މާލެ ފިޔަވާ ރާއްޖޭގެ 21 ރަށަކަށް ކޮވިޑުގެ ކޭސްތައް ވަނީ ފެނިފައި
މި ރަށްތަކުން ޖުމްލަ 48 މީހުން ވަނީ ޕޮޒިޓިވްވެފައި
ހއ. ކެލާ
އާދިއްތަ ދުވަހުގެ އިރުއޮއްސި 06:00 ޖެހުމާއި ހަމައަށް މާލެ ފިޔަވާ ރާއްޖޭގެ 21 ރަށަކުން ކޮވިޑުގެ ކޭސްތައް ފެނިފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ތަފާސް ހިސާބުތަކުން ދައްކައިފިއެވެ.
އެޗްޕީއޭގެ ތަފާސް ހިސާބުތަކުން ދައްކާ ގޮތުގައި ކޮވިޑުގެ ކޭސްތައް ފެނިފައިވާ މި ރަށްތަކުން ޖުމްލަ 48 މީހުން ވަނީ ޕޮޒިޓިވްވެފައެވެ. އޭގެ ތެރޭގައި 34 ދިވެހިންނާއި 14 ބިދޭސީން ހިމެނެއެވެ.
ގދ. ހޯނޑެއްދޫ އަދި ގދ. މަޑަވެލި މޮނީޓަރިންގ ގެ ހާލަތަށް ގެނެސްފައިވާއިރު ކޮވިޑުގެ ކޭސްތައް ފެންނަ ރަށްތަކުގައި މާސްކް އެޅުން ވަނީ މަޖުބޫރުކޮށްފައެވެ. ރަށްތަކުން ކޮވިޑަށް މީހުން ވައިރަސްއަށް ޕޮޒިޓިވްވެފައިވަނީ 14 ދުވަހުގެ ހޯމް ކަރަންޓީންގެ މުއްދަތެއް ފުރިހަމަ ކުރުމަށް ފަހު ނެގި ސާމްޕަލްތަކުންނެވެ.
އެޗްޕީއޭ އިން ހާމަކޮށްފައިވާ ތަފާސް ހިސާބުތަކަށް ބަލާއިރު ށ. އަތޮޅު ކޮވިޑު ފެސިލިޓީ އަދި ގއ. ވިލިނގިލީ ކޮވިޑު ފެސިލިޓީގައި ދެ މީހަކަށް ދަނީ ފަރުވާ ދެމުންނެވެ.
21 ރަށަކުން ކޮވިޑުގެ ކޭސްތައް ފެނިފައިވާއިރު ރާއްޖޭގެ 27 ރިސޯޓަކުން ވަނީ ކޮވިޑުގެ ކޭސްތައް ފެނިފައެވެ. ރިސޯޓުން 39 މުވައްޒަފަކު ވަނީ ވައިރަސްއަށް ޕޮޒިޓިވްވެފައެވެ. އަދި 18 ފަތުރުވެރިޔަކު ވެސް ވަނީ ކޮވިޑަށް ޕޮޒިޓިވްވެފައެވެ.
ރާއްޖެއަށް ޗުއްޓީ ހޭދަކުރުމަށް އަންނަ ފަތުރުވެރިންނަށް އެއް ރިސޯޓުން އަނެއް ރިސޯޓަށް ދެވޭ ގޮތަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހުއްދަ ދީފައިވަނީ އޮގަސްޓް މަހުގެ 31 ވަނަ ދުވަހުއެެވެ. އެގޮތުން ހުއްދަ ދޫކޮށްފައިވަނީ އެޗްޕީއޭ އިން ކަނޑައަޅާފައިވާ ''ސްޕިލިޓް'' ގައިޑްލައިންތަކަށް ފެތޭ ރިސޯޓުތަކުން، ޝަރުތުތައް ފުރިހަމަ ކުރުމަށް ފަހު ޓޫރިޒަމް މިނިސްޓްރީ އަށް ހުށައެޅުމުންނެވެ. އަދި ހުއްދަ އަށް އެދި ފަތުރުވެރިޔާ ދަތުރު ކުރުމަށް ހަމަޖެހިފައިވާ ތާރިހުގެ ދެ ދުވަސް ކުރިން އެ މިނިސްޓްރީން ހުށަހަޅަން ޖެހޭ ގޮތަށް ވަނީ ކަނޑައަޅާފައެވެ.
ކޮވިޑުގެ ހާލަތާއި ގުޅިގެން ރާއްޖޭގެ ފަތުރުވެރިކަމުގެ ސިނާއަތަށް ވަނީ މިއިން ދުވަހަކުވެސް ނުވާ ވަރުގެ ބޮޑު ހީނަރުކަމެއް އައިސްފައެވެ. ރާއްޖޭގެ ބޯޑަރުތައް ހުޅުވާލި ކަމުގައިވިޔަސް ފަތުރުވެރިން ޒިޔާރަތް ކުރާ މިންވަރު އަދި މަދެވެ.
މި ދުވަސްވަރު ރާއްޖެ އަށް ޒިޔާރަތް ކުރާ ގިނަ ފަތުރުވެރިންނަކީ މަތީ ފަންތީގެ ރިސޯޓުތަކަށް އަންނަ ފަތުރުވެރިންނެވެ. ފަތުރުވެރިކަމުގެ ދާއިރާގައި މަސައްކަތް ކުރާ މާހިރުން ލަފާކުރާ ގޮތުން މި އަހަރުގެ ފަހުކޮޅު ރާއްޖެ އަށް ޒިޔާރަތް ކުރާ ފަތުރުވެރިންގެ އަދަދު ގިނަވެގެން ދާނެއެވެ.
