ކޮވިޑްގެ ސަބަބުން ބްރެޒިލްގައި ފާއިތުވި 24 ގަޑީއިރު ތެރޭގައި 317 މަރު
29 ސެޕްޓެމްބަރު 2020 | އަންގާރަ 06:57މިއީ ދުނިޔެއިން ތިންވަނަ އަށް އެންމެ ގިނަ ބަޔަކު ޕޮޒިޓިވްވި ގައުމު
މި ބަލީގައި މަރުވާ މީހުންގެ އަދަދަށް ހިފެހެއްޓުމެއް ނާދޭ
ކޮވިޑް-19ގެ ސަބަބުން ބްރެޒިލްގައި ފާއިތުވި 24 ގަޑީއިރު ތެރޭގައި 317 މީހުން މަރުވެފައިވާކަމަށް ރިޕޯޓުތަކުން ދައްކައިފިއެވެ.
ބްރެޒިލްގެ އެންމެ އާބާދީ ބޮޑު އެއް ސްޓޭޓް ކަމަށްވާ ސާއޯ ޕައުލޯ އަކީ މިހާތަނަށް އެގައުމުން ކޮވިޑް-19 އެންމެ ގިނައިން ފެނިފައިވާ ސްޓޭޓެވެ. ބްރެޒިލް އަކީ ދުނިޔެއިން މި ބަލި އެންމެ ހަލުވި މިނެއްގައި ފެތުރެމުން އަންނަ އެއް ގައުމަށްވާއިރު، މިބަލީގެ ސަބަބުން މަރުވާ މީހުންގެ އަދަދުވެސް ދަނީ އެ ގައުމުގައި އިތުރު ވަމުންނެވެ.
ބްރެޒިލްގެ ހެލްތް މިނިސްޓްރީއިން ބުނެފައިވަނީ މިހާރު އެގައުމުގައި ކޮވިޑް-19 ގެ ސަބަބުން މަރުވެފައިވާ މީހުންގެ އަދަދު 142،058 އަށް އަރާފައިވާ ކަމަށެވެ. އަދި ގާތްގަނޑަކަށް 13،155 އާ ކޭސްތަކެއް ރިޕޯޓު ކޮޮށްފައިވާކަމަށް ވެސް އެ މިނިސްޓްރީއިން ބުނެއެވެ. އެގައުމުގައި ޖުމްލަ މިހާތަނަކަށް 4،745،464 ކޭސް ރިޕޯޓުކޮށްފައި ވެއެވެ.
ބްރެޒިލްގެ ހެލްތް މިނިސްޓްރީއިން އިތުރަށް ބުނެފައިވާ ގޮތުގައި، މިވަގުތު ހަ ސްޓޭޓެއްގައި ކޮވިޑް-19 ގެ ސަބަބުން މަރުވާ މީހުންގެ އަދަދު ދަނީ އިތުރު ވަމުންނެވެ. އަދި ދިހަ ގައުމެއްގައި އާ ކޭސްތައް ރިޕޯޓު ކުރާ މިންވަރު މަދުވަމުން ދާކަމަށާއި އެގާރަ ސްޓޭޓެއް މިހާރު ވަނީ ސްޓޭބަލް ހާލަތުގައި ކަމަށްވެސް އެ މިނިސްޓްރީއިން ވަނީ ބުނެފައެވެ.
