ފްރެންޗް ލީގުގައި މި މަހުގެ 14 ވަނަ ދުވަހު މާސޭއާ ދެކޮޅަށް ޕީއެސްޖީ ކުޅުނު މެޗުގައި މާސޭގެ ޑިފެންޑަރު އަލްވާރޯ ގޮންޒާލޭޒްގެ ގަޔަށް ކުޅު ޖެހި މައްސަލައިގައި ޕީއެސްޖީގެ ފޯވާޑް އެންހެލް ޑި މާރިއާ ހަތަރު މެޗަށް ސަސްޕެންޑް ކޮށްފިއެވެ.

ލީގުގައި އެންމެ ފަހުގެ ޗެމްޕިއަން ޕީއެސްޖީ ކުޅުނު ދެވަނަ މެޗުގައި މާސޭ އަތުން 1-0 ން ބަލިވިއިރު، މެޗުގެ ފަހު ވަގުތު ހިނގައިދިޔަ ހަަމަނުޖެހުންތަކުގެ ތެރޭގައި ފަސް ކުޅުންތެރިއަކަށް ވަނީ ރަތް ކާޑު ދައްކާފައެވެ. އެ މެޗުގައި ރަތް ކާޑު ދެއްކީ ޕީއެސްޖީގެ ނޭމާ އާއި، ލެއަންޑްރޯ ޕަރެޑެސް އާއި، ލަވިން ކުރްޒާވާ އަދި މާސޭގެ ޑާރިއޯ ބެނެޑޭޓޯ އާއި، ޖޯޑަން އަމާވީއަށެވެ.

އެ ފަސް ކުޅުންތެރިންވެސް މީގެ ކުރިން އެކި ވަރުގެ ސަސްޕެންޝަންތަކާ ކުރިމަތިލިއިރު، ބުދަ ދުވަހުގެރޭ ފްރެންޗް ލީގުން ވަނީ ގޮންޒާލޭޒްގެ ގަޔަށް ކުޅު ޖެހުމާ ގުޅިގެން ޑި މާރިއާ ހަތަރު މެޗަށް ސަސްޕެންޑް ކުރަން ނިންމާފައެވެ. އެކަމަކު މި ސަސްޕެންޝަން ގުނަން ފަށާނީ އަންނަ އަންގާރަ ދުވަހުން ފެށިގެންނެވެ. އެހެންކަމުން ލީގުގައި އާދީއްތަ ދުވަހުގެރޭ ރެއިމްސްއާ ދެކޮޅަށް ޕީއެސްޖީ ކުޅޭ މެޗުގައި ޑި މާރިއާއަށް ކުޅެވޭނެއެވެ. އެކަމަކު އޭގެ ފަހުން ހަތަރު މެޗަށް ޑި މާރިއާ ސަސްޕެންޑް ވާއިރު، އެ ސަސްޕެންޝަނަށްފަހު ޑި މާރިއާއަށް ލީގުގައި މެޗެއް ކުޅެވޭނީ ނޮވެމްބަރު މަހުގެ އަށްވަނަ ދުވަހު ރެނެސްއާ ދެކޮޅަށް ލީގުގައި ޕީއެސްޖީ ކުޅޭ މެޗުގައެވެ.

ޕީއެސްޖީ އާއި މާސޭ ބައްދަލުކުރި މެޗުގެ ފަހު ވަގުތު ހިނގައިދިޔަ ހަމަނުޖެހުމުގެ ތެރެއިން އެންމެ ބޮޑަށް މައްސަލަ ގޯސްވީ ޕީއެސްޖީގެ ނެމާ މާސޭގެ ގޮންޒާލޭޒްގެ ބޮލުގައި އަތުން ޖެހުމާ ގުޅިގެންނެވެ. އެ މެޗަށްފަހު ސޯޝަލް މީޑިއާގައި ހިއްސާކުރި މެސެޖެއްގައި ނޭމާ ބުނީ ގޮންޒާލޭޒް ގައިގައި ޖެހީ ނަސްލީ ގޮތުން އޭނާއާ ތަކުރާރުކޮށް ދިމާކުރުމުން ކަމަށާއި، ގޮންޒާލޭޒް ނަސްލީ ގޮތުން އޭނާއާ ދިމާކުރުމުން ހަގީގަތުގައި ޖަހަން ބޭނުންވަނީ އޭނާގެ މޫނުމަތީގައި ކަމަށެވެ.

އެކަމަކު މީގެ ކުރިން ފްރެންޗް ލީގުން ވަނީ ނޭމާ ދެ މެޗަށް ސަސްޕެންޑް ކޮށްފައެވެ. އަދި ޕީއެސްޖީގެ ކުރްޒާވާ ހަ މެޗަށް ސަސްޕެންޑް ކުރިއިރު، އެ ޓީމުގެ ޕަރެޑެސް ސަސްޕެންޑް ކޮށްފައިވަނީ ދެ މެޗަށެވެ. މީގެ އިތުރުން މާސޭގެ އަމާވީ ތިން މެޗަށް ސަސްޕެންޑް ކުރިއިރު، އެޓީމުގެ ބެނެޑޭޓޯ ވަނީ އެއް މެޗަށް ސަސްޕެންޑް ކޮށްފައެވެ.