ޔުއެފާގެ މެޗުތައް ބަލަން 30 އިންސައްތަ ސަޕޯޓަރުން ދަނޑަށް ވައްދަނީ

ޔުއެފާއިން އިންތިޒާމުކުރާ މުބާރާތްތަކުގެ މެޗުތައް ބަލަން 30 އިންސައްތަ ސަޕޯޓަރުން ދަނޑުތަކަށް ވައްދަން ނިންމައިފިއެވެ.

މި ނިންމުމާއެކު މި ސީޒަނުގެ ޔުއެފާ ޗެމްޕިއަންސް ލީގާއި، ޔުއެފާ ޔޫރޮޕާ ލީގުގެ އިތުރުން ޔުއެފާގެ ބައިނަލްއަގުވާމީ މެޗުތައް ބަލަންވެސް ސަޕޯޓަރުންނަށް ދަނޑަށް ވަދެވޭނެއެވެ.

ޔުއެފާއިން ބުރާސްފަތި ދުވަހު ނެރުނު ބަޔާނުގައި ބުނީ މެންބަރު ގައުމުތަކުގެ ކަމާ ބެހޭ ފަރާތްތަކުން ހުއްދަދޭނަމަ، ޔުއެފާއިން އިންތިޒާމުކުރާ މެޗުތައް ބެލުމަށް ދަނޑުތަކުގެ ޖާގައިގެ 30 އިންސައްތައަށް ސަޕޯޓަރުންނަށް ވަދެވޭނެ ކަމަށެވެ.

ޔުއެފާ މި ނިންމުން ނިންމުމުގެ ކުރިން މިދިޔަ މަހު ހަންގޭރީގެ ވެރިރަށް ބުޑަޕެސްޓުގެ ޕުސްކަސް އެރީނާގައި ކުޅުނު ޔުއެފާ ސުޕަ ކަޕް މެޗު ބަލަން 30 އިންސައްތަ ސަޕޯޓަރުން ވަނީ ދަނޑަށް ވައްދާފައެވެ. ޔުއެފާއިން މީގެ ކުރިން މައުލޫމާތުދިން ގޮތުގައި ސުޕަ ކަޕް މެޗު ބަލަން ސަޕޯޓަރުން ދަނޑަށް ވެއްދީ އެ އިދާރާއިން ތައްޔާރުކުރި "ޔުއެފާ ރިޓާން ޓު ޕްލޭ ޕްރޮޓޮކޯލް" ގެ އަޖުމަބެލުމަށް ކަމަށެވެ.

ޔުއެފާގެ ރައީސް ސްލޮވީނިއާގެ އަލެކްސަންޑަ ކެފެރިން ވިދާޅުވީ ޔުއެފާއިން އިންތިޒާމުކުރާ މުބާރާތްތަކުގެ މެޗުތައް ބަލަން 30 އިންސައްތަ ސަޕޯޓަރުން ދަނޑުތަކަށް ވައްދަން ނިންމުމާއެކު، ކުލަބުތަކަށް މާލީ ގޮތުން ލުޔެއް ލިބިގެންދާނެ ކަމަށާއި، މި ނިންމުމަކީ ކުލަބުތަކަށް އަދި ސަޕޯޓަރުންނަށް ފައިދާވާނެ ގޮތަށް ވިސްނުމަށްފަހު ނިންމި ނިންމުމެއް ކަމަށެވެ. އެކަމަކު މިހެން ނިންމި ކަމުގައި ވިޔަސް، ދަނޑުތަކުގައި ހަރުކަށި އުސޫލެއް ހެދިގެންދާނެ ކަމަށާއި، އެ އުސޫލަށް ސަޕޯޓަރުންނާއި ކުލަބުތަކުން ތަބާވާން ޖެހޭނެ ކަމަށްވެސް ވިދާޅުވިއެވެ.

ޔުއެފާއިން ދަނޑުތަކަށް ސަޕޯޓަރުން ވައްދަން ނިންމިއިރު، ޔޫރަޕުގެ ގަދަ ފަސް ލީގުގެ ތެރެއިން ޖަރުމަން ލީގާއި، އިޓާލިއަން ލީގުގެ އިތުރުން ފްރެންޗް ލީގުގެ މެޗުތައް ކުޅެމުން އަންނަނީ ވަކި އަދަދަކަށް ސަޕޯޓަރުން ދަނޑަށް ވައްދައިގެންނެވެ. އެކަމަކު އިނގިރޭސި ޕްރިމިއާ ލީގާއި ސްޕެނިޝް ލީގުގެ މެޗުތައް އަދިވެސް ކުޅެމުން އަންނަނީ ސަޕޯޓަރުންނާ ނުލައެވެ.