ބޮރޫޝިއާ ޑޯޓްމުންޑް ބަލިކޮށް ބަޔާން މިއުނިކުން ޖަރުމަން ސުޕަ ކަޕް ކާމިޔާބުކޮށްފިއެވެ.

ޖަރުމަން ސުޕަ ކަޕާއެކު ބަޔާނުން މި ސީޒަނުގައި މިހާތަނަށް ދެ ތަށި ވަނީ ކާމިޔާބުކޮށްފައެވެ. އެ ޓީމުން ވަނީ ދާދި ފަހުން ޔޫރަޕުގެ ސީޒަން ހުޅުވާ މެޗު ކަމަށްވާ ޔުއެފާ ސުޕަ ކަޕުވެސް ކާމިޔާބުކޮށްފައެވެ.

އަދި ޖަރުމަން ސުޕަ ކަޕަކީ ބަޔާނުގެ ކޯޗުގެ މަގާމާ މިދިޔަ އަހަރުގެ ޑިސެމްބަރު މަހު ހަވާލުވި ހަންސީ ފްލިކުގެ ފަސްވަނަ ކާމިޔާބީއެވެ. އެގޮތުން ބަޔާނުން ވަނީ މިދިޔަ ސީޒަނުގެ ޖަރުމަން ލީގާއި، ޔުއެފާ ޗެމްޕިއަންސް ލީގު އަދި ޖަރުމަން ކަޕުވެސް ކާމިޔާބުކޮށްފައެވެ.

އަލިއަންޒް އެރީނާގައި ބުދަ ދުވަހުގެރޭ ކުޅުނު މެޗުން ޑޯޓްމުންޑުގެ މައްޗަށް ބަޔާން ކުރިހޯދީ 3-2 ގެ ނަތީޖާއަކުންނެވެ.

މި މެޗު ފަށައިގެން 18 ވަނަ މިނެޓުގައި ބަޔާނުން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ކޮރެންޓިން ޓޮލީސޯއެވެ. އަދި މެޗުގެ 32 ވަނަ މިނެޓުގައި ތޯމަސް މުލާ ވަނީ ބަޔާނަށް ލީޑު ފުޅާކޮށްދީފައެވެ.

ބަޔާނުން މެޗުގައި ދެ ލަނޑުގެ ލީޑެއް ނެގި ނަމަވެސް، ޑޯޓްމުންޑުން ވަނީ ފަހަތު އަރައި ނަތީޖާ އެއްވަރުކޮށްފައެވެ. އެގޮތުން ފުރަތަމަ ހާފު ނިމުމުގެ ކުރިން ހޫލިއަން ބްރަންޓް ވަނީ ޑޯޓްމުންޑަށް ފަރަގު ކުޑަކޮށްދީފައެވެ. އަދި ދެވަނަ ހާފު ފަށައިގެން 10 ވަނަ މިނެޓުގައި އާލިން ހާލަންޑް ވަނީ ޑޯޓްމުންޑަށް ނަތީޖާ އެއްވަރުކޮށްދީފައެވެ.

މި މެޗުން ބަޔާން މޮޅުވީ މެޗެ ނިމެން އަށް މިނެޓަށް ވެފައި ވަނިކޮށް ޖޯޝުއާ ކިމިޗް ކާމިޔާބުކުރި ލަނޑުންނެވެ.

ބަޔާނުން މި ސީޒަނުގެ ޖަރުމަން ސުޕަ ކަޕް ކާމިޔާބުކުރިއިރު، ފްލިކުގެ އިރުޝާދުގެ ދަށުން އެ ޓީމުން އަންނަނީ ތަފާތު މޮޅު ކުޅުމެއް ދައްކަމުންނެވެ. އެގޮތުން ޔޫރަޕުގެ ވަރުގަދަ ފަސް ލީގުގެ ތެރެއިން ޖެހިޖެހިގެން އެންމެ ގިނަ މެޗުން މޮޅުވުމުގެ ރިކޯޑު އޮތް ބަޔާން ވަނީ މެޗަކުން ބަލިނުވެ 32 މެޗު ހަމަކޮށްފައެވެ. ބަޔާނުގެ މި ރިކޯޑަށް ނިމުން އައީ ޖަރުމަން ސުޕަ ކަޕުގެ ކުރިން ޖަރުމަން ލީގުގައި މިދިޔަ އާދީއްތަ ދުވަހުގެރޭ ހޮފެންހައިމް އަތުން ބަލިވުމުންނެވެ.