މައުލޫމާތު ހިފެހެއްޓުމުގެ ވިސްނުމެއް ފުލުހުންގެ ނެތް: އިންފޮމޭޝަން ކޮމިޝަނަރ

ފުލުހުންގެ މުއައްސަސާއިން މައުލޫމާތު ހިފެހެއްޓުމުގެ ވިސްނުމެއް ނެތް ކަމަށާއި ވިސްނުން ހުރީ ކަންކަން ރަނގަޅުކޮށް މަހޯލި ދާއިރާ ތަރައްޤީ ކުރުމަށް ކަމަށް އިންފޮމޭޝަން ކޮމިޝަނަރ ހުސައިން ފިޔާޒް މޫސާ ވިދާޅުވެއްޖެ އެވެ.

މައުލޫމާތު ހޯދައި ލިބިގަތުމުގެ ޙައްޤުގެ ޤާނޫނު (މަހޯލި ޤާނޫނު) ތަންފީޒުކުރުމަށް ދެ މުއައްސަސާ ގުޅިގެން ކުރެވޭނެ މަސައްކަތްތަކާ ގުޅޭގޮތުންނާއި، ފުލުހުންގެ މުއައްސަސާއިން ރަނގަޅު ކުރަން ޖެހޭ ކަމަށް ފެންނަ މުހިންމުކަންކަމާ ގުޅޭ ގޮތުން ފިޔާޒު ވަނީ އަންގާރަ ދުވަހު ޕޮލިސް ކޮމިޝަނަރު މުޙައްމަދު ހަމީދުއާ ބައްދަލު ކުރައްވާ މަޝްވަރާ ކުރައްވާފައެވެ.

ޝަހީދު ހުސައިން އާދަމް ބިލްޑިންގގައި ބޭއްވި މި ބައްދަލުވުމުގައި އިންފޮމޭޝަން ކޮމިޝަނަރު ވިދާޅުވީ، ދައުލަތުގެ އިދާރާއަކުން މައުލޫމާތު ހޯދައި ލިބިގަތުމުގެ ޙައްޤުގެ ޤާނޫނާ އެއްގޮތަށް އަމަލުނުކުރުމުން އެ މައްސަލަ ޕޮލިހަށް ފޮނުވަން ޖެހޭ މަރުހަލާއެއް ޤާނޫނުގައި އޮތް ކަމަށާއި، އެފަދަ މައްސަލަތަކަށް ވަރަށް ބޮޑު ސަމާލުކަމެއް ދެއްވައި، އަވަހަށް ނިންމަވައި ދެއްވުމަކީ މުހިންމު ކަމެއް ކަމަށެވެ.

މިހާރު ވެސް ރައްޔިތުންނާ ގުޅޭ ވަރަށް ގިނަ މައުލޫމާތުތަކެއް އަމިއްލަ އިސްނެގުމަށް ފުލުހުން ހާމަކުރާ ކަމަށާއި، ހާއްސަކޮށް ކޮވިޑް 19 ގެ ބަލިމަޑުކަމުގެ ތެރޭގައި ފުލުހުންގެ ގިނަ ޚިދުމަތްތަކެއް އޮންލައިންކޮށް ލިބޭނެ ގޮތަށް ބަދަލު ކުރުމާއި، އެކަމުގެ މައުލޫމާތު ރައްޔިތުންނަށް ދެމުން ދިޔަކަން ފާހަގަ ކުރެވުނު ކަމަށް އިންފޮމޭޝަން ކޮމިޝަނަރު ވިދާޅުވި އެވެ.

ފުލުހުންގެ ޤާނޫނާއި ގަވާއިދުތަކުގެ އިތުރުން، ގައިޑްލައިންތައް ނުވަތަ ކަންކަމުގައި އަމަލު ކުރާނެ ގޮތުގެ އުސޫލުތައް ރައްޔިތުންނަށް ހާމަކޮށްފައި ހުރުމަކީ މުހިންމު ކަމެއް ކަމަށާއި، މައުލޫމާތު ހާމަ ކުރުމަކީ، ހިންގުން ހަރުދަނާވެ، ރައްޔިތުންގެ އިތުބާރު ބޮޑުވެގެންދާނެ ކަމެއް ކަމަށް ވެސް އިންފޮމޭޝަން ކޮމިޝަނަރު ފާހަގަކުރެއްވިއެވެ.

މީގެ އިތުރުން މަހޯލި ޤާނޫނަށް ފުލުހުން އިތުރަށް އަހްލުވެރި ކުރުވުމުގެ މުހިންމުކަމާ ގުޅޭ ގޮތުން ވެސް ބައްދަލުވުމުގައި މަޝްވަރާ ކުރެއްވެވިއެވެ. އަދި އިންފޮމޭޝަން ކޮމިޝަނަރަކީ ކުރިން ގިނަ ދުވަސްތަކެއް ވަންދެން ނޫސްވެރިއެއްގެ ގޮތުގައި މަސައްކަތް ކުރެއްވި ބޭފުޅެއް ކަމަށް ވާތީ، މީޑިއާތަކަށް ފުލުހުންގެ ފަރާތުން މައުލޫމާތު ލިބުމުގައި ދަތިތައް ކުރިމަތިވާކަމުގެ ކަންބޮޑުވުން ނޫސްވެރިން ހިއްސާ ކުރައްވާފައިވާ ކަމަށް އިންފޮމޭޝަން ކޮމިޝަނަރު ވިދާޅުވިއެވެ.

ޕޮލިސް ކޮމިޝަނަރު ވިދާޅުވީ މަޢުލޫމާތު ހޯދައި ލިބިގަތުމުގެ ހައްޤުގެ ދާއިރާއިން ފުލުހުންގެ މުއައްސަސާ މިހާރަށް ވުރެ ވެސް ރަނގަޅު ކުރައްވަން މަސައްކަތް ކުރައްވާނެ ކަމަށާއި، މައުލޫމާތު ނުދީ ހިފެހެއްޓުމަކީ ފުލުހުންގެ ސިޔާސަތެއް ނޫން ކަމަށާއި، މީޑިއާތަކާއެކު ވީހާވެސް ގާތްކޮށް މަސައްކަތް ކުރެއްވުމަކީ ސިޔާސަތު ކަމަށެވެ.