ފުލުހުންގެ އިލްތިމާސެއް. ކާފިއު ގަޑީގައި ކަސްރަތު ކްލާސް ބާއްވާނަމަ ފިޔަވަޅު އަޅާނަން!
27 ސެޕްޓެމްބަރު 2020 | އާދީއްތަ 04:02ކާރފިއު އިއުލާންކޮށްފައިވާ ގަޑި ނުޖެހެނީސް ގެއަށް ވަންނަ އާދަކުރަންޖެހޭ
އުސްފަސްގަނޑު ސަރަހައްދުގައި ކަސްރަތު ކުރަނީ، ރޭގަނޑު 10ގެ ފަހުން ބޭރުތެރޭގައި އުޅުމަކީ މަނާކަމެއް
ރޭގަނޑު 10 ގެ ފަހުން ބޭރަށް ނިކުމެ އުޅުން މަނާކޮށްފައި އޮތް ނަމަވެސް، ގިނަ މީހުންނާއި އެކު އެކި ކަހަލަ ކަސްރަތު ކްލާސްތައް ބޭރުގައި ބާއްވާކަން ފާހަގަކުރެވިފައިވާކަމަށް މޯލްޑިވިސް ޕޮލިސް ސާރވިސްއިން ބުނެފިއެވެ.
ހޮނިހިރު ދުވަހުގެ ރޭ އެޗްއީއޯސީގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޗީފް ސުޕްރިންޓެންޑެންޓް އޮފް ޕޮލިސް އަބްދުﷲ ޝަރީފް ވިދާޅުވީ، ކާފިއު ގަޑީގައި ބޭރަށް ނިކުމެ އުޅެގެން ހިންގާ އެއްވެސް ހަރަކާތެއް ހިންގުމުގެ ފުރުސަތެއް ނުދެވޭނެ ކަމަށެވެ.
ކާފިއު އިއުލާންކޮށްފައިވާ ގަޑި ނުޖެހެނީސް ގެއަށް ވަންނަ އާދަކުރަންޖެހޭކަން އާންމުންނަށް ހަނދުމަކޮށްދެމުން ޝަރީފް ވަނީ ގަވާއިދާ ޙިލާފު ވެގެން މަގުމަތިން ޖޫރީމަނާ ކުރަން ޖެހިއްޖެ ހާލަތެއްގައި އެކަންވެސް ކުރާނެކަމަށް ވިދާޅުވެފައެވެ.
ބޭރަށް ނިކުމެ އުޅޭ ގަޑިތަކުގައި ހިންގާ ކަސްރަތު ކްލާސްތަކާ ގުޅޭގޮތުން އިތުރަށް ވާހަކަ ދައްކަވަމުން ވިދާޅުވީ، ހުސްބިންތަކުގައި ކަސްރަތު ކްލާސްތަކާއި، ސެލްފް ޑިފެންސް ކްލާސްތަކުގެ އިތުރުން، ސިވިމިންގ ކްލާސްތައް ގިނަ މީހުން ބައިވެރިކޮށް ހިންގާކަން ފުލުހުންނަށް ފާހަގަކުރެވިފައިވާ ކަމަށެވެ. ފުލުހުން ވަނީ ތަކުރާރުކޮށް އެޗްޕީއޭގެ އުސޫލާއި އެއްގޮތަށް އަމަލުކުރުމަށް އިލްތިމާސްކޮށް ހިލާފުވާނަމަ ޖޫރީމަނާ ކުރާނެކަމަށް އިލްތިމާސްކޮށްފައެވެ.
ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާން ޑރ. ނަޒްލާ ރަފީގް ކޭސްތައް މިދުވަސްވަރު މަދުވިކަމުގައިވިޔަސް، 5 މީހުންނަށް ވުރެން ގިނަ މީހުން އެއްކޮށް ބޭރަށް ނިކުމެ ތަންތަނަށް އެއްވުމަކީ މަނާކަމެއް ކަމަށެވެ.
އެގޮތުން ގިނަ މީހުން އެއްވެ އުޅުމަކީ ބައްޔަށް ގިނަ މީހުން ހުށަހެޅިގެންދާ ކަމެއްކަމަށެވެ. ހާއްސަކޮށް ކަސްރަތު ކުރާއިރު މާސްކު ނާޅާ ކަމަށާއި، އޭގެ ސަބަބުން ހަށިގަނޑުގައި ވައިރަސް ހުރިނަމަ އާންމުކޮށް އުޅޭއިރަށް ވުރެ ބޮޑަށް، ހަށިގަނޑުން ވައިރަސް ބޭރުވެގެންދާނެކަން ފާހަގަކޮށް ދާނެ ކަމަށް ފާހަގަކުރެއްވިއެވެ. އަދި މިއާ ވިދިގެން، ބަލި ފެތުރުމުގެ ފުރުސަތު ބޮޑުކަމަށް ޑރ. ނަޒްލާ ފާހަގަކުރެއްވިއެވެ.
