މާލޭ ސްވިމިންގް ޓްރެކް ސަރަހައްދު ސާފުކޮށްދީ ބަލަހައްޓައިދޭނެ ފަރާތެއް ހޯދަނީ

މާލޭ ސްވިމިންގް ޓްރެކް ސަރަހައްދު ސާފުކޮށްދީ ބަލަހައްޓައިދޭނެ ފަރާތެއް ހޯދަން އިއުލާން ކޮށްފި އެވެ.

މިނިސްޓްރީ އޮފް ޔޫތް، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އިން ކޮށްފައިވާ އިއުލާނެއްގައި ބުނެފައިވަނީ، އެކަމަށް ޝައުޤުވެރިވެލައްވާ ފަރާތްތަކަށް ފުރުޞަތު ހުޅުވާލާ ކަމަށެވެ.

މިގޮތުން، މިމަހުގެ 28 ވަނަ ދުވަހުގެ 12:30ށް މާފަންނު އިޖުތިމާއީ މަރުކަޒަށް ވަޑައިގެން މައުލޫމާތު ސާފު ކުރެއްވުމަށްފަހު، އަންނަ އޮކްޓޯބަރު މަހުގެ 7 ވަނަ ދުވަހުގެ 12:30ށް މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް (ވެލާނާގެ 3 ވަނަ ފަންގިފިލާ) އަށް އަންދާސީ ހިސާބު ހުށަހެޅުން އެދޭ ކަމަށެވެ.

ޔޫތް އެންޑް ސްޕޯޓްސް މިނިސްޓްރީން ބުނީ، މައުލޫމާތު ސާފުކުރަން ގަޑިއަށް ވަޑައި ނުގަންނަވާ ފަރާތްތަކަށް އަންދާސީ ހިސާބު ހުށަނޭޅޭނެ ކަމަށެވެ.

މާލޭ ސްވިމިންގ ޓްރެކް އިތުރަށް ތަރައްގީ ކުރުމުން މިހާރު ކުރިއަށް ގެންދާ މަސައްކަތް ނޮވެމްބަރު މަހަށް ނިންމާލެވޭނެ ކަމަށް ކުޅިވަރާ ބެހޭ ވަޒީރު އަޙްމަދު މަޙްލޫފް ވަނީ މީގެކުރިން ވިދާޅުވެފަ އެވެ.

މާލޭ އިރު ދެކުނު ފަރާތުގައި ގާއިމުކޮށްފައިވާ ސްވިމިންގ ޓްރެކްގައި ސިޑިބަރިއާއެކު ފާހަނާ އާއި ފެންވަރާނެ ވަސީލަތްތައް ގާއިމު ކޮށްދިނުމުގެ މަސައްކަތް މާޒިޔާ ކޮންސްޓްރަކްޝަނާ ހަވާލުކޮށްފައިވަނީ މިދިޔަ އަހަރުގެ ޖޫން މަހުގެ 20 ވަނަ ދުވަހުއެވެ.

އެފަހަރު މަސައްކަތް ހަވާލުކޮށްފައިވަނީ 120 ދުވަހުގެ ތެރޭގައި ނިންމާ ގޮތަށެވެ. އެކަމަކު ދިރާސާތަކެއް ކުރަން ޖެހުމުން މީގެ ކުރިން ވެސް މަސައްކަތް ލަސްވިއިރު، ކޮވިޑް-19 އާ ގުޅިގެންވެސް މަސައްކަތް ވަނީ ލަސްވެފައެވެ.

މާލޭ ސްވިމިންގް ޓްރެކް ސަރަހައްދު ތަރައްގީ ކުރަމުން އަންނައިރު، އެސަރަހައްދަކީ، ގިނަ ބަޔަކު މޫދަށް ގޮސް އުޅޭ ސަރަހައްދެކެވެ. އަދި ކަސްރަތުގެ އެކި ހަރަކާތްތައް ހިންގާ، އެސަރަހައްދަކީ އާންމުގެ ގިނަ ބަޔަކު ގޮސްއުޅޭ ސަރަހައްދެކެވެ.