އިރާނުގެ ޖަލުތަކުގައި ހައްޔަރުކޮށްފައި ތިބި ހުރިހާ އެމެރިކާގެ ގައިދީން ދޫކޮށްލާ އެމެރިކާ އާއެކު ގައިދީން ބަދަލުކުރުމަށް ތައްޔާރުކަމަށް އިރާނުގެ ފޮރިން މިނިސްޓަރ މުހައްމަދު ޖަވާދު ޒާރިފް ވިދާޅުވެއްޖެއެވެ.
ޖަވާދު ޒާރިފް މި މޭރުމުން ވާހަކަފުޅު ދައްކަވާފައިމިވަނީ ނިއު ޔޯރކްގައި ކުރިޔަށްދިޔަ އދ. ގެ ފޮރިން ރިލޭޝަން ކައުންސިލް ބައްދަލުވުމެއްގައެވެ. މީގެ ކުރިން ވެސް އެމެރިކާއިން ވަނީ އިރާނުން ހައްޔަރުކޮށްފައިވާ އެމެރިކާ ރައްޔިތުން ދޫކޮށްލުމަށް އެދިފައެވެ. އޭގެ ތެރޭގައި އިރާނާއި އެމެރިކާގެ ޕާސްޕޯޓް އޮންނަ ބާގިރު އާއި ސިމާކް ނަމާޒީ ހިމެނެއެވެ. އެމެރިކާއިން ބުނާގޮތުން އެމީހުންނަކީ ސިޔާސީ ހައްޔަރީންނެވެ.
އެހެންނަމަވެސް އިރާނުން ބުނަމުން އަންނަނީ ސިޔާސީ އެއްވެސް ބޭނުމަކު މީހުން ހައްޔަރުކޮށް ޖަލަށްލާފައިނުވާ ކަމަށެވެ. އަދި އެ ގައުމުން ބޭރު މީހުން ޖަލަށް ލާފައިވަނީ އެހެން ގައުމުތަކަށް ބޭނުންވާ ކަންކަމުގައި ޖާސޫސްކުރާތީ ކަމަށް އިރާނުން ވަނީ ބުނެފައެވެ. އިރާނުން އިތުރަށް ބުނީ އެމެރިކާއިން ހައްޔަރުކޮށްފައިވާ އިރާނުގެ ރައްޔިތުންނަކީ ނުހައްގުން ހައްޔަރުކޮށްފައިވާ މީހުން ކަމަށެވެ.
އެމެރިކާގެ ޖަލުތަކުގައި އެބަތިބި އެމީހުންގެ ގައުމަށް ގައްދާރުވާން ދެކޮޅު ހެދި އިރާނުގެ އެތައް މީހުންނެއް. އަހަރުމެން ހައްޔަރުކޮށްފައިވާ އެންމެން ދޫކޮށްލުމަށް މިތިބީ ތައްޔާރަށް. އޭގެތެރޭގައި ޖަލުތަކުގައި ތިބި މީހުންވެސް ހިމެނޭ.އިރާނުގެ ފޮރިން މިނިސްޓަރ މުހައްމަދު ޖަވާދު ޒާރިފް
އިރާނާއި އެމެރިކާގެ ގުޅުން ހީނަރުވެ ނުތަނަސްވެފައިވީ ނަމަވެސް މިހާތަނަށް އައިއިރު ދެ ފަހަރެއްގެ މަތިން ވަނީ ގައިދީން ބަދަލުކޮށްފައެވެ. އެގޮތުން 2018 ވަނަ އަހަރުގެ ޖޫން މަހު އެމެރިކާގެ ނޭވީ ވެޓްރަނެއް ކަމުގައިވާ މައިކަލް ވައިޓް ވަނީ އަނބުރާ އެމެރިކާއަށް ފޮނުވާލާފައެވެ. އޭގެ ބަދަލެއްގެ ގޮތުން އެމެރިކާ އިން ވަނީ އިރާން އަދި އެމެރިކާ އަށް ނިސްބަތްވާ މާޖިދް ތަހެރަށް އިރާނަށް ދިޔުމުގެ ފުރުސަތު ދީފައެވެ.
އޭގެ އިތުރުން، 2018 ވަނަ އަހަރުގެ ޑިސެމްބަރ މަހު އިރާނާއި އެމެރިކާއިން ގައިދީން ބަދަލުކުރުމަށް ކުރިޔަށް ގެންދިޔަ ޕްރޮގްރާމްގެ ދަށުން އެތައް އަހަރެއް ވަންދެން އިރާނުގެ ޖަލުގައި އެމެރިކާއަށް ޖާސޫސް ކޮށްދިން ކަމުގެ ތުހުމަތުގައި ހައްޔަރުކޮށްފައިވާ މީހުން ވަނީ ދޫކޮށްލާފައެވެ. އަދި އެމެރިކާ އިން ވެސް ވަނީ އިރާނުގެ ރައްޔިތުން ދޫކޮށްލާފައެވެ.
