އިންޑިއާ އާއި ލަންކާ އާއި ދެމެދު އެއަރ ބަބުލްއެއް ގާއިމްކުރުމުގެ މަޝްވަރާތައް ދެ ގައުމުގެ ބޮޑުވަޒީރުން ކުރައްވައިފިއެވެ.
އިންޑިއާގެ ބޮޑުވަޒީރު ނަރެންދުރަ މޯދީ އާއި ލަންކާގެ ބޮޑުވަޒީރު މަހިންދަ ރާޖަޕަކްސަ ހޮނިހިރު ދުވަހު ބޭއްވި ވާޗުއަލް ބައްދަލުވުމެއްގައި ދެގައުމުގެ ގިނަ ކަންތައްތަކާއި ގުޅޭ ގޮތުން މަޝްވަރާކޮށްފައިވާ ކަމަށް ދެގައުމުގެ ނޫސްތަކުގައިވެއެވެ. އެގޮތުން އިންޑިއާ އާއި ލަންކާ އާއި ދެމެދު އޮންނަ ބުދިސްޓު ގުޅުން ބަދަހިކުރުމަށް އިންޑިއާ އިން ލަންކާއަށް 15 މިލިއަން ޑޮލަރުގެ އެހީއެއް ދިނުމަށް ނިންމާފައިވާ ކަމަށާއި ލަންކާގެ އެދުމުގެ މަތިން އެގައުމަށް 1.1 ބިލިއަން ޑޮލަރުގެ ބައިލެޓެރަލް ކަރަންސީ ސްވޮޕެއް ދިނުމުގެ މަޝްވަރާތައް ކުރަމުން ގެންދާ ކަމަށްވެސް ހަބަރުތަކުގައިވެއެވެ.
މީގެ އިތުރުން، ލަންކާއިން ނަގާފައިވާ ލޯނުތައް ޑިފަރ ކުރުމުގެ މަޝްވަރާތައްވެސް ދެގައުމުގެ ބޮޑުވަޒީރުން ވަނީ ކުރައްވާފައެވެ.
މި ބައްދަލުވުމުގައި ދެ ގައުމުގެ ބޮޑުވަޒީރުން ވަނީ ދެގައުމުގައި އޮންނަ ވިޔަފާރީގެ ގުޅުން އިތުރުކުރުމަށް ގިނަ މަޝްވަރާތެއް ކޮށްފައެވެ. އަދި ލަންކާގެ ބޯޑަރު ހުޅުވާލާއި މިހާރު އެގައުމުން އަޅާފައިވާ ފިޔަވަޅުތަކަށް ލުއިދޭނެ ކަމަށް އުންމީދު ކުރައްވާކަމަށް އިންޑިއާގެ ބޮޑުވަޒީރު ވަނީ ވިދާޅުވެފައެވެ.
