ޖޫން މަހުގެ ގްރީން ޓެކްސްގެ ގޮތުގައި ދައުލަތަށް ލިބުނު އާމްދަނީ މިދިޔަ އަހަރުގެ މިމުއްދަތާއި އަޅާބަލާއިރު ބޮޑުތަނުން ދަށަށް ގޮސްފައިވާ ކަމަށް ފިނޭންސް މިނިސްޓްރީން ހާމަކޮށްފިއެވެ.
މިއަހަރުގެ ޖޫން މަހުގައި ލިބިފައިވާ ގްރީން ފަންޑްގެ ރިޕޯޓް ފިނޭންސް މިނިސްޓްރީއިން އާންމުކޮށްފައި ވާއިރު މިއަހަރުގެ ޖޫން މަހު ދައުލަތަށް ލިބިފައިވަނީ 3.9 މިލިއަން ރުފިޔާއެވެ.
އަދި މިދިޔަ އަހަރުގެ ޖޫން މަހު ގްރީން ޓެކުހުގެ ގޮތުގައި 56 މިލިއަން ރުފިޔާ ލިބިފައިވެއެވެ. ރިޕޯޓުން ދައްކާ ގޮތުގައި ކޮވިޑް-19 އާ ގުޅިގެން ޓޫރިޒަމް ހީނަރުވުމުގެ ސަބަބުން ގްރީން ޓެކުހުގެ އާމްދަނީ މިއަހަރު ވަނީ ބޮޑުތަނުން ދަށްވެފައެވެ.
އާންމު ކުރި ރިޕޯޓް އިން ދައްކާ ގޮތުގައި ޖޫން މަހު ގްރީން ޓެކްސް އެންމެ ގިނައިން ލިބިފައި ވަނީ ކ. އަތޮޅުގައި ފަތުރުވެރިކަމުގެ ހިދުމަތް ދޭ ތަންތަނުންނެވެ.
އެގޮތުން ކ. އަތޮޅުގެ ސަފާރީ، ހޮޓާ އަދި ގެސްޓު ހައުސްތަކުން ޖުމްލަ 1.7 މިލިއަން ރުފިޔާ ލިބިފައިވެއެވެ.
އަދި ރިސޯޓުތަކުން ގްރީން ޓެކުހުގެ ގޮތުގައި 1.5 މިލިއަން ރުފިޔާ ލިބިފައިވާއިރު ގެސްޓުހައުސް ވިޔަފާރިން ގްރީން ޓެކުހުގެ ގޮތުގައި 143398.32ރ. ލިބިފައިވެއެވެ. ނަމަވެސް ހޮޓާ ތަކުން ގްރީން ޓެކުހުގެ ގޮތުގައި އެއްވެސް ފައިސާއެއް ލިބިފައެއް ނުވެއެވެ.
ގްރީން ޓެކްސް ރިޕޯޓް ދައްކާ ގޮތުގައި ހއ. އަތޮޅާއި ސ. އަތޮޅު، ތ. އަތޮޅު، ލ. އަތޮޅު އަދި ގއ. ގެ އަތޮޅުތަކުގެ އިތުރުން އަދި ފުވައްމުލަކުން ގްރީން ޓެކްސް ލިބިފައެއް ނުވެއެވެ. އަދި ރާއްޖޭގެ ސަފާރީތަކުން ގްރީން ޓެކުހުގެ ގޮތުގައި ލިބިފައިވަނީ 195,953.16ރ. އެވެ.
ފިނޭންސް މިނިސްޓްރީން ހާމަކުރި ރިޕޯޓުގައިވާ ގޮތުގައި ޖޫން މަހުގައި 41 މިލިއަން ރުފިޔާ ވަނީ ހޭދަކޮށްފައެވެ. އަދި ގްރީން ފަންޑުގައި ބެލެންސުގައި 918 މިލިއަން ރުފިޔާ ހުރި ކަމަށް ދައްކައެވެ.
ދިވެހިރާއްޖޭގެ ޓޫރިޒަމް ގާނޫނުގައިވާ ގޮތުން ދިވެހިރާއްޖޭގައި ހިންގާ ޓޫރިސްޓުންނަށް ޙިދުމަތް ދޭ ތަންތަނަށް އަންނަ ޓޫރިސްޓުން، އެއިން ތަނެއްގައި ހޭދަކުރާ ކޮންމެ ދުވަހަކަށް، މީހަކަށް 6 ޑޮލަރުގެ ރޭޓުން ގްރީން ޓެކްސް ނަގަން ޖެހެއެވެ. ގްރީން ޓެކްސް ނަގަން ފަށާފައިވަނީ 2016 ވަނަ އަހަރުގައެވެ.
