އަޑުއިވުމުގެ ނުކުޅެދުންތެރިކަން ހުންނަ ކުދިންނަށް އާކުން ކްލިއަރ މާސްކްތައް ހަދިޔާކޮށްފި
މި މާސްކްތަކަކީ ހެލްތް ޕްރޮޓެކްޝަން އޭޖަންސީއިން ފާސްކޮށްފައިވާ މާސްކްތަކެއް
މާސްކްތައް ހަދިޔާ ކުރުމުގެ ތެރެއިން
އަޑުއިވުމުގެ ނުކުޅެދުންތެރިކަން ހުންނަ ދަރިވަރުންނަށާއި އެކުދިންގެ ޓީޗަރުން ބޭނުންކުރުމަށްޓަކައި 300 'ކްލިއަރ' މާސްކް، އެޑްވޮކޭޓިންގ ދަ ރައިޓްސް އޮފް ޗިލްރަން (އާކް) އިން މިނިސްޓްރީ އޮފް އެޑިއުކޭޝަންއަށް ހަދިޔާކޮށްފިއެވެ.
ރަސްމީކޮށް މި ހަދިޔާ މިނިސްޓަރ އޮފް އެޑިއުކޭޝަން، ޑރ.އައިޝަތު އަލީއަށް ހަވާލުކޮށްދެއްވީ އާކް ގެ އެގްޒެކެޓިވް ކޮމިޓީގެ މެމްބަރު އަލްފާޟިލް މުރުތަޞާ މޫސާއެވެ.
އަޑުއިވުމުގެ ނުކުޅެދުންތެރިކަން ހުންނަ ކުދިން އެހެން ފަރާތްތަކާ މުޢާމަލާތްކުރުމަށްޓަކައި މޫނާއި ތުންފަތުގެ ހަރަކާތަކަށް ބަރޯސާވާން ޖެހުމުގެ ސަބަބުން ކޮވިޑް 19 އާ ގުޅިގެން އެ ކުދިންނަށް އިތުރު ހުރަސްތަކާ ކުރިމަތިވަމުންދާ ކަމަށާއި އޭގެ ނަތީޖާއެއްގެ ގޮތުން އެކުދިންގެ ތަޢުލީމާއި އިޖްތިމާއި ގުޅުންތަކަށް ނޭދެވޭ އަސަރުކޮށް، އެކުދިން މުޖުތަމަޢުގައި އިތުރަށް އެކަހެރިވުމުގެ ފުރުޞަތު ބޮޑު ކަމަށް އާކުން ބުނެއެވެ.
ހެލްތް ޕްރޮޓެކްޝަން އޭޖަންސީއިން ފާސްކޮށްފައިވާ މި މާސްކްގެ ޒަރިއްޔާއިން އަޑުއިވުމުގެ ނުކުޅެދުންތެރިކަން ހުންނަ ކުދިންގެ އާންމު ދިރިއުޅުމުގައި ދިމާވާ ދަތިތަކަށް ކޮންމެވެސް ވަރެއްގެ ލުއިތަކެއް ލިބި، މިފަދަ ދުވަސްވަރެއްގައި އެކުދިންގެ ޙައްޤުތައް ހިމާޔަތްކޮށް ރައްކާތެރިކުރުމުގައި އެހީތެރިދޭ ކަމަށް އެ ޖަމިއްޔާ އިން ބުނެއެވެ. މި މާސްކްތައް ތައްޔާރު ކޮށްފައިވަނީ ޓްރާންސްޕޭރަންޓް ކަވަރަކާއެކު ކޮޓަންފޮތީގެ ތިންފަށަލަ ހިމެނޭ ގޮތަށް، އެކި އުމުރުފުރާއަށް ހެޔޮވަރު ސައިޒުތަކަށް ބޭނުން ކުރެވޭ ގޮތަށް 'އެޖަސްޓަބަލް ސްޓްރެޕް' އެއް ހިމަނާފައެވެ.
އަޑުއިވުމުގެ ނުކުޅެދުންތެރިކަން ހުންނަ ކުދިންނަށާއި އެކުދިންގެ ޓީޗަރުންނަށް މި މާސްކްތައް ހަވާލުކޮށްދިނުމަށް މިނިސްޓްރީ އޮފް އެޑިއުކޭޝަން ދެއްވި އެހީތެރިކަމަށް އާކުން ވަނީ ޝުކުރ އަދާކޮށްފައެވެ. އަދި ދިވެހިރާއްޖޭގައި ކުޑަކުދިންގެ ޙައްޤުތައް ރައްކާތެރިކޮށް ކުރިއެރުވުމުގެ މަސައްކަތުގައި ދެމިތިބޭނެ ކަމަށް އެ ޖަމިއްޔާ އިން ބުނެއެވެ.
