ކޮވިޑް-19: އައްޑޫ ޕޮލިސް އެކަޑަމީއާއި އިތުރު ތިން ގެއެއް މޮނީޓަރިންގ އަށް

އިންޑިއާ ސަރުކާރުން އައްޑޫގައި ގާއިމުކޮށްދޭ ޕޮލިސް އެކަޑަމީގެ މަސައްކަތަށް އިންޑިއާގެ ކޮޗިން އިން އައި މީހުންގެ ތެރެއިން ޕޮޒިޓިވްވި މީހުންނާ ކޮންޓެެެކްޓްވި އެކެޑަމީގައި މަސައްކަތް ކުރާ މީހަކު ޕޮޒިޓިވްވުމާއި ގުޅިގެން ޕޮލިސް އެކަޑަމީގެ މަސައްކަތު ސައިޓާއި ތިން ގެއެއް މޮނިޓަރިންގެ ހާލަތަށް ގެނެސްފިއެވެ.

އައްޑޫ ލައިވްއިން ރިޕޯޓްކޮށްފައިވާ ގޮތުގައި، މޮނިޓަރިންގެ ހާލަތަށް ގެނެސްފައިވަނީ ޕޮލިސް އެކަޑަމީގެ މަސައްކަތް ކުރާ އިސް މީހުން ތިބުމަށް މަރަދޫން ކުއްޔަށް ނަގާފައިވާ ގެއަކާއި ހިތަދޫން ނަގާފައިވާ ދެ ގެއެވެ. މީގެ އިތުރުން އެމީހުން މަސައްކަތް ކުރާ ސައިޓު ވެސް ވަނީ މޮނިޓަރިންގެ ހާލަތަށް ގެނެސްފައެެވެ.

Advertisement

މައުލޫމާތު ލިބިފައިވާ ގޮތުގައި، ޕޮލިސް އެކަޑަމީގެ ސައިޓުން ކޮވިޑް-19އަށް ޕޮޒިޓިވް ވެފައިވަނީ ދޫގަސްގައި ކަރަންޓީނުގައި ތިބި މީހުންގެ ކަންކަން ހަމަޖެއްސުމުގައި ހަރަކާތެރިވި މީހެކެވެ. އެ މީހާ ޕޮޒިޓިވްވުމާ ގުޅިގެން ކޮންސްޓަރަކްޝަން ސައިޓުގައި މަސައްކަތް ކުރާ މީހުން ޓެސްޓު ކުރުމުގެ މަސައްކަތް ކުރެވެމުން ދެއެވެ.

ޕޮލިސް އެކަޑަމީގެ މަސައްކަތަށް ކޮޗިން އިން އައި 128 މީހުންގެ ތެރެއިން 53 މީހަކު މިހާތަނަށް ވަނީ މި ބައްޔަށް ޕޮޒިޓިވް ވެފައެވެ. އެ ހުރިހާ އެންމެންވެސް ތިބީ ގަމުގައި ހުންނަ ދޫގަސް ގައި ކަރަންޓީނު ވެގެންނެވެ. މި 53 މީހުން ޕޮޒިޓިވް ވުމާއި ގުޅިގެން ހުރިހާ އެންމެން އިތުރު 14 ދުވަހަށް ކަރަންޓީނުކޮށްފައިވާ ކަމަށް އައްޑޫ ހޮސްޕިޓަލުން ބުނެއެވެ. އަދި ޕޮޒިޓިވް އެއްވެސް މީހެއްގެ ފަރާތުން ބަލީގެ އަލާމާތެއް ފެނިފައި ނުވާކަމަށް ވެސް ހޮސްޕިޓަލުން ބުނެއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ހުކުރު ދުވަހު އާންމު ކުރި މައުލޫމާތުތަކަށް ބަލާއިރު، ރާއްޖެއިން އިތުރު 44 މީހަކު ކޮވިޑް-19 އަށް ޕޮޒިޓިވްވެ، މި ބަލި ޖެހުނު މީހުންގެ އަދަދު 10،398ށް ވަނީ އަރާފަ އެވެ. މީގެ ތެރޭގައި ހިމެނެނީ 38 ދިވެއްސަކާއި، 6 ބިދޭސީއެކެވެ. އަދި ގްރޭޓަރ މާލެ ސަރަހައްދުން 40 ކޭސް ފެނިފައިވާއިރު އަނެއް 4 ކޭސް ފެނިފައިވަނީ ރަށްރަށުންނާއި ރިސޯޓުތަކުންނެވެ.

އެޗްޕީއޭގެ ތަފާސްހިސާބުތައް ދައްކާ ގޮތުން ރާއްޖޭގެ 24 ރަށެއްގައި 90 އެކްޓިވް ކޭސްތައް ވަނީ ފެނިފައެވެ. މީގެތެރެއިން ގިނައިން ހިމެނެނީ ހޯމް ކަރަންޓީނުގައި ތިބި މީހުންނެވެ.