އޭލެވެލް އިމްތިހާން ހަދާ ކުދިންނަށް މިނިސްޓަރުގެ އިލްތިމާސް: ކޮންޓްރޯލްގައި އޮތީ އިމްތިހާނަށް ތައްޔާރުވުން، އެކަމާމެދު ވިސްނާ ރަނގަޅަށް ތައްޔާރުވޭ
އެންމެ މުހިންމު ކަމަކީ ތިމާގެ އިޚުތިޔާރުގައިނެތް ކަމަކަށް ހާސްވެ ކަންބޮޑުނުވުން ކަމަށް މިނިސްޓަރ ވިދާޅުވި
އެޑިޔުކޭޝަން މިނިސްޓަރ ޑރ އައިޝަތު އަލީ އެޗްއީއޯސީގެ ނޫސްވެރިންގެ ބައްދަލުވުމުގައި ވާހަކަދައްކަވަނީ
އަންނަ ހަފްތާގެ ހޯމަ ދުވަހު އޭއެސްލެވެލް އިމްތިހާން އޮންނައިރު އެއިމްތިހާންގައި ބައިވެރިވާ ކުދިންނަށް އެޑިޔުކޭޝަން މިނިސްޓަރ ޑރ އައިޝަތު އަލީ އެކުދިން ހާސްވެ ކަންބޮޑުނުވުމަށް ވިދާޅުވެ ޚާއްސަ މެސެޖެއް ދެއްވައިފި އެވެ.
ބުދަ ދުވަހުގެ ރޭ ހެލްތު އިމަރޖެންސީ އޮޕަރޭޝަން ސެންޓަރ (އެޗްއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި އެޑިޔުކޭޝަން މިނިސްޓަރ އިމްތިހާން ހެދުމަށް ތައްޔާރުވަމުންދާ ކުދިންނަށް ވިދާޅުވީ އާންމުކޮށް ވެސް އިމްތިހާނަކަށް ތައްޔާރުވުމަކީ ދަރިވަރުން ހާސްވެ ކަންބޮޑުވާ ކަމެއްކަމަށެވެ. އަދި ވަކިން ޚާއްސަކޮށް މިފަހަރު ޕެންޑަމިކެއްގެ ތެރެއިން ކުދިން އިމްތިހާން ހަދާއިރު އެކަމުގެ ސަބަބުން ކުދިންނަށް ކުރިމަތިވާ ޕްރެޝަރާއި ކަންބޮޑުވުންތައް ހުންނާނެ ކަމަށް މިނިސްޓަރ ވިދާޅުވި އެވެ. އެހެންނަމަވެސް އެއީ އާންމު ކަމެއްގެ ގޮތުގައި ނެގުމަށް މިނިސްޓަރ ކުދިންގެ ކިބައިން އެދިވަޑައިގެންނެވި އެވެ.
އިމްތިހާން ހަދާ ދަރިވަރުންނެކޭ އެއްފަދައިން އެހެން ދަރިވަރުންނާއި ބެލެނިވެރިން އަދި ޓީޗަރުންގެ ތެރޭގައި ވެސް މިކަމުގެ ހާސްވުންތަކާއި ކަންބޮޑުވުންތައް އެބައޮތް ކަމަށް މިނިސްޓަރ ވިދާޅުވި އެވެ. މިކަންކަމުން ސަލާމަތްވުމަށް ކުރެވޭނެ އެންމެ މުހިންމު ކަމަކީ ތިމާގެ އިޚުތިޔާރުގައި ނެތް ކަމަކަށް ހާސްވެ ކަންބޮޑުނުވުން ކަމަށް މިނިސްޓަރ ވިދާޅުވި އެވެ.
މިނިސްޓަރ ވިދާޅުވީ އިމްތިހާން ހަދާއިރު މިފަހަރު ކުދިންނަށް ޕީޕީއީ ލައިގެން ތިބި އިންވިޖިލޭޓަރުން ފެންނާނެ ކަމަށާއި ކުރީގައި އިމްތިހާން ހޯލަކުން ނުފެންނަ ކަންކަން މިފަހަރު ފެންނާނެ ކަމަށެވެ. އެހެންނަމަވެސް އެ ފިޔަވަޅުތައް އަޅާފައިވަނީ ކުދިންގެ ސަލާމަތާއި ރައްކާތެރިކަމަށްޓަކައި ކަމަށް މިނިސްޓަރ ވިދާޅުވި އެވެ.
މިނިސްޓަރ ވަނީ ދަރިވަރުން ސްޓްރެސްގެ ތެރެއަށް ވައްޓާނުލުމަށް ބެލެނިވެރިން ކިބައިން ވެސް އެދިވަޑައިގަންފައެވެ. އެގޮތުން އެކުދިން ހާސްވެ ކަންބޮޑުވާފަދަ ކަންކަން ނުކުރުމަށް މިނިސްޓަރ އެދިވަޑައިގެންނެވި އެވެ. އެކުދިންނަށް މިހާލަތުގައި އެހީތެރިވުމަށް މިނިސްޓަރ އެދިވަޑައިގެންނެވި އެވެ.
ކޮވިޑް-19 އާ ގުޅިގެން ބައިނަލްއަގްވާމީ ގޮތުން ބާއްވާ ބޮޑެތި އިމްތިހާންތައް ވަނީ އަންނަ އަހަރަށް ފަސްކޮށްފައެވެ. އޭއެސްލެވެލް އިމްތިހާން ބޭއްވުމަށް އެޑިޔުކޭޝަން ނިންމިއިރު އިމްތިހާން ކުރިޔަށްދާ ހޯލްގައި ކަންކަން ކުރިޔަށްދާނެ ގޮތުގެ އެސްއޯޕީތަކެއް އެޑިޔުކޭޝަން މިނިސްޓްރީން ވަނީ އެކުލަވާލާފައެވެ. އަދި ކަރަންޓީނުވާންޖެހޭ ކުދިންނަށް ކޮވިޑް-19 އަށް ޕޮޒިޓިވްވެފައިވާ ދަރިވަރުންނަށް ވަކިން އިމްތިހާން ހެދޭނެ އިންތިޒާމު މިނިސްޓްރީން ވަނީ ހަމަޖައްސާފައެވެ.
