އައްޑޫ ބިޔުރޯ

މައުލޫމާތު ހޯދާ ލިބިގަތުމުގެ ޙައްޤުގެ ދުވަހެއް ފާހަގަކުރަމުންދާއިރު ސުވާލުކުރާ ރައްޔިތުން ނެތި ނަޒާހަތްތެރި ދައުލަތެއް ނުއުފެދޭނެ ކަމަށް އިންފޮމޭޝަން ކޮމިޝަނަރ ހުސެއިން ފިޔާޒް މޫސާ ވިދާޅުވެއްޖެއެވެ.

ބައިނަލްއަޤްވާމީގޮތުން ފާހަގަކުރާ މައުލޫމާތު ހޯދާ ލިބިގަތުމުގެ ހައްގުގެ ދުވަހުގެ މުނާސަތުގައި ބޭއްވި ޖަލްސާގެ ތެރެއިން ވާހަކަދައްކަވަމުން ފިޔާޒް ވިދާޅުވީ މައުލޫމާތުހޯދާ ލިބިގަތުމުގެ ޙައްޤުގެ ޤާނޫނަކީ މިސަރަހައްދަށް ބަލާއިރު ހެދިފައިވާ ޤާނޫނު ތެރެއިން އެންމެ ބާރުގަދަ އެއް ޤާނޫނު ކަމަށާއި އެހެންނަމަވެސް މިޤާނޫނުގެ އެންމެ ފުރިހަމަ މަންފާ ކުރާނީ ސުވާލުކުރާ، ސުވާލު އުފައްދާ ރައްޔިތުންތަކެއް އުފެދިގެން ކަމަށެވެ.

ރައްޔިތުންގެ ހައްގަކީ ކުޅޭކުޅޭ އެއްޗެއް ނޫންކަމަށް ވިދާޅުވެ، ރައްޔިތުންނަށް މަޢުލޫމާތު ލިބޭނެ ގޮތްތައް ފަސޭހަކުރަންޖެހޭ ކަމަށެވެ. އަދި ދައުލަތުގެ އިދާރާތަކުގެ ހާމަކަން މިހާރަށް ވުރެ ވެސް ބޮޑުވާންޖެހޭކަމަށެވެ.

ނޫސްވެރިކަމުގެ މިނިވަންކަމާއި، ޚިޔާލުފާޅުކުރުމުގެ މިނިވަންކަމާއި، މަޢުލޫމާތު ހޯދައިލިބިގަތުމުގެ ޙައްޤަކީ ގުޅިލާމެހިފައިވާ ޙައްޤުތަކެއްގެ ގޮތުގައި ސިފަކުރައްވާ ފިޔާޒް ވިދާޅުވީ ދައުލަތުގެ މަޢުލޫމާތުގެ ޙަޤީޤީ މިލްކުވެރިންނަކީ ރައްޔިތުންކަމަށެވެ.

ފިޔާޒް ވިދާޅުވީ ސުވާލުކުރުމާއި މަޢުލޫމާތު ހޯދަން އެދުމަކީ އާދައަކަށް ހަދައިފިނަމަ ދައުލަތެއްގެ ގޮތުގައި ލިބޭނެ އުފާވެރިކަން މާ ބޮޑު ކަމަށެވެ. އަދި ކޮންމެ ފަރުދަކުވެސް ދޮގު މަޢުލޫމާތު ހުއްޓުވުމަށް މަސައްކަތްކުރުން މުހިއްމު ކަމަށެވެ.

ދިވެހިރާއްޖެ އާއި މުޅި ދުނިޔެއަށް ކުރިމަތިވެފައިވާ ކޮވިޑް-19 އަށް އަލިއަޅުއްވާލައްވާ ފިޔާޒް ވަނީ މި ބިރުވެރި ޙާލަތުގައި ވެސް، އެންމެ ބޮޑަށް ފެނިގެންދިޔައީ މައުލޫމާތު ހޯދާލިބިގަތުމުގެ ހުރި މުހިއްމު ކަންތައް ކަމަށެވެ.

ރައްޔިތުންގެ ބައިވެރިވުމާއި އެކު ކަންކަން ނިމިގެންދިޔުން ކަން ފާހަނގަކުރައްވަމުން ފިޔާޒު ވިދާޅުވީ ކޮންމެ އިދާރާއެއްގައިވެސް ތިބީ ރައްޔިތުންނަށް ޙިދުމަތްދޭން ތިބި ފަރާތްތަށް ކަމަށާއި އެކުގައި މަސައްކަތްކޮށްފިނަމަ ހާމަކަން ބޮޑު ދައުލަތެއްގެ ސިފަ ފެނިގެންދާނެ ކަމަށެވެ.