ދިޔަރެސް ނޫހުގައި ލިޔެފައިވާ ހަބަރުގައި ހަގީގަތެއް ނެތް: އެޑިއުކޭޝަން މިނިސްޓްރީ
ދިޔަރެސް ނޫހުގައި ލިޔެފައިވަނީ ދޮގު މައުލޫމާތު
އެޑިޔުކޭޝަން މިނިސްޓްރީގެ އިސްވެރިން ބާއްވަވާ ބައްދަލުވުމެއްގެ ތެރެއިން
"އެޑިޔުކޭޝަން މިނިސްޓްރީގެ ބިޑު ކޮމިޓީ އުވާލުން، ހުޅުމާލެ ޕްރީސްކޫލާއި ގުޅިފައި" ސުރުހީގެ ދަށުން އޮންލައިން ނޫސް ދިޔަރެސްގައި ލިޔެފައިވާ ޚަބަރަކީ އެއްވެސް ހަގީގަތެއް ނެތް ދޮގު މައުލޫމާތުގެ މައްޗަށް ބިނާކޮށް ލިޔެފައިވާ ޚަބަރެއް ކަމަށް އެޑިޔުކޭޝަން މިނިސްޓްރީން ބުނެފިއެވެ.
މިކަން ކުށްވެރިކޮށް އެޑިޔުކޭޝަން މިނިސްޓްރީން ނެރުނު ނޫސް ބަޔާނެއްގައި ބުނެފައިވަނީ ދިޔަރެސް ނޫހުގެ ލިޔުމަކީ ސީދާ އެ މިނިސްޓްރީއާ ގުޅުންހުރި ލިޔުމަކަށްވީ ނަމަވެސް މައުލޫމާތުގެ ތެދު ދޮގު އޮޅުން ފިލުވުމަށް އެ މިނިސްޓްރީ އަށް ދިޔަރެސް ނޫހުން ގުޅާފައި ވެސް ނުވާ ކަމަށެވެ.
އިތުރަށް ބުނެފައިވަނީ މިއަހަރުގެ ފެބްރުއަރީ މަހުގެ 18 ވަނަ ދުވަހު މިނިސްޓްރީގެ ބިޑު ކޮމިޓީ އަލުން އެކުލަވާލާފައި ވަނީ ކުރިން މަސައްކަތް ކުރަމުން ދިޔަ ބިޑު ކޮމިޓީގެ ދައުރު ހަމަވެގެން ކަމަށެވެ. އަދި އައު ބިޑު ކޮމިޓީ އެކުލަވާލާފައި ވާނީ އެކަމާ ގުޅިގެން ހެދިފައި ހުރި ގަވާއިދާއި އުސޫލުތަކާ އެއްގޮތަށް ކަމަށެވެ. މީގެ އިތުރުން މިނިސްޓްރީން ބުނީ ޚަބަރު ފެތުރުމުގައި ވީހާ ވެސް ޒިންމާދާރުކަން އިސްކޮށް، ސައްހަ މައުލޫމާތު ހިމަނައިގެން ރައްޔިތުންނާ ހަމައަށް ހަބަރު ގެނެސްދިނުމަށް އެދޭ ކަމަށެވެ.
އެޑިޔުކޭޝަން މިނިސްޓްރީއާ ގުޅޭގޮތުން ދިޔަރެސް ނޫހުން ދޮގު މައުލޫމާތު ހިމަނައިގެން ޚަބަރެއް ޝާއިއު ކޮށްފައިވާއިރު އެ ނޫހުން ވަނީ މިހާރު އެ ޚަބަރު ވެބްސައިޓުން ފޮހެލާފައެވެ.
