މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީގެ) 2019 ވަނަ އަހަރުގެ ޙިއްސާގެ ފައިދާ އަންނަ އާދިއްތަ ދުވަހުން ފެށިގެން ބަހަން ނިންމައިފިއެވެ.

ބުދަ ދުވަހު އެމްޓީސީސީން ނެރުނު އިއުލާނެއްގައި ބުނީ، 04 އޮކްޓޯބަރ 2020 ވާ އާދިއްތަ ދުވަހުން ފެށިގެން ހިއްސާގެ ފައިދާ ދޫކުރަމަށް ހަމަޖެހިފައިވާ ކަމަށެވެ. މިފަހުން ވަރޗުއަލްކޮށް ބޭއްވި އެ ކުންފުނީގެ އަހަރީ އާންމު ޖަލްސާގައި ކަނޑައަޅާފައިވަނީ، 2019 ވަނަ އަހަރުގެ ފައިދާއިން ހިއްސާއަކަށް ދެ ރުފިޔާ ދޫކުރުމަށެވެ.

އެމްޓީސީސީން ވަނީ ހިއްސާގެ ފައިދާއަށް އެދި ހުށައަޅަން ބޭނުންވާ ފަރާތްތަކުން އެ ކުންފުނީގެ "ބޭންކަށް ޙިއްޞާގެ ފައިދާ ޖަމާކުރުމަށްއެދޭ ފޯމް" ފުރުމަށްފަހު ފޯމާއިއެކު، ފޯމުގައި ބަޔާންކޮށްފައިވާ ލިޔެކިޔުންތައް ކުންފުނީގެ އީމެއިލް ([email protected]) މެދުވެރިކޮށް ހުށައެޅުމަށް އެދިފައެވެ. އެގޮތުން ހުށައެޅުންތައް ލިބުމުން އެފަރާތްތަކުގެ ހިއްސާގެ ފައިދާ ބޭންކު އެކައުންޓަށް ޖަމާކުރެވޭނެކަމަށް އެމްޓީސީސީން ވަނީ ބުނެފައެވެ.

2019 ވަނަ އަހަރު އެމްޓީސީސީ އަށް ސާފު ފައިދާގެ ގޮތުގައި 53.3 މިލިއަން ރުފިޔާ ވަނީ ލިބިފައެވެ. މިއީ 2018 ވަނަ އަހަރު ސާފު ފައިދާގެ ގޮތުގައި ލިބުނު 34،2 މިލިއަން ރުފިޔާއަށްވުރެ 55.5 ޕަސެންޓު އިތުރު އަދަދެކެވެ.