މޯލްޑިވްސް ބްރޯޑްކާސްޓިންގ ކޮމިޝަނުން އެންމެ ބޮޑަށް ބޭނުން ވަނީ ބްރޯޑްކާސްޓަރުންނާއި ރީބްރޯޑްކާސްޓަރުންނާއި ގުޅިގެން މަސައްކަތް ކުރުމަށް ކަމަށް ކޮމިޝަން ރައީސް މަރިޔަމް ވަހީދާ ވިދާޅުވެއްޖެ އެވެ.
ބްރޯޑްކާސްޓިންގ ދުވަސް ފާހަގަކުރުމުގެ ގޮތުން ބްރޯޑްކޮމް އިން ބޭއްވި ނޫސްވެރިންގެ ބައްދަލުވުމުގައި ކޮމިޝަންގެ ރައީސް މަރިޔަމް ވަހީދާ ވިދާޅުވީ މޭޒުމަތިން ގިނަކަންތައްތަކެއް މަޝްވަރާ ކޮށްގެން ނިންމިދާނެ ކަމަށް މިހާރު ބްރޯޑްކޮމްގައި ތިއްބެވި މެމްބަރުން ގަބޫލުކުރައްވާ ކަމަށެވެ. މިހާރު އެކުލަވާލާފައިވާ ކޯޑް އޮފް ޕްރެކްޓިސްގެ ތެރެއިން މަސައްކަތް ކުރަން ޖެހޭއިރު ބްރޯޑްކާސްޓިންގ ޤާނޫނާއި ހެދިފައި ހުރި ގަވާއިދުތަކުގެ ބައެއް ކަންކަން ބަދަލު ކުރަން ޖެހޭ ކަމަށް ދެކެވަޑައިގަންނަވާ ކަމަށް މަރިޔަމް ވަހީދާ ވިދާޅުވިއެވެ. އެގޮތުން މިހާރު ހުޅުވާލާފައިވާ ދުނިޔެއަށް ފެތޭގޮތަށް ގަވާއިދުތައް ވެސް އިސްލާހު ކުރަން ޖެހޭ ކަމަށާއި އެގޮތުން ބްރޯޑްކާސްޓިންގ ގަވާއިދު މިހާރު ކޮމިޝަނުން ބަދަލު ކޮށްފައިވާ ކަމަށް މަރިޔަމް ވަހީދާ ވިދާޅުވިއެވެ.
މައްސަލަތައް ކޮމިޝަނަށް ހުށަހެޅޭއިރު ކޮމިޝަނުން މަސައްކަތް ކުރަން ޖެހޭ ވަކި ޚާއްސަ ގޮތްތަކެއް ހުންނަ ކަމަށާއި މިހާރު ހުށަހެޅުފަައިވާ މައްސަލަތައް ވީއެންމެ އަވަހަށް ނިންމާ ކަމާގުޅުން ހުރި އެހެން ހިސާބުތަކަށް ފޮނުވުމަށް މަސައްކަތް ކުރައްވަމުން ގެންދަވާ ކަމަށް މަރިޔަމް ވަހީދާ ވިދާޅުވިއެވެ.
އޭގެ އިތުރުން ރީބްރޯޑްކާސްޓަރުންނަށް ބަލާލައިފިއްޔާ ކުޑަކޮށް ދަތިވޭ ބްރޯޑްކާސްޓިންގ ކޮމިޝަންގައި ބޭނުންވާ ވަރަށް މޮނިޓަރއެއް ނުކުރެވޭ. އެއީ ފައިނޭންޝަލީވެސް ބައެއް ދަތިތައްހުރީމާ މޮނިޓަރިންގ އޮފިސަރުންނެއް އުފެއްދިފައެއް ނެތް. ދެން މިބަރޯސާވަނީ ކައުންސިލްތަކަށް ނުވަތަ އެހެން ދާއިރާތަކަށް. ގިނަ ބޭފުޅުންގެ އެއްބާރުލުން ލިބޭ. އެހެންނަމަވެސް މައުލޫމާތު ނުލިބިގެން ލަސްވެފައި ހުރި މައްސަލަތައް ހަމަ ފާހަގަކޮށްލަން. އެހެންނަމަވެސް ކޮމިޝަނުން މަސައްކަތްކުރާނީ ކުރިޔަށް އޮތްތަނުގައި އެމައްސަލަތައް ވީ އެންމެ އަވަހަށް ކޮމިޝަނުން ނިންމާ އެ ނިސްބަތްވާ ހިސާބަށް ގެންގޮސްދެވޭތޯ.ބްރޯޑްކޮމްގެ ރައީސް މަރިޔަމް ވަހީދާ
މީގެއިތުރުން މަރިޔަމް ވަހީދާ ވިދާޅުވީ ކޮމިޝަނަށް ހުށަހެޅޭ މައްސަލަތައް ބެލުމުގައި ދެ ކަމެއް މިހާރު ތަޢާރަފްކޮށްފައިވާ ކަމަށެވެ. އެއީ މޭޒުމަތިން މަޝްވަރާ ކޮށްގެން ޑިސްޕިޔުޓް ރިޒޮލިޔުޝަން ހޯދުމަށް މަސައްކަތް ކުރުމާއި ކޮމިޝަނުން ކުރިން ބަލާފައި ހުރި މައްސަލަތައް އަލުން ރިވިއު ކުރުމަށް ހުޅުވާލުން ކަމަށް މަރިޔަމް ވަހީދާ ވިދާޅުވިއެވެ.
ދެން ބްރޯޑްކާސްޓިންގ ކޮމިޝަނުން މިނެރުނީ ކުރީގައި ނިންމާފައި ހުރި ބައެއް ކޭސްތައް ބަލާފައި ބައެއް ސްޓޭޝަންތަކުން ނޫނީ އެމައްސަލައިގައި ހިމެނޭ ބޭފުޅުންނަށް އެއީ އެންމެ ރަނގަޅުގޮތުގައި ނިންމިފައިވާ މައްސަލައެއްގެ ގޮތުގައި ނުފެންނަންޏާ ބްރޯޑްކާސްޓިންގ ކޮމިޝަނަށް ފޮނުވިދާނޭ އެމައްސަލަ ރިވިއުކުރުމަށްޓަކައި. އެހެންވީމާ ރިވިއު ޕްރޮސެސް އާއި ޑިސްޕިޔުޓް ރިޒޮލިޔުޝަން އެއީ މިހާރުގެ ކޮމިޝަނުން ތަޢާރަފްކުރި ދެ ކަންތައްބްރޯޑްކޮމްގެ ރައީސް މަރިޔަމް ވަހީދާ
2011 ވަނަ އަހަރު ބްރޯޑްކޮމް އުފެދުނުފަހުން މިހާތަނަށް އައިއިރު ބްރޯޑްކާސްޓް ދާއިރާ އާއި ގުޅޭގޮތުން 653 ޝަކުވާއެއް ހުށަހަޅާފައިވާ ކަަމަށް މަރިޔަމް ވަހީދާ ވިދާޅުވިއެވެ. މީގެތެރެއިން 242 ޝަކުވާ އަކީ ބްރޯޑްކާސްޓް ކުރެވޭ ކޮންޓެންޓާއި ގުޅުން ހުރި ޝަކުވާ ކަމަށާއި 327 ޝަކުވާ އަކީ ލައިސަންސްގެ މައްސަލަތަކާއި ގުޅުން ހުރި ޝަކުވާ ކަމަށް މަރިޔަމް ވަހީދާ ވިދާޅުވިއެވެ.
މިހާތަނަށް ކޮމިޝަނަށް ހުށަހެޅިފައިވަ ޝަކުވާތަކުގެ ތެރެއިން މިހާރު ކޮމިޝަނުން ބަލަމުން އަންނަނީ 32 ޝަކުވާ އެއް ކަމަށާއި މީގެތެރޭގައި ލައިންސަންސާ ގުޅޭ 21 ޝަކުވާއަކާއި ކޮންޓެންޓާއި ގުޅޭ 5 މައްސަލަ އަދި ޚިދުމަތާއި ގުޅުން ހުރި 6 މައްސަލަ ހިމެނޭ ކަމަށް މަރިޔަމް ވަހީދާ ވިދާޅުވިއެވެ.
