ހުޅުމާލޭގައި ނުރައްކާތެރި އެކްސިޑެންޓެއް ހިނގައި ޒުވާނަކަށް އަނިޔާވެއްޖެއެވެ.

ފުލުހުން ބުނީ ހުޅުމާލެ ރެޑްވޭވް ޓްރަކްއަކާއި ސައިކަލެއް ޖެހި އެކްސިޑެންޓެއް ހިނގާފައިވާކަމުގެ މައުލޫމާތު އާދިއްތަ ދުވަހުގެ 18:00 ޖެހިއިރު ފުލުހުންނަށް ލިބިފައިވާ ކަމަށެވެ.

މިއެކްސިޑެންޓް ހިނގިއިރު ޓްރަކް ދުއްވަން އިނީ އުމުރުން 30 އަހަރުގެ ބަންގްލަދޭޝް ފިރިހެނެއް ކަމަށާއި، ސައިކަލު ދުއްވަން އިނީ 22 އަހަރުގެ ދިވެހި ފިރިހެނެއް ކަމަށެވެ. އަދި މިއެކްސިޑެންޓްގައި ސައިކަލް ދުއްވި މީހާއަށް އެކިވަރުގެ އަނިޔާ ލިބިފައިވާތީ އެމީހާ ފުލުހުންގެ އެހީތެރިކަމާއެކު ހޮސްޕިޓަލަށް ގެންގޮސްފައިވާ ކަމަށް ފުލުހުން ބުނެއެވެ.

މީގެ އިތުރުން ފުލުހުން ބުނީ މި ދެމީހުންގެ އަތުގައި ވެސް ލައިސެންސް ނެތް ކަމަށެވެ.

އެކްސިޑެންޓްއާ ގުޅިގެން 22 އަހަރުގެ ޒުވާނާ ހޮސްޕިޓަލަށް ގެންގޮސްފައިވާއިރު، އޭނާއަށް ލިބުނު އަނިޔާގެ ތަފްސީލެއް ފުލުހުން ހާމައެއް ނުކުރެއެވެ. ނަމަވެސް ފޮޓޯއިން ފެންނަ ގޮތުގައި އޭނާ ދުއްވި ސައިކަލަށް ވަނީ ވަރަށް ބޮޑެތި ގެއްލުންތަކެއް ވެފައެވެ.

މި އެކްސިޑެންޓާ ގުޅިގެން ބަލަން ޖެހޭ ކަންކަން ފުލުހުން ދަނީ ބަލަމުންނެވެ.