ބާސާ ދޫކޮށް ވިޑާލް އިންޓައަށް

ބާސެލޯނާއަށް ކުޅެމުން އައި ޗިލީގެ މިޑްފީލްޑަރު އާޓޫރޯ ވިޑާލް އިންޓަ މިލާނަށް ބަދަލުވެއްޖެއެވެ.

އުމުރުން 33 އަހަރުގެ މިޑްފީލްޑަރު ބާސާއާއެކު އެއްބަސްވުން ހަދާފައި އޮތީ 2021 ވަނަ އަހަރުގެ ނިޔަލަށެވެ. އެކަމަކު ބާސާގެ އައު ކޯޗު ރޮނާލްޑް ކޫމަންގެ ޕްލޭނުގައި އޭނާ ނުހިމެނޭތީ، ބާސާއިން ވަނީ އެއްބަސްވުން ބާތިލުކުރުމަށްފަހު ވިޑާލް ވިއްކާލާފައެވެ.

އެގޮތުން ވިޑާލް އިންޓައާ ގުޅުނީ އެއް މިލިޔަން ޔޫރޯއަށެވެ. ރިޕޯޓުތައް ބުނާ ގޮތުން އިންޓައާއެކު ވިޑާލް ދެ އަހަރުގެ އެއްބަސްވުމެއް ހެދިއިރު، މި އެއްބަސްވުމުގެ ދަށުން އޭނާއަށް އަހަރަކު ހަ މިލިޔަން ޔޫރޯ ލިބޭނެއެވެ.

ވިޑާލް އިންޓައަށް ބަދަލުވިއިރު، އިންޓަގެ މިހާރުގެ ކޯޗު އެންޓޯނިއޯ ކޮންޓޭ ވަނީ މީގެ ކުރިން ޔުވެންޓަސްގައި ވިޑާލަށް އިރުޝާދު ދީފައެވެ.

މީގެ ކުރިން އިޓަލީގެ ޔުވެންޓަސްގައި ވިޑާލް ހަތަރު ސީޒަން ހޭދަކުރިއިރު، އޭނާ ވަނީ އެޓީމަށް 171 މެޗު ކުޅެދީ 48 ލަނޑު ކާމިޔާބުކޮށްފައެވެ. އަދި ވަނީ ޔުވެންޓަސްއާއެކު އިޓާލިއަން ލީގު ހަތަރު ފަހަރު ކާމިޔާބުކޮށްފައެވެ.

އޭގެ ފަހުން ބަޔާން މިއުނިކަށް ބަދަލުވެ އެޓީމުގައިވެސް ވިޑާލް މޮޅު ކުޅުމެއް ދެއްކިއިރު، އޭނާ ވަނީ ބަޔާނާއެކު ޖަރުމަން ލީގު ތިން ފަހަރު ކާމިޔާބުކޮށްފައެވެ. ބަޔާން ދޫކޮށް ވިޑާލް ބާސާއާ ގުޅުނީ 2018 ވަނަ އަހަރު 19 މިލިޔަން ޔޫރޯއަށެވެ. ވިޑާލް ވަނީ ބާސާއަށް ކުޅެދިން 96 މެޗުގައި 11 ލަނޑު ޖަހާ، ބާސާއާއެކު ސްޕެނިޝް ލީގު އެއް ފަހަރު ކާމިޔާބުކޮށްފައެވެ.