އިޓަލީގެ ގާނޫނު ހަދާ މަޖިލީހުގެ މެންބަރުންގެ އަދަދު މަދުކުރަން ވޯޓް ދީފި

އިޓަލީގެ ގާނޫނު ހަދާ މަޖިލީހުގެ މެންބަރުންގެ އަދަދު ތިންބައިކުޅަ އެއްބައަށް މަދުކުރަން އެގައުމުގެ ރައްޔިތުން ވޯޓު ދީފިއެވެ.

އިޓަލީގައި ނެގި ވޯޓުގެ 70 އިންސައްތަ ދައްކާ ގޮތުން އެގައުމުގެ ރައްޔިތުން ބޭނުންވަނީ މި ބަދަލު ގެންނާށެވެ. މިއާއެކު ގާނޫނު ހަދާ މަޖިލީހުގެ ތިރިގޭގެ މެންބަރުންގެ އަދަދު 634ން 400ށް ދަށްވާނެއެވެ. މި ގޮތަށް ނިންމާފައިވަނީ ހަރަދު ކުޑަކުރުމުގެ ގޮތުންނެވެ. އިޓަލީގެ އައު ސަރުކާރުން ވަނީ އިޓަލީގެ ރައްޔިތުންގެ މަޖިލިހުގެ ދެ ގޭގެ މެމްބަރުންގެ އަދަދު ވަރަށް ބޮޑު ތަނުން މަދުކޮށް 1.1 ބިލިއަން ޑޮލަރު ސަލާމަތް ކުރަން ނިންމާފައެވެ.

ފެންނަ ނުފެންނަ ވޯޓެއް މިކަމުގައި ނެގުމަށް ބާރުއަޅާފައިވަނީ ސަރުކާރު ހިންގާ ކޯލިޝަނުގައި ހިމެނޭ ޕާޓީތަކުގެ ތެރެއިން ފައިވް ސްޓާ މޫވްމެންޓުންނެވެ. އެ ހަރަކާތުން ބުނި ގޮތުގައި މި ބަދަލުގެ ސަބަބުން ދައުލަތުގެ ހަރަދު ވަރަށް ބޮޑަށް ކުޑަކުރެވޭނެއެވެ.

މި ނިންމުމައެކު ސެނެޓުގެ މެންބަރުންނާއި ދަށުގޭގެ މެންބަރުންގެ އަދަދު 945ން 600ށް މަދުވާނެއެވެ. މި ނިންމުން އިޓަލީގެ ގާނޫނު ހަދާ މަޖިލީހުން ފާސްކޮށްފައިވީ ނަމަވެސް، މި ނިންމުމަށް އަމަލު ކުރުމުގައި ރައްޔިތުންގެ ފެންނަ ނުފެންނަ ވޯޓެއް ނަގަންޖެހެއެވެ. ސަބަބަކީ މިއީ ގާނޫނު އަސާސީއަށް ގެންނަ އިސްލާހަކަށް ވާތީއެވެ. އަދި މި ބަދަލު 2023 ވަނަ އަހަރުގެ އިންތިހާބުގެ ކުރިން ގެންނަން ޖެހެއެވެ.

ޕާލިމެންޓް ކުޑަކޮށް، ހަރަދު ވެސް ދަށްކުރުމުގެ ވައުދަކީ މިހާރު އިޓަލީގެ ވެރިކަން ހިންގާ ކޯލިޝަންގެ މައި ޕާޓީ ކަމަށްވާ ފައިވް ސްޓާ މޫވްމަންޓްގެ ކެމްޕޭންގެ ބައެކެވެ. ނަމަވެސް މި ބަދަލާ ދެކޮޅު މީހުން ބުނާ ގޮތުގައި މިއީ ޑިމޮކްރަސީގައި ފަހަތަށް އެޅި ފިޔަވަޅެއް ކަމަށާއި، މަޖިލިހުގެ ތެރެއިން ވަކި ކަންކަން ކުރަން ލޮބީކުރާ މީހުންގެ ނުފޫޒު މާ ބޮޑަށް ފޯރާނެ ކަމަށެވެ. ފައިވް ސްޓާ މޫވްމަންޓުން ބުނާގޮތުން، މި ބަދަލާ އެކު ސަލާމަތްވާ ހަރަދުގެ ނިސްބަތް، ކުރިއަށް އޮތް 10 އަހަރުގެ ތެރޭގައި، 1.1 ބިލިއަން ޑޮލަރަށް އަރާނެއެވެ.

އިޓަލީގެ ގާނޫނު ހަދާ މަޖިލިހުގެ މެމްބަރަކަށް އަހަރަކު 230،000 ޑޮލަރު ހޭދަވާ އިރު ސެނެޓަރެއްގެ ހަރަދު އުޅެނީ އަހަރަކު 274،000 ޑޮލަރުގައެވެ. އެކަމަކު މިހާރު ގެންނަ ބަދަލުތައް ރައްޔިތުން ބަލައިގަނެ، އެއަށް އަމަލުކުރަން ފަށައިފި ނަމަ، މަޖިލިހުގެ ހަރަދުން އަހަރަކު 64 މިލިއަން ޑޮލަރަށް އަދި ސެނެޓްގެ ބަޖެޓުން 28 މިލިއަން ޑޮލަރު ސަލާމަތްވާނެއެވެ.