އައްޑޫ ސިޓީގައި ޚާއްސަ ބަލިތަކަށާއި، ދިގުމުއްދަތަކަށް ބޭސް ބޭނުންކުރާ ފަރާތްތަކުގެ ދަފްތަރު އެކުލަވާލަނީ!
4 އޮކްޓޯބަރު 2020 | އާދީއްތަ 22:00ހުޅުދޫގެ ދިގުމުއްދަތަކަށް ބޭސް ބޭނުންކުރާ ފަރާތްތަކުގެ ދަފްތަރު އެކުލަވާލުމުގެ މަސައްކަތް ދަނީ ކުރަމުން
އައްޑޫ ސިޓީ ކައުންސިލް އިދާރާއިން މިމަސައްކަތް ކުރަމުންދަނީ އެސްޓީއޯއާ ގުޅިގެން
ދިގުމުއްދަތަކަށް ބޭސް ބޭނުންކުރާ ފަރާތްތަކާއި ޙާއްސަ ބަލިތަކަށް ބޭސް ބޭނުންކުރާ ފަރާތްތަކުގެ ދަފްތަރު އެކުލަވާލުމުގެ މަސައްކަތް އައްޑޫ ސިޓީ ކައުންސިލުން ފަށައިފިއެވެ.
އައްޑޫ ސިޓީ ކައުންސިލުން ބުނީ ސްޓޭޓް ޓްރޭޑިންގ އޮގަނައިޒޭޝަނުން (އެސްޓީއޯ) އަތޮޅު ތެރޭގައި މީހުން ދިރިއުޅޭ ހުރިހާ ރަށެއްގައި ފާމަސީތައް ހިންގަމުން ގެންދަނީ އެރަށެއްގެ ރައްޔިތުންނަށް ބޭނުންވާ އަސާސީ ޚިދުމަތެއްގެ ގޮތުގައި ކަމަށެވެ. އަދި ޚިދުމަތްތައް އިތުރަށް ރަނގަޅުކުރުމުގެ ގޮތުން އެކުންފުނީގެ ފަރާތުން ދަނީ މަސައްކަތް ކުރަމުންދާ ކަަމަށެވެ.
އެގޮތުން މިހާރު އެންމެ އިސްކަމެއް ދީގެން ކުރުމަށް ނިންމަވާފައިވާ އެއް މަސައްކަތަކީ ދިގު މުއްދަތަކަށް ބޭސް ބޭނުންވާ ފަރާތްތަކަށާއި ޚާއްސަ ބަލިތަކުގެ ބޭސް ބޭނުންވާ ފަރާތްތަކަށް އެރަށަކުން ބޭސް ލިބޭނެ ގޮތް ހަމަޖައްސައި ދިނުން ކަމަށް ކައުންސިލުން ބުނެއެވެ. އަދި ކައުންސިލުން ބުނީ މި މަސައްކަތް ކުރުމަށް ލޯކަލް ގަވަރެމެންޓް އޮތޯރިޓީން މިހާރު ކައުންސިލަށް އަންގާފައިވާ ކަމަށެވެ.
ކައުންސިލުން ބުނީ އެފަދަ ފަރާތްތަކުގެ ރަޖިސްޓްރީއެއް އެކުލަވާލައި އެފަރާތްތަކަށް ބޭނުންވާ ބޭސް ފަސޭހައިން ކޮންމެ އަވަށެއްގެ ހުންނަ އެސްޓީއޯގެ ފާމަސީ މެދުވެރިކޮށް ލިބޭނެގޮތް ހަމަޖެއްސުމަކީ މިހާރު ކުރަމުންދާ މަސައްކަތުގެ ތެރެއިން އެއް މަސައްކަތް ކަމަށެވެ. އަދި މިހާރު ހުޅުދޫގައި ދިގުމުއްދަތަކަށް ބޭސް ބޭނުންކުރާ ފަރާތްތަކާއި ޙާއްސަ ބަލިތަކަށް ބޭސް ބޭނުންކުރާ ފަރާތްތަކުގެ ދަފްތަރު އެކުލަވާލުމުގެ މަސައްކަތް ފަށާފައިވާ ކަމަށާއި، އެ ފަރާތްތަކުގެ މައުލޫމާތު ކައުންސިލްއާ ހިއްސާ ކޮށްދިނުމަށް ވަނީ އެދިފައެވެ.
އެހެންކަމުން އެ އަވަށުގައި ދިރިއުޅޭ ދިގު މުއްދަތަކަށް ބޭސް ބޭނުންކުރާ ފަރާތްތަކާއި އަދި ޚާއްސަ ބަލިތަކަށް ބޭސް ބޭނުންކުރާ ފަރާތްތަކުގެ ދަފްތަރު އެކުލަވާލުމަށް މިމަހުގެ 12 ވާ ހޯމަ ދުވަހުގެ 14:00 ގެ ކުރިން އޮފީހުގެ ނަންބަރު 6894728 އަށް ގުޅައިގެން ނުވަތަ hulhudhoo@adducity.gov.mv އަށް މެއިލް ކޮށްގެން މައުލޫމާތު ހިއްސާކޮށް ދިނުމަށް އެދޭ ކަަމަށް ކައުންސިލުން ބުނެއެވެ.
