ކުޅުދުއްފުށިން އިތުރު މީހަކު ޕޮޒިޓިވްވެއްޖެ
ކުޅުދުއްފުށިން ޕޮޒިޓިވްވީ ފާޅު ބޯޓު ފަޅުވެރިއަކާއި ކޮންޓެކްޓްވި މީހެއް
ކުޅުދުއްފުށި ރީޖަނަލް ހޮސްޕިޓަލް؛ އެރަށު ހޯމް ކަރަންޓީންގައި ހުރި މީހަކު ވެސް ވަނީ ޕޮޒިޓިވްވެފައި
ކުޅުދުއްފުށި ސިޓީ ފާޅުބޯޓުން ކޮވިޑް-19 އަށް ޕޮޒިޓިވްވި ފަޅުވެރިއާއި ޑައިރެކްޓް ކޮންޓެކްޓްވި މީހަކު ޕޮޒިޓިވްވެއްޖެއެވެ.
ކުޅުދުއްފުށި ސިޓީން ފުރަތަމަ ޕޮޒިޓިވްވީ ފާޅު ބޯޓުގެ ކެޕްޓަނެވެ. އަދި އެ ބޯޓުގެ އިތުރު ދެ ފަޅުވެރިން ކޮވިޑަށް ޕޮޒިޓިވްވެފައިވާ އިރު، އާދީއްތަ ދުވަހު ޕޮޒިޓިވްވީ މީހާއަކީ އެ ބޯޓުގެ ފަޅުވެރިއަކާއި ޑައިރެކްޓް ކޮންޓެކްޓްވުމުގެ ސަބަބުން އެކަހެރިކޮށްފައިވާ މީހެކެވެ. މީގެ އިތުރުން އެ ސިޓީގައި ހޯމް ކަރަންޓީންގައި ހުރި މީހަކު ވެސް ވަނީ ޕޮޒިޓިވްވެފައެވެ. މިއާއެކު ކުޅުދުއްފުށީގައި ކޮވިޑް-19 އަށް ޕޮޒިޓިވްވި މީހުންގެ އަދަދު ވަނީ 5ށް އަރާފައެވެ.
އެޗްޕީއޭގެ މައުލޫމާތުތައް ދައްކާގޮތުން ކުޅުދުއްފުށި ސިޓީގައި މިހާތަނަށް ޕޮޒިޓިވްވި މީހުންގެ ތެރޭގައި ހިމެނެނީ އަލާމާތް ފެނިގެން ޕޮޒިޓިވްވި 3 މީހުންނާއި، ޑައިރެކްޓް ކޮންޓެކްޓްވި މީހަކާއި ކަރަންޓީންގައި ހުރި މީހެކެވެ. ފާޅު ބޯޓު މާލެއިން ފުރައިގެން ހދ. ނޮޅިވަރަމްގައި ބަނދަރުކޮށްފައިވާ އިރު، އެރަށުން ދެ މީހާކާއި ކޮންޓެކްޓް ވެފައިވާތީ އެ ރަށް ވެސް ވަނީ މޮނިޓަރިންގެ ހާލަތަށް ގެނެސްފައެވެ.
ރާއްޖޭގެ 19 ރަށެއްގައި އެކްޓިވް ކޭސްތައް ހިމެނޭ އިރު، މީގެ ތެރޭގައި ހިމެނެނީ 31 ދިވެހިންނާއި 4 ބިދޭސީންނެވެ. 3 ރަށެއް މިވަގުތު ވަނީ މޮނިޓަރިންގެ ހާލަތަށް ގެނެސްފައެވެ. އެއީ ކުޅުދުއްފުށި ސިޓީ އަދި ނޮޅިވަރަމްގެ އިތުރުން ގދ. ހޯނޑެއްދޫއެވެ. އަތޮޅުތެރޭގެ ކޮވިޑް ފެސިލިޓީތަކަށް ބަލާއިރު، ގއ. ވިލިނގިލި ކޮވިޑް ފެސިލިޓީގައި 8 މީހަކަށް އަންނަނީ ފަރުވާ ދެމުންނެވެ.
ކޮވިޑް-19 އަށް އާދީއްތަ ދުވަހު ޕޮޒިޓިވްވެފައި ވަނީ 53 މީހެކެވެ. މިއާއެކު ރާއްޖެއިން މިހާތަނަށް ކޮވިޑް-19 ގެ 10،098 ކޭސް ރިޕޯޓު ކުރެވިފައިވެއެވެ. އަދި 8847 މީހަކު ބަލިން ވަނީ ފަސޭހަވެފައެވެ.
