 ލާރީގެ މަގުންނެވެ.
