ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ކުރިއަށް ގެންދާ މާސް އިންސްޕެކްޝަންގައި މިހާތަނަށް 259 ތަނެއް ބަލާ ފާސްކޮށްފައިވާ ކަމަށް ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ) އިން ހާމަކޮށްފިއެވެ.
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެޗްއީއޯސީގެ ތަރުޖަމާނު ޑރ. ނަޒްލާ ރަފީގު ވިދާޅުވީ މާސް އިންސްޕެކްޝަންގެ 4 ވަނަ ބުރުގައި މިހާތަނަށް 259 ތަނެއް ބަލާފަސްކޮށްފައިވާ އިރު، މީގެ ތެރެއިން 254 ތަނެއް ހުރީ އެޗްޕީއޭގެ ގައިޑްލައިންތަކާ އެއްގޮތަށް ކަމަށާއި، މިހާތަނަށް ބަންދުކޮށްފައިވަނީ 3 ކެފޭއެއް ކަމަށެވެ.
އެތަންތަނުގެ މައުލޫމާތު ހިއްސާ ކުރައްވަމުން ޑރ. ނަޒްލާ ވިދާޅުވީ 254 ތަނުގެ ތެރޭގައި ހިމެނެނީ 206 ފިހާރައާއި، 39 ކެފޭއާއި، 6 ސެލޫނެއްގެ އިތުރުން 3 މާރުކޭޓު ކަމަށެވެ. އަދި ބަންދުކޮށްފައިވަނީ 3 ކެފޭ ކަމަށާއި، އިންސްޕެކްޝަންގައި ފާހަގަވި ކަންކަން ރަނގަޅުކުރުމުން ކެފޭއަކާއި ފިހާއަރައެއް އަލުން ހުޅުވުމުގެ ހުއްދަ ދެއްވާފައިވާ ކަމަށެވެ.
މި މާސް އިންސްޕެކްޝަންގެ 4 ވަނަ ބުރު 2 ހަފްތާގެ މުއްދަތަކަށް ކުރިއަށް ދާނެ. މިފަހަރު އާންމު ހިދުމަތްދޭ ތަންތަނުގެ އިތުރަށް އާންމު ދަތުރުފަތުގެ ހިދުމަތަށް ބޭނުންކުރާ ބަސް، ފެރީފަދަ އުޅަނދުތަކާއި ބައެއް އޮފީސްތައް ވެސް އިންސްޕެކްޓް ކުރަމުންދާނެ,އެޗްއީއޯސީގެ ތަރުޖަމާނު ޑރ. ނަޒްލާ ރަފީގު
ކޮވިޑް-19 އިން ރައްކާތެރިވުމުގެ ގޮތުން އާންމު ޚިދުމަތްދޭ ތަންތަނުގައި އަމަލު ކުރަން ޖެހޭ ގޮތަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އެކުލަވާލާފައިވާ މިންގަނޑުތަކާއި އެއްގޮތަށް ތަންތަން ހުރިތޯ ބެލުމަށް ޚާއްސަ އިންސްޕެކްޝަނެއް އަތޮޅު ތެރޭގައި ވެސް ވަނީ ފަށާފައެވެ. މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި ޑރ. ނަޒްލާ ވިދާޅުވީ މީހުން ތަމްރީނު ކުރެވި، އަތޮޅު ތެރޭގެ އިންސްޕެކްޝަން ފަށާފައިވާ ކަމަށެވެ.
އާންމު ޚިދުމަތްދޭ ތަންތަނުން އުސޫލުތަކާ އެއްގޮތަށް އަމަލު ކުރަމުންދޭތޯ ބެލުމަށް މީގެކުރިން ވެސް މާސް އިންސްޕެކްޝަނެއް ކުރިއަށް ގެންގޮސްފައިވެއެވެ. އަދި އުސޫލުތަކާ ޚިލާފުވެފައިވާ ފަރާތްތަކާ މެދު ވަނީ ފިޔަވަޅު ވެސް އަޅާފައެވެ. އުސޫލާ ހިލާފަށް ތަނުގައި ޚިދުމަތް ދެވޭނަމަ ފިޔަވަޅު އަޅާ ގޮތަށް ބަލާއިރު، ފުރަތަމަ ފަހަރު ނަމަ 48 ގަޑީއިރަށް ތަން ބަންދު ކުރެވޭނެއެވެ. އަދި ތަން އަލުން ހުޅުވާ ދެވޭނެ ގޮތަކީ ބަންދު ކުރާ ވަގުތުން ފެށިގެން 48 ގަޑީއިރު ފަހުންނެވެ.
ދެވަނަ ފަހަރު ނަމަ ތަން ބަންދު ކުރުމަށްފަހު 1000 ރުފިޔާއިން ޖޫރިމަނާ ކުރާއިރު، ތަން ހުޅުވޭނީ ބަންދު ކުރާ ވަގުތުން ފެށިގެން 72 ގަޑީއިރު ފަހުންނެވެ. ތިންވަނަ ފަހަރު ނަމަ، ތަން ބަންދު ކުރުމަށްފަހު 1000 ރުފިޔާއިން ޖޫރިމަނާ ކުރާނެއެވެ. އަދި ތަން އަލުން ހުޅުވޭނީ ބަންދު ކުރާ ވަގުތުން ފެށިގެން ފަސް ދުވަސް ފަހުންނެވެ.
ކޮވިޑް-19އާ ކޮންޓްރޯލް ކުރުމަށް ކުރަމުންދާ މަސައްކަތުގެ ދަށުން އާންމު ޚިދުމަތްދޭ ތަންތަނުން އަމަލުކުރަންވީ އުސޫލެއް އެކުލަވާލާފައިވާއިރު އެ އުސޫލާ އެއްގޮތަށް އަމަލު ކުރުމަށް އެޗްޕީއޭ އިން ވަނީ އިލްތިމާސް ކޮށްފައެވެ.
