ދިރިއުޅުމުގައި ލިބޭ ކާމިޔާބީގެ ޝުކުރު އެންމެ ޙައްޤުވާ އެއް ބަޔަކީ ޓީޗަރުން: ރައީސް
5 އޮކްޓޯބަރު 2020 | ހޯމަ 05:03މައިންބަފައިން ފިޔަވައި ދިރިއުޅުމުގައި އެންމެ ފައިދާހުރި ފިލާވަޅުތަކެއް ދަސްކޮށްދޭ އެއް ބަޔަކީ ޓީޗަރުން
ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙުއާއި އެޑިކުއޭޝަން މިނިސްޓަރ ޑރ އާއިޝަތު އަލީ- ރައީސް ސޯލިޙު ވަނީ ހުރިހާ ޓީޗަރުންނަށް ދުވަހުގެ ތަހުނިޔާ އަރިސް ކުރައްވާފައި
ދިރިއުޅުމުގައި ލިބޭ ކާމިޔާބީތަކުގެ އެންމެ މުހިއްމު އެއް ހިއްސާއެއް އަދާކުރާ އެއް ބަޔަކީ ޓީޗަރުން ކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު ވިދާޅުވެއްޖެއެވެ.
ޓީޗަރުންގެ ދުވަހުގެ މުނާސަބަތުގައި ތަހުނިޔާ ދަންނަވައި ރައީސް ސޯލިޙު ކުރެއްވި ޓްވީޓެއްގައި ވިދާޅުވީ، މައިންބަފައިން ފިޔަވައި ދިރިއުޅުމުގައި އެންމެ ފައިދާހުރި ފިލާވަޅުތަކެއް ދަސްކޮށްދޭ އެއް ބަޔަކީ ޓީޗަރުން ކަމަށެވެ. އަދި ދިރިއުޅުމުގައި ކޮންމެ މީހަކަށްވެސް ލިބޭ ކާމިޔާބީގެ އެންމެ މުހިއްމު އެއް ހިއްސާއެއް އަދާކުރާނެ އެއްބަޔަކީ ޓީޗަރުން ކަމަށްވުމާއެކު، ކާމިޔާބީއާ ގުޅިގެން ޝުކުރު ޙައްޤުވާ އެއް ބަޔަކީ ވެސް ޓީޗަރުންކަން ރައީސް ސޯލިޙު ފާހަގަ ކުރެއްވިއެވެ.
ރައީސް ސޯލިޙު ވަނީ ޒުވާން ޖީލަށް ހެޔޮ މަގު ދެއްކެވުމަށްޓަކައި ކެނޑިނޭޅި މަސައްކަތް ކުރަމުންދާ ޓީޗަރުންނާއި، އެމަނިކުފާނަށް ތައުލީމު ޙާސިލު ކޮށްދެއްވި ޓީޗަރުން ހިމެނޭ ގޮތަށް ހުރިހާ ޓީޗަރުންނަށް ދުވަހުގެ ހެޔޮ އެދުމާއި ތަހުނިޔާ އަރިސް ކުރައްވާފައެވެ.
ކޮންމެ އަހަރެއްގެ އޮކްޓޫބަރު މަގު 5 ވަނަ ދުވަހަކީ ބައިނަލްއަގްވާމީ ގޮތުން ފާހަގަކުރާ މުދައްރިސުންގެ ދުވަހެވެ. އެގޮތުން ބައިނަލްއަޤްވާމީ ގޮތުން ފާހަގަކުރާ މުދައްރިސުންގެ ދުވަހުގެ މުނާސަބަތުގައި، މުދައްރިސުންގެ ދުވަހުގެ ތަހުނިޔާ އާއި ހެޔޮއެދުންތައް އެންމެހާ ލޮބުވެތި މުދައްރިސުންނަށް އެޑިޔުކޭޝަން މިނިސްޓްރީން ވެސް ވަނީ އަރިސްކޮށްފަ އެވެ.
