އިންޑިއާގެ މަހާރާޝްތްރައިގެ އުމުރުން 106 އަހަރުގެ އަންހެނަކު ކޮވިޑް-19 އިން ފަސޭހަވެއްޖެއެވެ.
ރިޕޯޓްތައް ބުނާ ގޮތުން 10 ދުވަސް ވަންދެން ހޮސްޕިޓަލްގައި ކޮވިޑަށް ފަރުވާ ހޯދުމަށްފަހު އޭނާ ހޮސްޕިޓަލުން ދޫކޮށްލާފައި ވަނީ މިދިޔަ އާދިއްތަ ދުވަހު އެވެ.
އޭނާ ހޮސްޕިޓަލުން ދޫކޮށްލުމުގެ ކުރިން ފަރުވާދިން ޑޮކްޓަރުންނާއި ނަރުހުން ވަނީ އޭނާއަށް ޙާއްސަ ފެއަރވެލްއެއް ދީފައެވެ.
ހޮސްޕިޓަލުން ނިކުތުމުގެ ކުރިން ހިނިތުންވެފައި ހުރެ އޭނާ ވަނީ ޑިސްޗާޖް ސެޓްފިކެޓް މީޑިއާއަށް ދައްކާލާފައެވެ.
މައިދައިތަ ކޮވިޑުން ފަސޭހަވުމާއި ގުޅިގެން އެކަމާއި އުފަލުން ހުރި އޭނާގެ ދަނބިދަރިފުޅު ބުނެފައިވަނީ މައިދައިތަގެ އުމުރުން އެހާ ދުވަސް ވެފައި ހުރުމުން އެއްވެސް ހޮސްޕިޓަލަކުން އޭނާ އެޑްމިޓްކޮށް ފަރުވާދޭން ތައްޔާރުނުވި ކަމަށެވެ.
އެންމެ ފަހުން މައިދައިތަ އަށް ދިހަ ދުވަސް ވަންދެން ފަރުވާ ހޯދީ ސަލްވަރަމް ކްރިދާ ސަންކުލް (ސްޕޯޓްސް ކޮމްޕްލެކްސް) ގައި ހުންނަ ކޮވިޑް-19 އަށް ފަރުވާދޭ ފެސިލިޓީއެއް ކަމަށްވާ ކަލްޔަން ޑޮމްބިވްލި މުނިސިޕަލް ކޯޕަރޭޝަން (ކޭޑީއެމްސީ) ގައި އެޑްމިޓްކޮށްގެން ކަމަށެވެ. އެކަމަށްޓަކައި ހޮސްޕިޓަލްގެ ޑޮކްޓަރުންނާއި މެޑިކަލް ޓީމަށް އޭނާ ވަނީ ޝުކުރު އަަދާކޮށްފައެވެ.
ކޮވިޑް-19 ޓްރީޓްމަންޓް ފެސިލިޓީ ހިންގަމުންދާ "ވަން ރުޕީ ކްލިނިކް" ގެ މެނޭޖިން ޑިރެކްޓަރ ރާހުލް ގޫލޭ ވެސް ވަނީ އޭނާގެ ޓީމުން އެހާ އުުމުރުން ދުވަސްވީ މީހަކަށް ފަރުވާ ދިނުމުން އެކަން ފާހަގަކޮށް އެފަރާތްތަކަށް ޝުކުރު އަދާކުރައްވާފައެވެ. އޭނާ އިތުރަށް ވިދާޅުވެފައިވަނީ އެ ހޮސްޕިޓަލް ހުޅުވާފައިވަނީ މިދިޔަ ޖުލައި މަހުގެ 27 ގައި ކަމަށާއި މިހާތަނަށް 1100 ކޮވިޑް ޕޭޝަންޓުންނަށް އެ ހޮސްޕިޓަލުން ފަރުވާދީފައިވާ ކަމަށެވެ.
