ކޮވިޑް-19 އަށް ޕޮޒިޓިވްވެ އަސްކަރީ ހޮސްޕިޓަލުގައި ފަރުވާދެމުން އަންނަ އެމެރިކާގެ ރައީސް ޑޮނަލްޑް ޓްރަމްޕްގެ ހާލުކޮޅު ރަނގަޅުކަމަށް އެމަނިކުފާނު ވިދާޅުވެއްޖެއެވެ.

ޓްރަމްޕް ކޮވިޑަށް ޕޮޒިޓިވްވެ ފަރުވާދޭން ފަށާފައިވަނީ ރޭގެ ވަގުތެއްގައެވެ. ހޮސްޕިޓަލަށް ވަޑައިގެންނެވުމުގެ ކުރިން ޓްވިޓަރ މެދުވެރިކޮށް ދެއްވި ވީޑިއޯ މެސެޖެއްގައި ވިދާޅުވީ، ހިފެހެއްޓުމެއް ނެތި ސަޕޯޓްކުރައްވާ ހުރިހާ ފަރާތްތަކަށް ޝުކުރުއަދާ ކުރައްވާ ކަމަށެވެ. އަދި ހާލުކޮޅު ރަނގަޅު ކަމަށާއި، ފަސްޓް ލޭޑީ މެލޭނިއާ ޓްރަމްޕުގެ ހާލުކޮޅު ވެސް ރަނގަޅު ކަމަށެވެ. ޓްރަމްޕަށް ފަރުވާދެމުން ދަނީ ވޯލްޓަރ ރީޑް ހޮސްޕިޓަލުގައެވެ.

ޓްރަމްޕް ކޮވިޑަށް ޕޮޒިޓިވްވީ ކިހިނެއް ކަމެއް އަދި މިހާތަނަށް ދެނެގަނެވިފައި ނުވާއިރު، ޓްރަމްޕް ޓެސްޓުކުރީ އެމަނިކުފާނުގެ އެޑްވައިޒަރު ހޯޕް ހިކްސް ކޮވިޑް-19 އަށް ޕޮޒިޓިވްވުމުންނެވެ. ހިކްސް ވަނީ ދާދި ފަހުން އެމެރިކާގެ ރިޔާސީ އިންތިހާބުގައި ބަހުސް ބޭއްވި އޮހަޔޯއަށް ޓްރަމްޕާ އެކު އެއާފޯސް ވަންގައި ދަތުރުކުރައްވާފައެވެ.

ޓްރަމްޕުގެ ހާލުކޮޅާއި ގުޅިގެން ވައިޓް ހައުސްއިން ބުނެފައިވަނީ ޓްރަމްޕުގެ ކިބައިން އަދި ފެންނަނީ ބަލީގެ އާދައިގެ އަލާމަތްތައް ކަމަށާއި ރައީސް ހުންނެވީ ވަރުގަދަ އަޒުމެއްގައި ކަމަށާއި ވަރަށް އަވަހަށް ބަލިން ރަނގަޅުވާނެ ކަމަށް އުއްމީދު ކުރައްވާ ކަމަށެވެ.

ޓްރަމްޕް ޕޮޒިޓިވްވުމާއި ގުޅިގެން ކޮންޓެކްޓްސް ދެނެގަތުމުގެ މަސައްކަތް ދަނީ ކުރަމުންނެވެ. މިހާތަނަށް ކުރި ޓެސްޓުތަކުން ޓްރަމްޕުގެ އާއިލާގެ ބޭފުޅުން ބައްޔަށް ނެގެޓިވް ކަމަށް ދައްކައެވެ. ނަމަވެސް ކޮންޓެކްޓްސްގެ ގޮތުގައި ފާހަގަ ކުރެވޭ ފަރާތްތައް އޮންނަ އުސޫލުގެ ތެރެއިން 10 ދުވަހު ކަރަންޓީނުގައި ތިބެން ޖެހެއެވެ.