ސުޕްރީމް ކޯޓުގެ 12 އަހަރުގެ ތާރީހުގައި އެންމެ ގިނަ މައްސަލަތައް ނިންމީ މިދިޔަ އަހަރު
މުވައްޒަފުންގެ އިތުރުން ފަނޑިޔާރުންގެ މަސައްކަތް ފާހަގަކުރެއްވި
ސުޕްރީމް ކޯޓަށް 12 އަހަރު ފުރުމުގެ މުނާސަބަތުގައި އުއްތަމަ ފަނޑިޔާރު ދެއްވި ވީޑިއޯ މެސެޖްގެ ތެރެއިން
ސުޕްރީމް ކޯޓުގެ 12 އަހަރުގެ ހަޔާތުގެ ތެރޭގައި އެންމެ ގިނަ މައްސަލަތައް ބަލައި ނިންމާފައިވަނީ ފާއިތުވި އަަހަރުގެ ތެރޭގައިކަމަށް އުއްތަމަ ފަނޑިޔާރު އަހުމަދު މުއުތަސިމް އަދުނާން ވިދާޅުވެއްޖެއެވެ.
މިނިވަން ޑިމޮކްރެޓިކް މުޖުތަމައުތަކުގައި އެންމެ މަތީ ކޯޓުގެ ދައުރު ކަނޑައެޅިފައިވާ މަފްހޫމާ އެއްގޮތަށް ދިވެހިރާއްޖޭގެ އެންމެ މަތީ ކޯޓު، ދިވެހިރާއްޖޭގެ ސުޕްރީމް ކޯޓު އުފެދިފައިވަނީ 2008 ވަނަ އަަހަރުގެ ސެޕްޓެމްބަރު މަހުގެ 18 ވަނަ ދުވަހުއެވެ.
ސުޕްރީމް ކޯޓަށް 12 އަހަރު ފުރުމުގެ މުނާސަބަތުގައި ހުކުރު ދުވަހު ވީޑިއޯ މެދުވެރިކޮށް ދެއްވި މެސެޖެއްގައި އުއްތަމަ ފަނޑިޔާރު ވަނީ އެ ކޯޓުގެ ތަފާސް ހިސާބުތައް ހާމަކުރައްވާފައެވެ. ފާއިތުވި އަހަރުގެ ސެޕްޓެމްބަރު މަހުގެ 18 އިން މި އަހަރުގެ ސެޕްޓެމްބަރު މަހުގެ ނިޔަލަށް 250 އެއް އަޑުއެހުން ބޭއްވިފައިވާ ކަމަށް ވިދާޅުވިއެވެ.
ވޭތުވެދިޔަ 17 އަހަރުގެ ތެރޭގައި ނިމުނު މައްސަލައިގެ އެވަރޭޖް އަކީ 24 ނަމަވެސް މިދިޔަ އަހަރުގެ ތެރޭގައި 49 މައްސަލައެއްގައި ހުކުމް ކުރެވިފައިވާކަން އުއްތަމަ ފަނޑިޔާރު ފާހަގަކުރެއްވިއެވެ. ކޯޓަށް ބަލައިގަތުމާއި މެދު 13 މައްސަލައެއް ގައި ގޮތް ނިންމާ ފަސް މައްސަލައެއް އިޖުރާއިގޮތުން ބަލާފައިވާ ކަމަށް ކޯޓުގެ ތަފާސް ހިސާބުތައް ހާމަކުރައްވަމުން އުއްތަމަ ފަނޑިޔާރު ވިދާޅުވިއެވެ. މިއީ ކުރީ އަހަރުގެ އެވަރޭޖްއާ އަޅާބަލާއިރު 10.34 އިންސައްތައިގެ ކުރިއެރުމެެކެވެ.
މުއްތަސިމް އަދްނާން ވިދާޅުވީ، އެންމެ މަތީ ކޯޓަށް 12 އަހަރު ފުރުން ފާހަގަކުރަމުންދާއިރު އިޖާދީ އަދި ހާމަކަަން ބޮޑުގޮތެއްގައި ޝަރީޔަތް ހިންގުމުގެ އަައު ގޮތްތަކެއް އަލަށް ތައާރަފް ކުރެވިފައިވާ ކަމަށެވެ. އެގޮތުން މިއަަހަރުގެ ފެބްރުއަރީ މަހުގެ 16 ވަނަ ދުވަހުން ފެށިގެން ވީޑިއޯ ކޮންފަރެންސް ބާއްވަން ފެށިކަން ފާހަގަކުރެއްވިއެވެ. އަދި އިތުރު ބަދަލުތައް ގެނައުމުގެ މަސައްކަތް ކުރައްވަމުންދާ ކަމަށް އުއްތަމަ ފަނޑިޔާރު ވިދާޅުވިއެވެ.
ކޮވިޑް-19 މި ދަނޑިވަޅުގައި މިހާ ފުރިހަމަ ނަތިއްޖާއެއް ހާސިލްވެގެން ދިޔައި ސުޕްރީމް ކޯޓުގެ ފަނޑިޔާރުންނާއި މުވައްޒަފުން ހުއްޓުމެއް ނެތި ކުރަމުންދާ ބުރަ މަސައްކަތުން ކަމަށް ވިދާޅުވެ، އެމަނިކުފާނު ވަނީ ފަނޑިޔާރުންގެ އިތުރުން ކޯޓުގެ މުވައްޒަފުންނަށް ޝުކުރު އަދާކުރައްވާފައެވެ.
