ތިލަދުންމައްޗަކީ ރާއްޖޭގެ އިޤްތިޞާދު ދެގުނައަށް އިތުރުކޮށްދޭން އޮތް ހަމައެކަނި ވަސީލަތް: ގަޕޯ
26 ސެޕްޓެމްބަރު 2020 | ހޮނިހިރު 06:33ކާގޯ ފެރީގެ ޚިދުމަތް ފަށާފައިވަނީ 26 ސެޕްޓެމްބަރގައި
ހަނިމާދޫ ދާއިރާގެ މެމްބަރު އަބްދުލްގަފޫރު މޫސާ (ގަޕޯ)
ތިލަދުންމައްޗަކީ ރާއްޖޭގެ އިޤްތިޞާދު ދެގުނައަށް އިތުރުކޮށްދޭން އޮތް ހަމައެކަނި ވަސީލަތޭ ބުނުމުން ދޮގަކަށް ނުވާނެ ކަމަށް ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރު އަބްދުލްގަފޫރު މޫސާ (ގަޕޯ) ވިދާޅުވެއްޖެއެވެ.
ރާއްޖެޓީވީއަށް ދިން ހާއްސަ އިންޓިވިއުއެއްގައި ގަޕޯ ވިދާޅުވީ ކޮޗިންގެ ފެރީގެ ޚިދުމަތަކީ މިއަދަކު ދެކުނުވުނު ވާހަކައެއް ނޫން ކަމަށާއި މިކަން ހަޤީޤަތަކަށް ހަދައިދިނުމަށް މިސަރުކާރުން ކުރި މަސައްކަތް ފާހަގަކޮށްލެވޭ ކަމަށެވެ.
އެގޮތުން ތިލަދުންމަތީގެ އިޤްތިޞާދު ކުރިއެވުމަށްޓަކައި މިފެށި މަސައްކަތުގެ ތެރެއިން އެންމެ ފާހަގަކޮށްލެވޭ އެއް ކަމަކީ ތިލަދުންމައްޗަކީ ރާއްޖޭގެ އިޤްޞާދު ކުރިއަރުވަން ވަރަށް މުހިއްމު ސަރަހައްދެއް ކަމަށާއި، ތިލަދުންމައްޗަކީ ރާއްޖޭގެ އެންމެ ބޮޑެތި ރަށްތަކާއި، އެންމެ ބޮޑެތި ގޮނޑުދޮއްތައް ހުރިތަން ކަމަށްވެފައި މި ސަރަހައްދަކީ އިޤްތިޞާދީ ހަރަކާތްތައް ހިންގާލެވޭ ވަރުގެ ބޮޑެތި ފަޅުތައް އޮތް ސަރަހައްދެއް ކަމަށްވެސް ގަޕޯ ފާހަގަކުރެއްވިއެވެ.
އެހެންކަމުން ތިލަދުންމަތީގެ މީހުން މާލެ އައިސް މުދާ ގަންނަން ޖެހުމުން ވަރަށް އަގުބޮޑުވާއިރު މުދަލުގެ 100 އިންސައްތަ އަގުބޮޑުކޮށް ތިލަދުންމައްޗާއި ހަމައަށް ފޯރާއިރު، މިއަދު މިފެށި ކާގޯގެ ޚިދުމަތާއި އެކު މިހާރު މޭލެއިން މުދާ ގެންދިއުމުގެ ބަދަލުގައި ތިލަދުންމައްޗަށް މުދާ ގެންދިއުމުން މުދަލުގެ އަގު ހެޔޮވެގެންދާނެ ކަމަށް އޭނާ ވިދާޅުވިއެވެ.
ގަޕޯ އިތުރަށް ވިދާޅުވީ ކާގޯ ފެރީން ސީދާ ވަޒީފާގެ ފުރުޞަތުތެއް ހުޅުވިގެން ނުދިޔަ ނަމަވެސް އިޤްތިޞާދީ ހަރާތްތަކެއް ހިނގަން ފެށުމުން އެހެނިހެން ގިނަ ބައިތައް އިތުރުވެގެން، އެތައް ބައިވަރު ހަރަކާތުން އާމްދަނީ އިތުރުވެގެންދާނަ ކަމަށާއި ދަތުރުފަތުރާއި ތަރައްޤީގެ ވަސީލަތްތައް ފުރިހަމަވެގެން ދިއުމުން އިޤްތިޞާދު ކުރިއަށްދާނެ ކަމަށެވެ.
އިންޑީއާއަކީ މިސަރަހައްދުގައި އެންމެ ގިނަ އުފެއްދުންތައް އަގުހެޔޮކޮށް ލިބެން ހުރި ސަރަހައްދުކަން ފާހަގަކުރަމުން ގަފޫރު ވިދާޅުވީ މި ފެށުނު ކާގޯ ފެރީގެ ޙިދުމަތުން މިއީ ތިލަދުންމަތީގެ ރައްޔިތުންނާއި މުޅި ރާއްޖޭގެ ރައްޔިތުންނަށްވެސް ލިބިގެންދިޔަ ވަރަށް ބޮޑު އުފަލެއް ކަމަށެވެ.
އިންޑިއާގެ ކޮޗިންއާއި ރާއްޖެ އާއި ދެމެދު ބާއްވާ ކާގޯ ފެރީ ހދ. ކުޅުދުއްފުއްޓާ ހަމައަށް އައިސްފައިވާއިރު މާލެއަށް، އައުމަށްވެސް ވަނީ ހަމަޖެހިފައެވެ.
