ކުށްމަދު އަމާން މުޖުތަމައެއް ގާއިމު ކުރުމަށް އަތޮޅުތެރޭގެ ފުލުހުންގެ އިސްނެގުމެއް: މުއައްސަސާތައް ހޭލުންތެރިކުރަނީ

ކުށްމަދު އަމާން މުޖުތަމައެއް ގާއިމު ކުރުމަށް އަތޮޅުތެރޭގެ ފުލުހުންގެ އިސްނެގުމެއްގެ ދަށުން މުއައްސަސާތައް ހޭލުންތެރިކުމުގެ ޕްރޮގްރާމެއް ތ. ބުރުނީގައި ކުރިޔަށް ގެންގޮސްފިއެވެ.

އެގޮތުން، ތ. ވިލުފުށި ޕޮލިސް ސްޓޭޝަނުން އެ އަތޮޅު ބުރުންޏަށް ޒިޔާރަތްކޮށް ރަށުގެ ރައްޔިތުންނާ އަދި ދެ މުއައްސަސާއަކާ މަޝްވަރާ ބައްދަލުވުންތައް ބާއްވައިފައިވެއެވެ. ތިން ދުވަހުގެ މުއްދަތަށް ކުރިއަށް ގެންދިޔަ އެ ދަތުރުގައި ތ. ބުރުނި ސްކޫލާއި ހެލްތު ސެންޓަރުގެ މެނޭޖްމަންޓާ ބައްދަލު ކޮށްފައިވާ ކަމަށް ފުލުހުން ބުނެއެވެ.

ފުލުހުން ބުނީ، ސްކޫލާއެކު ކުރިއަށް ގެންދިޔަ ބައްދަލުވުމުގައި، ދެ ފަރާތުގެ މެދުގައި އޮންނަ ގުޅުން އިތުރަށް ހަރުދަނާކޮށް ރަނގަޅުކުރުމާއި ކުށްމަދު ކުރުމަށް ކުރެވިދާނެ ކަންކަމާ ގުޅޭގޮތުން މަޝްވަރާކޮށް، އިންޓަރނެޓުގެ ޒަރީއާއިން ދަރިވަރުންނަށް ކުރިމަތިވާ ކަންކަމުން ދުރުހެލި ކުރުވުމަށާއި އެއްގަމު ދަތުރުފަތުރުގެ ގާނޫނަށް އަހުލުވެރި ކުރުވުމަށް ސްކޫލް ދަރިވަރުންނާއި ބެލެނިވެރިން ހޭލުންތެރިކުރުމާއި ގުޅޭގޮތުން މަޝްވަރާ ކޮށްފައިވާ ކަމަށެވެ.

ހެލްތު ސެންޓަރާއެކު ކުރިއަށް ގެންދިޔަ ބައްދަލުވުމުގައި، ކޯވިޑް 19 އާ ގުޅިގެން ރަށުގެ ހާލަތު އޮޅުންފިލުވައި ރައްޔިތުން ހޭލުންތެރި ކުރުމަށް އިތުރަށް ކުރެވިދާނެ ކަންކަމާ ގުޅޭގޮތުން މަޝްވަރާ ކޮށްފައިވެއެވެ.

މީގެ އިތުރުން އެ ރަށުގައި ދުއްވާ އެއްގަމު އުޅަނދުތަކަކީ އެއްގަމު ދަތުރުފަތުރުގެ ގާނޫނާއި ގަވާއިދުތަކާ އެއްގޮތަށް ދުއްވާ އުޅަނދުތަކެއްތޯ ބަލައި އުޅަނދުގެ އަހަރީ ފީއާއި އިންޝުއަރެންސާއި ރޯޑްވާދިނަސް ބެލުމުގެ އިތުރުން ޓްރެފިކްގެ އެހެނިހެން ވައިލޭޝަންތައް ބަލައިފައިވާ ކަމަށް ފުލުހުން ބުނެއެވެ. އަދި އުޅަނދުތަކުގެ މައުލޫމާތު އެއްކޮށް، ރަށު ކައުންސިލާ ހިއްސާ ކޮށްފައިވެއެވެ.

މިފަދަ ޕްރޮގްރާމްތައް އެހެނިހެން ރަށްރަށުގައި ވެސް ފުލުހުންގެ ފަރާތުން ކުރިޔަށް ގެންދާނެއެވެ.