ޓޫރިޒަމް މިނިސްޓްރީގެ ޕީއެސް ސަސްޕެންޑް ކޮށްފި
17 ސެޕްޓެމްބަރު 2020 | ބުރާސްފަތި 10:40ސަސްޕެންޑް ކޮށްފައިވަނީ 30 ދުވަހަށް
ޓޫރިޒަމް މިނިސްޓްރީން ބޭއްވި ބުރަބި ޖަލްސާގައި، ސޫޒަން ފޮޓޯއަކަށް ހުއްޓިލައިގެން
ޓޫރިޒަމް މިނިސްޓްރީގެ ޕާމަނެންޓް ސެކެރެޓަަރީ އައިޝަތު ސޫޒަން ހަނީފް ސަސްޕެންޑް ކޮށްފި އެވެ.
ސިވިލް ސާވީސް ކޮމިޝަން (ސީއެސްސީ) އިން ބުރާސްފަތި ދުވަހު އާއްމުކޮށްފައިވާ ބަޔާނެއްގައި ބުނީ، ސޫޒަންއާ ބެހޭ ގޮތުން އެ ކޮމިޝަނަށް ހުށައެޅިފައިވާ ޝަކުވާ އެއް ބެލުމަށާއި، އަދި ޓޫރިޒަމް މިނިސްޓްރީގެ އޮޑިޓް ރިޕޯޓުން ފާހަގަ ކުރެވިފައިވާ ކަންތައްތައް ބަލައި ނިމެންދެން އޭނާ ސަސްޕެންޑް ކޮށްފައިވާ ކަމަށެވެ. ބުރާސްފަތި ދުވަހުން ފެށިގެން ސޫޒަން ސަސްޕެންޑް ކޮށްފައިވަނީ 30 ދުވަހުގެ މުއްދަތަށް މުސާރަ ހިނގާ ގޮތަށެވެ.
ސޫޒަން ސަސްޕެންޑް ކޮށްފައިވަނީ، އޭނާއާ ގުޅޭ ގޮތުން ޓޫރިޒަމް މިނިސްޓްރީގެ މުވައްޒަފުންތަކެއް ސީއެސްސީގެ ރައީސް މުހައްމަދު ނާސިހަށް ސިޓީއެއް ފޮނުވާފައި ވަނިކޮށެވެ. އެ ސިޓީގައި ސޫޒަންގެ ގާބިލުކަމާއި މެދު ވަނީ ސުވާލު އުފައްދާފައެވެ. އަދި ޓޫރިޒަމް މިނިސްޓްރީގައި މަސައްކަތް ކުރަމުންދާއިރު، ދާއިރާއާއި ގުޅޭ މައުލޫމާތު ނެތުމާއި، މިނިސްޓްރީގެ މަސައްކަތްތަކާއި ސީއެސްސީގެ ގަވާއިދުތަކާއި އުސޫލުތަކަށް ވެސް ސޫޒަން އަހުލުވެރިވެފައިނުވާ ކަމަށް ސިޓީގައި ބުންޏެވެ.
ޕީއެސްގެ މަގާމަށް ސޫޒަން އައްޔަން ކޮށްފައިވަނީ މިދިޔަ އަހަރުގެ ޖުލައި މަހުއެވެ. ޕީއެސްގެ މަގާމަށް އައްޔަން ކުރުމުގެ ކުރިން އޭނާ ވަނީ 18 އަަހަރު ވަންދެން އެމްޓީސީސީ ގައި މަސައްކަތް ކޮށްފައެވެ.
