ޓެރަރިސްޓް ޖަމާއަތަކަށް ތާއީދުކުރާތީ ދައުވާކުރި 6 މީހުން ބަންދުން ދޫކޮށްލައިފި

ޓެރަރިސްޓް ޖަމާއަތަކަށް ތާއީދުކުރި ކަމަށް ބުނެ ރ. މަޑުއްވަރިން ހައްޔަރުކޮށް، ދައުވާ އުފުލި 6 މީހުން ބަންދުން ދޫކޮށްލައިފިއެވެ.

ކްރިމިނަލް ކޯޓުން ވަނީ "ރާއްޖެއެމްވީ" އަށް އެކަން ކަށަވަރު ކޮށްދެއްވާފައެވެ. ރ. މަޑުއްވަރީ ގައި ފުލުހުންގެ ހާއްސަ އޮޕަރޭޝަނެއް ހިންގަން ފަށާފައިވާއިރު، މިދިއަ ހަރުގެ ޑިސެމްބަރު މަހުގެ ތެރޭގައި، އެ ރަށުން އުމުރުން 13 އަހަރުގެ ކުއްޖަކު ކޯޓުން ބޭރުން ކައިވެނި ކޮށްގެން ދަރިއަކަށް ބަލިވެއިން މައްސަލައެއް ވަނީ ފެންމަތިވެފައި ވަނިކޮށެވެ.

އެ މައްސަލަ ފެންމަތިވީ، މަޑުއްވަރީ ލަނޑާ ނަގާ ދޯންޏެއްގައި ޒުވާނަކަށް ވަޅިން ހަމަލާދީ މަރާލަން އުޅުނު މައްސަލައިގެ ތެރެއިންނެވެ. ލަނޑާ ނަގަން ގޮސްއުޅުނީ މަޑުއްވަރީއަށް ނިސްބަތްވާ ހަރުކަށި ފިކުރުގެ ބައެއް ކަމަށް ވެއެވެ.

ދީނީ ހަރުކަށި ފިކުރާ ދެކޮޅަށް ފުލުހުން މިދިއަ އަހަރުގެ ޑިސެމްބަރުން ފެށިގެން މިއަހަރުގެ ކުރީކޮޅު ރ. މަޑުއްވަރީގެ އިތުރުން 7 ރަށެއްގައި ހާއްސަ އޮޕަރޭޝަންތަކެއް ފުލުހުން ހިންގާފައި ވެއެވެ.

އެގޮތުން، މި އަހަރު ކުރީކޮޅު މަޑުއްވަރީގައި ހިންގި އޮޕަރޭޝަންގައި ހައްޔަރުކޮށް، ދައުވާ އުފުލާފައިވަނީ، ރ. މަޑުއްވަރީ މީރާ، ހަސަން ރާޒީ އާއި އެރަށު ގުލްއަލާގޭ އިބްރާހިމް ޖިހާދާއި އެރަށު މީޒާން، ހަސަން ސިޔާދާއި ހަމައެގޭ އާދަމް ސުހައިލްގެ އިތުރުން ނ، މަނަދޫ ގަހާ، އިބްރާހިމް ޝިބުނީގެ މައްޗަށެވެ.

އެމީހުންގެ މައްޗަށް ދައުލަތުން އުފުލާފައިވާ، ޓެރަރިސްޓް ޖަމާއަތަކަށް ތާއީދު ކުރުމުގެ ދައުވާގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ތާވަލް ކުރިއެެވެ. ނަމަވެސް، މިއަޑުއެހުން، އިންޓަނެޓްގެ މައްސަލަތަކާ ހެދި އަޑުއެހުން އިތުރަށް ކުރިއަށް ގެންދެވޭ ގޮތްވަނީ ނުވެފައެވެ.

ބުދަ ދުވަހާ ހަމައަށް އޭގެތެރެއިން ބަންދުގައި ހުރީ، ރާޒީ އެކަންޏެވެ. އޭނާ ފިޔަވާ އެންމެން މީގެކުރިން ވަނީ ބަންދުން ދޫކޮށްލާފަ އެވެ. އެހެން މީހުންގެ ބަންދުން ދޫކޮށްލާފައިވާތީ، ރާޒީގެ ގާނޫނީ ވަކީލުވެސް ވަނީ ރާޒީގެ ބަންދަށް ލުޔެއް ދިނުމަށް ބުދަ ދުވަހުގެ އަޑުއެހުމުގައި އެދިލައްވާފައެވެ. އެހެންކަމުން ކޯޓުން ވަނީ އޭނާ ވެސް ބަންދުން ދޫކޮށްލާފައެވެ.

އެނގިިފައިވާ ގޮތުގައި އެމީހުން ބަންދުން ދޫކޮށްލީ އެ މީހުން ބަންދުގައި ތިބޭތާ ގިނަ ދުވަސްތަކެއް ވެފައި ވާތީއެވެ.