އަމާޒަކީ، ރާއްޖޭގެ ފަތުރުވެރިކަމުގެ ވެރިންނަކީ ދިވެހިންނަށް ހެދުން: ޑރ. މައުސޫމް

ރާއްޖޭގެ ފަތުރުވެރިކަމުގެ ވެރިންނަކީ ދިވެހިން ކަމުގައި ހެދުމަކީ ފަތުރުވެރިކަމުގެ އެންމެ ބޮޑު އެއް އަމާޒު ކަމަށް ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.

ދުނިޔޭގެ ފަތުރުވެރިކަމުގެ ދުވަހާއި ގުޅިގެން ރާއްޖެޓީވީގެ "ފަށާއިރު" ޕްރޮގްރާމްގައި ވާހަކަފުޅު ދައްކަވަމުން މިނިސްޓަރ މައުސޫމް ވިދާޅުވީ މިއަދުވެސް ފަތުރުވެރިކަމުގެ ދާއިރާގެ އިސް ސަފުގައި ގިނަ ދިވެހިން އެބަތިބި ކަމަށާއި އެހެންނަމަވެސް އަމާޒަކީ މިދާއިރާއާއި ގުޅުންހުރި ހުރިހާ ތަނެއްގެ ހިންގުމުގައި ދިވެހިން ތިބުން ކަމަށެވެ.

Advertisement

އެގޮތުން ސަފާރީތަކާއި، ރެސްޓޯރަންޓްތަކާއި، ގެސްޓްހައުސްތަކާއި، ރިސޯޓްތަކުގެ ހިންގުމުގައި ދިވެހިން ތިބެން ޖެހޭ ކަމަށާއި އަދި އެފުރުޞަތުތައް ދިވެހިންނަށް މަގުފަހިކޮށްދިނުމަށް ބޭނުންފުޅުވެލައްވާ ކަމަށް މިނިސްޓަރ ވިދާޅުވިއެވެ.

އަދި ކެރިގެން މިކަމަށް ކުރިމަތިލައިގެން ތިބި ކުދިންނަކީ ތަޖްރިބާގެ ގޮތުގައި ވަރަށް މޮޅެތި ކުދިންކަން ފާހަގަކުރައްވަމުން މިނިސްޓަރ ވިދާޅުވީ މިފަދަ ކުދިންނަށް އެކަށީގެންވާ ރަނގަޅު ކުއަލިފިކޭޝަންއެއް ލިބޭނެ މަގު ފަހި ކުރުމަށް މިނިސްޓްރީން އިސްނަގައިގެން މިހާރު މަސައްކަތް ކުރަމުންދާ ކަމަށެވެ.

ދިވެހިން އަދާކުރާ ހިތްވާ ބޮޑެތި ވަޒީފާތަކަށް ދިއުމަށް މިނިސްޓަރ ވަނީ ބާރުއަޅުއްވާ ވާހަކަދައްކަވާފައެވެ.

ފަތުރުވެރިކަމުގެ ދުވަހުގެ ޝިއާރު ކަމަށްވާ "ފަތުރުވެރިކަމާއި ރަށްރަށުގެ ތަރައްޤީ" އަކީ ރައީސް ސޯލިޙްގެ ރިޔާސީ ވައުދުތަކާއި ވަރަށް ގުޅޭ ޝިއާރަކަށްވާއިރު މިކަން ހާސިލްކުރެވޭނީ މިދާއިރާއާއި ގުޅުންހުރި ދާއިރާތަކުން ފުރިހަމައަށް މިކަމުގެ ތެރެއަށް ވަދެވިގެން ކަމަށް މިނިސްޓަރ ފާހަގަކުރެއްވިއެވެ.

އެގޮތުން ގެސްޓްހައުސްތަކާއި، ރެސްޓޯރަންޓްތަކާއި، ސަފާރީތަކާއި، ދަނޑުވެރިންނާއި، ފަންނާނުންނާއި އަދި ދާއިރާއާއި ގުޅުން ހުރިހާ އެންމެން ގުޅިގެން މަސައްކަތްކުރުމަކީ ރަށްތަކަށް ވެސް މިކަމުން މަންފާލިބި ފަތުރުވެރިކަން އިތުރު ހަރުފަތަކަށް ގެންދެވޭނެ މަގުފަހިވެގެންދާނެ ކަމެއް ކަމަށް މިނިސްޓަރ ވިދާޅުވިއެވެ.

މުޅި ދުނިޔެ ބަންދުވެފައި އޮތް ދަނޑިވަޅެއްގައި މިދިޔަ ޖުލައި 15ގައި ރާއްޖޭގެ ބޯޑަރުތައް ހުޅުވަން ނިންމި ނިންމެވުމަކީ ރައީސް ސޯލިހު ނިންމެވި ވަރަށް ހިތްވަރުގަދަ ނިންމުމެއް ކަމަށާއި މިފަދަ ނިންމުމެއް ނިންމާފައިވަނީ ވެސް އިންޑަސްޓްރީގެ މީހުންނާއި އެކު ކުރިއަށް ދެވޭނެ ކަމުގެ ޔަޤީންކަން ސަރުކާރަށް އޮތުމުން ކަމަށް މިނިސްޓަރ ވިދާޅުވިއެވެ.

އަދި ބޯޑަރު ހުޅުވާލި ނަމަވެސް ސަރުކާރުން އެންމެ ބޮޑަށް ބަލަނީ ރައްޔިތުންނާއި މުވައްޒަފުންގެ ސަލާމަތާއި ރައްކާތެރިކަން ކަމަށާއި ރާއްޖެ މިއޮތީ ފަތުރުވެރިކަމުގެ ދާއިރާއައިން ދުވަހަކުވެސް ނުދެކޭ ހީނަރުކަމެއްގެ ތެރޭގައި ކަމަށް ވިދާޅުވިއެވެ.

މިކަމުން އަރައިގަތުމުގެ މަސައްކަތް މިއަދު މިއޮތީ މެކެހަށް ޖަހާފައި ކަން ފާހަގަކުރައްވަމުން މިނިސްޓަރ ވިދާޅުވީ ތަފާތު އެތައް ގައުމުތަކުން ފަތުރުވެރިން ރާއްޖެ އަންނަ އިރު، ކޮވިޑް ނެގެޓިވް ރިޒަލްޓް އޮތުން ލާޒިމް ކުރުމަކީ އެޅުނު ވަރަށް ރަނގަޅު ފިޔަވަޅެއް ކަމަށެވެ.