ހިތަދޫ ބާސްކެޓްބޯޅަ ކޯޓު މަރާމާތުކޮށް އަލުން ހުޅުވައިފި
26 ސެޕްޓެމްބަރު 2020 | ހޮނިހިރު 11:17މިއީ ފާއިތިވުދިޔަ 20 އަހަރު ތެރޭ އެ ކޯޓު މަރާމާތު ކުރެވުނު ފުރަތަމަ ފަހަރު
އައްޑޫ ސިޓީ ހިތަދޫ ބާސްކެޓްބޯޅަ ކޯޓު
އައްޑޫ ސިޓީ ހިތަދޫ ބާސްކެޓްބޯޅަ ކޯޓު މަރާމާތު ކުރުމަށްފަހު އަލުން ހުޅުވައިފިއެވެ.
މިއީ ފާއިތިވުދިޔަ 20 އަހަރު ތެރޭ އެ ކޯޓު މަރާމާތު ކުރެވުނު ފުރަތަމަ ފަހަރެވެ. ނުކުޅެވޭ ވަރަށް އެ ކޯޓުގެ ހާލަތު ދަށްވެފައި ވަނިކޮށް، ކޯޓު މަރާމާތުކޮށްފައިވަނީ ހިތަދޫ ޒުވާނުންގެ އިސް ނެގުމަކަށް ކުޅިވަރާ ބެހޭ ވުޒާރާއިންނެވެ.
އެ ކޯޓު މަރާމާތު ކުރުމަށްފަހު އަލުން ހުޅުވުނުކަން ހާމަކުރައްވާ ކުޅިވަރާ ބެހޭ ވަޒީރު އަޙްމަދު މަޙްލޫފް ހުކުރު ދުވަހު ކުރެވި ޓްވީޓެއްގައި ވިދާޅުވީ ހިތަދޫގައި ބާސްކެޓްބޯޅައަށް ލޯބިކުރާ ފަރާތްތަކުގެ ނުހަނު ބޮޑު އެހީތެރިކަމަކާއެކު 20 އަހަރަށްފަހު އެ ކޯޓު އަލުން މަރާމާތު ކުރެވިފައިވާ ކަމަށެވެ. އަދި އެ ކޯޓު މަރާމާތު ކުރުމަށް ބޭނުންވި ކުލަ ސީއެސްއާރުގެ ދަށުން ހަދިޔާކުރީ މާޒިޔާ ޓްރޭޑާސްއިންކަން ވަޒީރު ވަނީ ފާހަގަކުރައްވާފައެވެ.
މީގެ އިތުރުން ކުޅިވަރާ ބެހޭ ވަޒީރު އަޙްމަދު މަޙްލޫފް ވަނީ އައްޑޫ ސިޓީގެ ފެނަކަ ބްރާންޗާއި، އެމްއެންޑީއެފް ސަދަން ރީޖަނުގެ ފަޔާ އެންޑް ރެސްކިއު އަދި ފަރުދީ ގޮތުން އެ މަސައްކަތް ފުރިހަމަކުރުމަށް އެހީތެރިކަން ފޯރުކޮށްދިން ހުރިހާ ފަރާތްތަކަށް ޝުކުރު އަދާކުރައްވާފައެވެ.
ހިތަދޫ ބާސްކެޓްބޯޅަ ކޯޓު އަލުން ހުޅުވުމަށް ހާއްސަ ރަސްމިއްޔަތެއް ބޭއްވިއިރު، ވާޗުއަލްކޮށް ބޭއްވުން ރަސްމިއްޔާތުގައި ވަޒީރު ވަނީ ބައިވެރިވެވަޑައިގެންފައެވެ. އަދި ރަސްމިއްޔާތަށްފަހު ހިތަދޫ ޒުވާނުންގެ މެދުގައި ވަނީ އެކުވެރިކަމުގެ ބާސްކެޓްބޯޅަ މެޗެއް ކުރިއަށް ގެންގޮސްފައެވެ.
ކުޅިވަރާ ބެހޭ ވުޒާރާއިން ހިތަދޫ ބާސްކެޓްބޯޅަ ކޯޓު މަރާމާތު ކުރުމަށްފަހު އަލުން ހުޅުވިއިރު، އެ ވުޒާރާއިން އަންނަނީ ރާއްޖޭގެ އެކި ކަންކޮޅުތަކުގައި ކުޅިވަރު ފެސިލިޓީތައް ގާއިމުކުރުމުގެ މަސައްކަތް ކުރަމުންނެވެ. އެގޮތުން މިހާތަނަށް ކުޅިވަރާ ބެހޭ ވުޒާރާއިން ވަނީ ގިނަ ރަށްތަކެއްގައި ފެންވަރު ރަނގަޅު ޓާފް ފުޓްބޯޅަ ދަނޑު އެޅުމުގެ އިތުރަށް، ފުޓްސަލް ދަނޑުތަކާއި، އައުޓްޑޯ ވޮލީބޯޅަ ކޯޓާއި އިޖުތިމާޢީ މަރުކަޒުތައް ގާއިމުކުރަމުންނެވެ.
