ލަންކާގެ ގޯލްކީޕަރު ސުޖަން އީގަލްސް ދޫކޮށްލައިފި

ކުލަބު އީގަލްސްއަށް ކުޅެމުން އައި ސްރީލަންކާގެ ތަޖުރިބާކާރު ގޯލްކީޕަރު ސުޖަން ޕެރޭރާ އެ ކުލަބު ދޫކޮށްލައިފިއެވެ.

ލަންކާ ގައުމީ ފުޓްބޮޅަ ޓީމުގެ ކެޕްޓަންކަން ވެސް ކުރި ސުޖަން އެންމެ ފުރަތަމަ ރާއްޖެ އައީ 2015 ވަނަ އަހަރެވެ. އޭގެ ފަހުން ގަވާއިދުން ކޮންމެ އަހަރަކު އީގަލްސްއަށް ކުޅެމުން އައި ސުޖަން ވަނީ ރާއްޖޭގެ ފުޓްބޯޅަ ސީޒަނުގެ އެންމެ މޮޅު ގޯލްކީޕަރުގެ މަގާމުވެސް ހޯދާފައެވެ.

ކޮވިޑް-19 އާ ގުޅިގެން މިދިޔަ ފުޓްބޯޅަ ސީޒަންގެ ބާކީ ބައި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ކެންސަލް ކުރިއިރު، ދެ މަހެއްހާ ދުވަހު މާލޭގައި ބަންދުވެ ހުރުމަށްފަހު ސުޖަން އެނބުރި ލަންކާއަށް ގޮސްފައިވަނީ މެއި މަހުގެ ތެރޭގައެވެ.

ސުޖަންގެ ފޭސްބުކްގައި ހިއްސާކުރި ޕޯސްޓެއްގައި އޭނާ ވަނީ އީގަލްސް ދޫކޮށްލަން ނިންމިކަން ހާމަކޮށްފައެވެ. އެ ޕޯސްޓުގައި ސުޖަން ބުނީ މިއީ ހަޔާތުގައި ނިންމި އެންމެ އުނދަގޫ އެއް ނިންމުން ކަމަށާއި، އީގަލަސްއިން އޭނާ މި ހިސާބަށް ގެނެސްދިނުމަށް ވެދިން އެހީ ދުވަހަކުވެސް ހަނދާނުން ނުނެތޭނެ ކަމަށެވެ. މައުލޫމާތު ލިބިފައިވާ ގޮތުގައި އުމުރުން 28 އަހަރުގެ ގޯލްކީޕަރު އީގަލްސް ދޫކޮށްލަން ނިންމީ އާއިލާއާއެކު ގިނަ ވަގުތު ހޭދަކުރަން ބޭނުންވާތީއެވެ.

އީގަލްސްގައި ފަސް ސީޒަން ސުޖަން ހޭދަކުރިއިރު، އޭނާ ވަނީ އެޓީމަށް 101 މެޗު ކުޅޭދީފައެވެ. އަދި އޭގެ ތެރެއިން 45 މެޗު އޭނާ ކޮޅަށް ލަނޑެއް ވަދެފައެއް ނުވެއެވެ. މީގެ އިތުރުން ސުޖަން ވަނީ 2016 ވަނަ އަހަރުގެ ޕްރެޒިޑެންޓްސް ކަޕް އީގަލްސްއާއެކު ކާމިޔާބުކޮށްފައެވެ. އަދި އީގަލްސްގެ ތާރީޚުގައި މުޅިން އަލަށް އޭއެފްސީ ކަޕުން އެ ޓީމު ޖާގަ ހޯދާފައިވާއިރު، ސުޖަންގެ ދައުރު ބޮޑެވެ.

އަންނަ އަހަރުގެ އޭއެފްސީ ކަޕުން އީގަލްސްއަށް ޖާގައެއް ލިބުނީ މިދިޔަ ސީޒަނުގެ އެފްއޭ ކަޕް ކެންސަލް ކުރުމުން، ދިރާގު ދިވެހި ޕްރިމިއާ ލީގުގެ ދެވަނަ ޓީމުގެ ހައިސިއްޔަތުންނެވެ. މިދިޔަ ސީޒަނުގެ އެފްއޭ ކަޕް ކެންސަލް ކުރީ މުބާރާތުގެ ކުއާޓާ ފައިނަލް މެޗުތައްވެސް ކުޅުމަށްފަހުއެވެ.