ތޮއިބާ މިސްކިތް ކައިރިން މީހަކަށް ތޫނުއެއްޗަކުން ހަމަލާދިން ޒުވާނަކު ހައްޔަރުކޮށްފި

ބުދަ ދުވަހުގެ ރޭ ތޮއިބާ މިސްކިތް ކައިރިން ތޫނުއެއްޗެއް ބޭނުންކޮށްގެން މީހަކަށް ހަމަލާދިން މީހަކު ހައްޔަރުކޮށްފިއެވެ.

ފުލުހުން ބުނީ މާފަންނު ތޮއިބާ މިސްކިތް ކައިރިން ތޫނުއެއްޗަކުން މީހަކަށް ހަމަލާ ދީފައިވާ ކަމުގެ މައުލޫމާތު ބުދަ ދުވަހުގެ ރޭ 8:45 ހާއިރު ފުލުހުންނަށް ލިބިފައިވާ ކަމަށެވެ. އަދި އަނިޔާވި މީހާ ހޮސްޕިޓަލަކަށް ގެންގޮސް ފަރުވާދީފައިވާ ކަމަށާއި ފުލުހުން އެ ސަރަހައްދުގައި ހަރަކާތްތެރިވެފައިވާ ކަމަށެވެ.

ފުލުހުން ބުނީ މި މައްސަލައާއި ގުޅިގެން އުމުރުން 19 އަހަރުގެ ދިވެހި ފިރިހެނަކު ތޮއިބާ މިސްކިތް ކައިރިން ހައްޔަރު ކޮށްފައިވާ ކަމަށެވެ. މި މައްސަލައާއި ގުޅޭ އިތުރު ތަފްސީލެއް ފުލުހުން ހާމަކޮށްފައެއް ނުވެއެވެ.

ފުލުހުން މީގެކުރިން ބުނެފައިވަނީ މި މައްސަލަ ތަހުގީގު ކުރަމުން އަންނަ ކަމަށެވެ. ފަހަކަށް އައިސް މާލޭގައި ހިނގާ މިފަދަ މާރާމާރީގެ މައްސަލަތަކާއި ތޫނު އެއްޗެހި ބޭނުންކޮށްގެން މީހުންނަށް ހަމަލާދިނުން ފަދަ މައްސަލަތައް ނިސްބަތުން މަދުވެފައިވާ ކަމަށެވެ.