ރަސްދޫގައި ފެރީޓަރމިނަލް އެޅުމުގެ މަސައްކަތް ކޮށްދޭނެ ފަރާތެއް ހޯދަނީ

އއ. ރަސްދޫގައި ފެރީޓަރމިނަލެއް އަޅައިދޭނެ ފަރާތެއް ހޯދުމަށް އިއުލާން ކޮށްފިއެވެ.

ރަސްދޫ ކައުންސިލުން ބުނީ ފެރީޓަރމިނަލެއް އަޅައިދޭނެ ފަރާތެއް ހޯދުމަށް ކައުންސިލުން މީގެ ކުރިން ކުރި އިއުލާނާ ގުޅިގެން ހުށަހެޅި ބިޑްތަކުގެ ޝަރުތު ހަމަނުވާތީ އެ ހުށަހެޅުންތައް ބާތިލްކޮށް އަލުން އެ މަސައްކަތް ކޮށްދޭނެ ފަރާތެއް ހޯދުމަށް ފުރުސަތު ހުޅުވާލާފައިވާ ކަމަށެވެ.

Advertisement

ކައުންސިލުން ބުނީ މި ބީލަންތަކުގައި ބައިވެރި ވެވޭނީ މިނިސްޓްރީ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރގެ "އިމާރާތްކުރުމުގެ އަމަލީ މަސައްކަތްކުރާ ފަރާތްތަކުގެ ގަވާއިދު" ގައިވާ ގޮތުގެމަތީން ރަޖިސްޓަރީ ވެފައިވާ ފަރާތްތައް ކަމަށެވެ.

ކައުންސިލުން ބުނީ މި ބީލަމުގައި ބައިވެރިވުމަށް، ޝަރުތުހަމަވާ އަދި ޝައުގުވެރިވާ ފަރާތްތަކުން، މިމަހުގެ 17ން 27ގެ ނިޔަލަށް ރަޖިސްޓްރީވުމަށް އެދި aarasdhoocouncil@gmail.com އަށް އީމެއިލަށް ނުވަތަ 6660714 ނަންބަރު ފޯނާ ގުޅައިގެން ނުވަތަ ރަސްމީ ގަޑީގައި ކައުންސިލަށް ހާޒިރުވެ ރަޖިސްޓަރީ ކުރުމަށް އެދޭ ކަމަށެވެ. އަދި ރަޖިސްޓްރީވުމަށް ނަން ނޯޓު ނުކުރާ ފަރާތްތަކަށް ބިޑް ހުށަނޭޅޭނެ ކަމަށާއި، ނަން ނޯޓް ކުރާ ފަރާތްތަކަށް މަސައްކަތްތަކުގެ ތަފްސީލް ހިމެނޭ ބިޑްޑޮކިއުމެންޓް ލިބޭނެ އިންތިޒާމު ހަމަޖައްސައިފައިވާ ކަމަށް ކައުންސިލުން ބުނެއެވެ.

ކައުންސިލުން ބުނީ ބިޑް ޑޮކިއުމަންޓުގެ ހާޑު ކޮޕީ ދޫކުރެވޭނީ 74 ރުފިޔާ ދެއްކުމުން ކަމަށާއި، އީމެއިލް މެދުވެރިކޮށް ރަޖިސްޓްރީވުމަށް ހުށަހަޅާ ފަރާތްތަކުން ކުންފުނި (ވިޔަފާރު/ޕާޓްނަރޝިޕް)ގެ ނަމާއި ވެރިފަރާތުގެ ނަމާއި ގުޅޭނެ ނަންބަރާއެކު ހުށަހެޅުމަށް ސަމާލުކަން ދިނުމަށް އެދޭ ކަމަށެވެ.

މީގެ އިތުރުން ކައުންސިލުން ބުނީ މި މަސައްކަތާ ގުޅިގެން އެއްވެސް ސުވާލެއްވާނަމަ ކައުންސިލްގެ މެއިލަށް މިމަހުގެ 27ވާ އާދިއްތަ ދުވަހުގެ 14:00ގެ ކުރިން މެއިލް ކުރުމުން އެ ފަރާތްތަކަށް ޖަވާބު ފޮނުވޭނެ ކަމަށެވެ.

މި މަސައްކަތުގެ ޕްރީބިޑް މީޓީންގ އޮންނާނީ މި މަހުގެ 28ވާ ހޯމަ ދުވަހުގެ ހެނދުނު 9:30 ގައެވެ. ބިޑް ހުށަހެޅުމާއި ބިޑް ހުޅުވުން އޮންނާނީ 2020 އޮކްޓޫބަރު 04 ވަނަ ދުވަހުގެ 9:30 ކައުންސިލް އިދާރާގައެވެ.