ފީފާއިން ޓްރިނިޑާޑް އެންޑް ޓޮބޭގޯ ސަސްޕެންޑް ކޮށްފި

ޓްރިނިޑާޑް އެންޑް ޓޮބޭގޯ ފުޓްބޯލް އެސޯސިއޭޝަން (ޓީޓީއެފްއޭ) ގެ މައްސަލައެއް އެ ގައުމުގެ ހައި ކޯޓުގައި ކުރިއަށްގެންދާތީ ފުޓްބޯޅައިގެ ހަރަކާތްތަކުން ޓްރިނިޑާޑް އެންޑް ޓޮބޭގޯ ސަސްޕެންޑް ކުރަން ފީފާއިން ނިންމައިފިއެވެ.

ޓީޓީއެފްއޭގެ ރައީސް ވިލިއަމް ވަލަސްގެ ގިނަ މައްސަލަތަކެއް މި އަހަރުގެ ކުރީކޮޅު ފެންމަތިވުމާއެކު ފީފާއިން ވަނީ މާޗު މަހުގެ ތެރޭގައި ޓީޓީއެފްއޭ ހިންގުން ހަރުދަނާކޮށް ފީފާގެ އަސާސީ ގަވާއިދަށް ފެއްތުމުގެ މަސައްކަތް ނޯމަލައިޒޭޝަން ކޮމިޓީއަކާ ހަވާލުކޮށްފައެވެ. އެއާއެކު ޓީޓީއެފްއޭ ހިންގުން ނޯމަލައިޒޭޝަން ކޮމިޓީއާ ހަވާލުކުރަން ޖެހޭ ފަދަ ހާލަތެއް ނެތް ކަމަށް ބުނެ ވަލަސް ވަނީ ޓީޓީއެފްއޭގެ މައްސަލަ ޓްރިނިޑާޑް އެންޑް ޓޮބޭގޯގެ ހައި ކޯޓަށް ވައްދާފައެވެ.

ހުކުރު ދުވަހު ފީފާއިން ނެރުނު ބަޔާނެއްގައި ވަނީ އެ އިދާރާގެ ސްޓެޓިއުޓްސްއާ ޚިލާފުވެފައިވާތީ ފުޓްބޯޅައިގެ ހަރަކާތްތަކުން ޓްރިނިޑާޑް އެންޑް ޓޮބޭގޯ ސަސްޕެންޑް ކުރަން ނިންމިކަން ހާމަކޮށްފައެވެ. އެ އިދާރާގެ ބަޔާނުގައި ބުނެފައިވަނީ ފީފާގެ އެންގުމާ ޚިލާފަށް ޓީޓީއެފްއޭގެ މައްސަލަ އާދައިގެ ކޯޓަކަށް ނުބެލޭނެ ކަމަށާއި، އެހެންކަމުން ޓްރިނިޑާޑް އެންޑް ޓޮބޭގޯ ހައި ކޯޓުގައި ބަލަމުންދާ މައްސަލަ އަނބުރާ ނަގަން މި މަހުގެ 16 ވަނަ ދުވަހުގެ ނިޔަލަށް ޓީޓީއެފްއޭގެ ރައީސް ވަލަސްއަށް ފުރަތަމަ މުހުލަތު ދިން ކަމަށެވެ. އަދި އެ މުހުލަތުގައިވެސް އެކަން ކޮށްފައި ނުވުމާއެކު، ފަހު ފުރުސަތެއްގެ ގޮތުގައި މި މަހުގެ 23 ގެ ނިޔަލަށް މުހުލަތު ދިން ކަމަށާއި، ޓީޓީއެފްއޭ ސަސްޕެންޑް ކުރަން ނިންމީ ފަހުން ދިން މުހުލަތުގައިވެސް މައްސަލަ އަނބުރާ ނަގާފައި ނުވުމުން ކަމަށް ފީފާގެ ބަޔާނުގައި ވަނީ ބުނެފައެވެ.

މި ބަޔާނުގައި ފީފާއިން އިތުރަށް ބުނެފައިވަނީ ޓީޓީއެފްއޭގެ ސަސްޕެންޝަން ނަގައި، ކުރީގެ ހާލަތަށް ދެވެން އޮތީ ނޯމަަލައިިޒޭޝަން ކޮމިޓީގެ ބެލުމުގެ ދަށުގައި އެސޯސިއޭޝަނުގެ ކަންތައްތައް ރަނގަޅުކޮށް، ޓީޓީއެފްއޭގެ އަސާސީ ގަވާއިދު ފީފާގެ އަސާސީ ގަވާއިދާ ފުށުނާރާ ގޮތަށް އެކުލަވާލައި، އެ ފާސްކޮށްގެން ކަމަށެވެ.

މި ސަސްޕެންޝަނާ ގުޅިގެން އަންނަ އޮކްޓޯބަރު މަހުގެ އަށްވަނަ ދުވަހަށް ތާވަލުކޮށްފައިވާ ޓްރިންޑާޑް އެންޑް ޓޮޮބޭގޯގެ ފީފާ ވޯލްޑް ކަޕް ކޮލިފައިންގ މެޗު ނުކުޅެވޭނެއެވެ. އެ ދުވަހު ޓްރިނިޑާޑް އެންޑް ޓޮބޭގޯ ކުޅޭ ގޮތަށް އޮތީ ގުޔާނާއާ ދެކޮޅަށެވެ. އެކަމަކު އަންނަ އަހަރު ބާއްވަން ނިންމާފައިވާ ގޯލްޑް ކަޕްގައި އަދިވެސް ޓްރިނިޑާޑް އެންޑް ޓޮބޭގޯ އޮތީ ހިމަނާފައެވެ. އެ ޓީމަށް އެ މުބާރާތުގެ ޖާގަ ގެއްލޭނީ މި އަހަރު ޑިސެމްބަރު މަހުގެ 18 ވަނަ ދުވަހުގެ ކުރިން ފީފާގެ ސަސްޕެންޝަން ނުނަގައިފިނަމައެވެ.