ކުރެންދޫ މިސްކިތް ވީހާވެސް އަވަހަކަށް ގާއިމް ވެގެން ދިއުމަކީ ރައްޔިތުންގެ ވަރަށް ބޮޑު ހުވަފެނެއް: ކައުންސިލް
2 އޮކްޓޯބަރު 2020 | ހުކުރު 08:18މަޝްރޫއު ޕްލޭންކޮށް ކުރެހުން ތައްޔާރު ކުރުމުގެ މަސައްކަތް ވަނީ ފަށާފައި
ޅ. ކުރެންދޫ
ޅ. ކުރެންދޫ މިސްކިތް ވީހާވެސް އަވަހަކަށް ގާއިމް ވެގެން ދިއުމަކީ ރައްޔިތުންގެ ވަރަށް ބޮޑު ހުވަފެނެއް ކަމަށް އެރަށު ކައުންސިލް ގެ ނައިބު ރައީސް ވިދާޅުވެއްޖެއެވެ.
ކުރެންދޫ މިސްކިތް އިމާރާތް ކުރުން މިނިސްޓްރީ އޮފް އިސްލާމިކް އެފެއާޒްއިން ވަނީ ޕްލޭން ކޮށްފައެވެ. މިކަމާ ގުޅޭ ގޮތުން ވާހަކަ ދައްކަވަމުން އެ ރަށު ކައުންސިލްގެ ނައިބު ރައީސް އައިޝަތު ވިޝާމާ ވިދާޅުވީ މިސްކިތް އިމާރާތް ކުރެވިގެން ދިއުމަކީ ރައްޔިތުންގެ ވަރަށް ވެސް ބޮޑު ހުވަފެނެއް ކަމަށެވެ.
މިހާރު އެ ރަށުގައި ތިން މިސްކިތް ހުންނަ އިރު މި ތިން މިސްކިތަކީ ރައްޔިތުން ގާއިމް ކޮށްފައިވާ މިސްކިތް ތަކެއް ކަމަށް އޭނާ މައުލޫމާތު ދެއްވިއެވެ. އަދި މިސްކިތް ތަކުގައި ޖާގައިގެ ދަތިކަން ދިމާވާ ކަމަށާ އޭގެ ސަބަބުން ރައްޔިތުންނަށް ގިނަ ގޮންޖެހުން ތަކާ ކުރިމަތި ވާ ކަމަށްވެސް އޭނާ ވިދާޅުވިއެވެ.
މީގެ އިތުރުން ވެސް އެރަށު ބޮޑު މިސްކިތުގެ ގިބްލައިގެ މައްސަލަ ކުރިމަތިވެގެން އެ މައްސަލަ ހައްލު ކޮށް ނިމުނު އިރު އެ މިސްކިތުގައި ވަނީ ވަރަށް ބޮޑު ޖާގައެއް ގެއްލިފައި ކަމަށާ އީދު ނަމާދު ފަދަ ނަމާދެއް ކުރާ ދުވަހަކު ވިއްސާރަ ވެއްޖެ ނަމަ ވެސް އެތައް މައްސަލައެއް ދިމާވާކަމަށް ވިޝާމާ ވިދާޅުވިއެވެ.
މިސްކިތް އިމާރާއް ކުރުމުގެ މަޝްރޫއު އަކީ ކޮންމެ ޕްރޮޖެކްޓަކަށް ވެސް ފޮނުވާ މަޝްރޫއެއް ކަމަށްވެސް އޭނާ ވަނީ ވިދާޅުވެފައެވެ. ނަމަވެސް އެ އަހަރެއްގެ ބަޖެޓްގައި ހިމަނާ ކަން ނުވަތަ ނޫން ކަން ވެސް ގިނަ ފަހަރަށް ނޭންގޭ ކަމަށާ މިސްކިތް އިމާރާތް ކުރުމަށް ބިން ދޫކުރިތާ ވެސް އެތައް އަހަރެއް ވެފައިވާކަމަށް އޭނާ އިތުރަށް ވިދާޅުވިއެވެ. އަދި މިފަހަރުގެ އުއްމީދަކީ ޕްލޭނާ އެއްގޮތަށް މިސްކިތް އިމާރާތްކުރެވި ރައްޔިތުންގެ ހުވަފެންތައް ހަގީގަތަކަށް ވެގެން ދިޔުން ކަމަށްވެސް ވިޝާމާ ވިދާޅުވިއެވެ.
މިހާރު މިސްކިތް އިމާރާތްކުރުމުގެ މަޝްރޫއު ޕްލޭންކޮށް ކުރެހުން ތައްޔާރު ކުރުމުގެ މަސައްކަތް ވަނީ ފަށާފައެވެ. ޑޮމެސްޓިކް ބަޖެޓް ނުވަތަ ދިވެހި ސަރުކާރުގެ ބަޖެޓުން އިމާރާތް ކުރަން ނިންމާފައިވާ މި މިސްކިތަށް ކަނޑަ އަޅާފައިވާ ބަޖެޓަކީ 2،000،000 ދިވެހި ރުފިޔާއެވެ.
