ކަންބޮޑުވުންތަކާ ގުޅިގެން ޝިޕިންގ އެޖެންޓުން ރަޖިސްޓްރީ ކުރަން ޖެހޭ ގަވާއިދު އުވާލައިފި
މިގަވާއިދު ގެޒެޓްކޮށް އަމަލު ކުރަން ފެށީގެން މިދިއަ ޖުލައި 16 ވަނަ ދުވަހު
ރާއްޖޭއަށް މުދާ އެތެރެކުރާ، މައި ވިޔަފާރި ބަނދަރު އެމްޕީއެލް ސަރަހައްދު: ޝިޕިންގ އެޖޭންޓުން ބޮޑެތި އަދަދުތަކުން ފީ ނަގަމުންދާ ކަމުގެ ޝަކުވާ ބޮޑު
ރާއްޖޭގައި ހަރަކާތްތެރިވާ ޝިޕިން އެޖެންސީތައް ރަޖިސްޓްރީ ކުރަންޖެހޭ ގޮތަށް ޓްރާންސްޕޯޓް އޮތޯރިޓީން އެކުލަވާލި ގަވާއިދު އުވާލައިފިއެވެ.
މި ގަވާއިދު ފުރަތަމަ ދިވެހި ސަރުކާރުގެ ގެޒެޓުގައި ޝާއިއުކޮށްފައިވަނީ މިދިޔަ ޖުލައި މަހުގެ 16 ގައެވެ. އެ ގަވާއިދުގައި ބުނާ ގޮތުން، ދިވެހިރާއްޖޭގައި ޝިޕިންގ އެޖެންސީގެ ޚިދުމަތްދޭ ކުންފުނިތަކުން 16 އޮގަސްޓް 2020 ވަނަ ދުވަހުގެ ކުރިން މޯލްޑިވްސް ޓްރާންސްޕޯޓް އޮތޯރިޓީގައި ޝިޕިންގ އެޖެންސީއެއްގެ ގޮތުގައި ރަޖިސްޓަރީ ކުރަން ޖެހެއެވެ.
އެ ތާރީހުގެ ފަހުން އެ އޮތޯރިޓީގައި ރަޖިސްޓަރީ ނުކޮށް ޝިޕިންގ އެޖެންސީގެ ޚިދުމަތް ދިނުމަކީ މަނާ ކަމެއް ކަމަށް ބުނިނަމަވެސް، ޓްރާންސްޕޯޓް އޮތޯރިޓީން ވަނީ އެ މުއްދަތު ސެޕްޓެމްބަރު މަހުގެ 15 ވަނަ ދުވަހާ ހަމައަށް އިތުރުކޮށްފައެވެ.
އެ ގަވާއިދު ބުނާ ގޮތުން، ދިވެހިރާއްޖޭގައި ޝިޕިންގ އެޖެންޓު ނުވަތަ ފުރައިޓު ފޯވަޑަރެއް ޑެލިވަރީ އޯޑަރ ދޫކުރުމަށް ޝިޕިންގ އެޖެންޓު ނުވަތަ ފުރައިޓު ފޯވާޑަރ ސީދާ ގޮތުންނާއި ނުސީދާ ގޮތުންވިޔަސް ކޮންސައިނީގެ އަތުން ފުރައިޓުގެ އިތުރަށް ފީއެއްގެ ގޮތުގައި ނެގޭނީ ޑެލިވަރީ އޯޑަރަށް އެޑްމިނިސްޓްރޭޓިވް ފީއެއްގެ ގޮތުގައި ގިނަވެގެން -/500 (ފަސްސަތޭކަ) ރުފިޔާއެވެ.
އެގޮތުން ހުޅުވާލި ފުރުސަތުގައި ޝިޕިން އެޖޭންޓްގެ ގޮތުގައި ރެޖިސްޓްރީ ކުރުމަށް 112 ކުންފުންޏެއް ރެޖިސްޓްރީ ކުރުމަށް ހުށަހަޅާފައިވާ ކަމަށް މިދިއަ އޮގަސްޓް މަހުގެ 23 ގައި ޓްރާންސްޕޯޓް އޮތޯރިޓީން ބުނެއެވެ.
ރާއްޖެޓީވީގެ "ފަށާއިރު" ޕްރޮގްރާމްގައި މައުލޫމާތު ދެއްވަމުން، ޓްރާންސްޕޯޓް އޮތޯރިޓީ ހިނގެވުމާ ހަވާލުވެ ހުންނެވި، ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރ އަހުމަދު އާދިލް ވިދާޅުވެފައިވަނީ ޝިޕިންގ އެޖޭންޓުންގެ ގޮތުގައި ރެޖިސްޓްރީ ކުރުމަށް ހުށަހަޅާފައިވާ 112 ކުންފުނީގެ ތެރެއިން މިހާތަނަށް 21 ކުންފުނި ރެޖިސްޓްރީ ކުރެވިފައިވާ ކަމަށެވެ.
ގަވާއިދުު އުވާލި ސަބަބު ސާފުކޮށްދެމުން ޓްރާންސްޕޯޓު އޮތޯރިޓީން ބުނެފައިވަނީ، ގަވައިދު އުވާލީ ޝިޕިން ދާއިރާގައި މަސައްކަތްކުރާ ފަރާތްތަކުން އެ ގަވައިދުގައި މައްސަލަތަކެއް ހުރިކަމަށް ބުނެ ކަންބޮޑުވުން ފާޅުކުރަމުންދާތީ އަލުން މުރާޖައާ ކުރުމަށްޓަކައި އެގަވާއިދު އުވާލާފައިވާ ކަމަށެވެ.
ރާއްޖެއަށް ގިނައަދަދެއްގެ މުދާ އެތެރެކުރަމުންދާ ބައެއް ފިޔަފާރިވެރިން ބުނެފައިވާ ގޮތުގައި، ޝިޕިންގ އެޖެންޓްގެ ގޮތުގައި ހަރަކާތްތެރިވާ ކުންފުނިތަކަކީ ދިވެހިންގެ ބަޔަކު އަޑީގައި ތިބެގެން ލަންކާ ބަޔަކު ހިންގާ ކުންފުނިތަކެއް ކަމަށެވެ. އެހެންކަމުން އެފައިސާ ވަރަށް ބޮޑު ޕަސެންޓަކީ ރާއްޖެއިން ބޭރަށް ބޭރުވާ ފައިސާ ކަމަށާއި، އަދި އެއީ ގަވާއިދާ ހިލާފަށް ނަގަމުންދާ އިތުރު ފީތަކެއް ކަމަށެވެ. ގިނަ ޝިޕިންގ އެޖެންޓްކަން ކުރާ ކުންފުނިތަކަކީ އެއްބަޔަކު ހިންގާ ކުންފުނިތަކެއް ކަމަށާއި އެގޮތުން ހައެއްކަ ކުންފުނި އެއްބަޔެއްގެ ނަންމަތީ އޮންނަކަން ފާހަގަކުރެވިފައިވާ ކަމަށް ވެސް ދިވެހި ބައެއް ވިޔަފާރިވެރިން ބުނެއެވެ.
ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރ އަހުމަދު އާދިލް ވެސް ވިދާޅުވެފައިވަނީ، ރާއްޖޭގައި ހަރަކާތްތެރިވާ ޝިޕިން އެޖެންޓް، ފުރައިޓް ފޯވަޑް ކުންފުނިތަކުގެ 90 އިންސައްތަ ފަރާތްތަކަކީ ދިވެއްސެއްގެ ނަމުގައި ބޭރު މީހުން ހިންގާ ކުންފުނިތައް ކަމަށެވެ. އަދި ޤަވާއިދު އެކުލަވާލުމުގެ ކުރިން އެފަރާތްތަކުން ދިޔައީ ފުރައިޓް ފޯވަޑިންގެ ހިދުމަތް ދިނުމުގައި ގިނަ ފީތަކާއި، ބޮޑެތި އަގުތަކެއް ނަގަމުންކަމަށް އާދިލް ވަނީ ފާހަގަ ކުރައްވާފައެވެ.
މީގެ އިތުރުން އާދިލް ވެސް ވިދާޅުވީ، ގެންނަ މުދަލުގެ އަގަށްވުރެ، ބޮޑު ޗާޖެއް ފްރައިޓް ފޮވާޑު ކުރާ ފަރާތްތަކުން ނަގަމުންދާ ކަމަށެވެ. އެގޮތުން މުދަލުގެ އަގަކީ 500 ޑޮލަރު ކަމަށްވާނަމަ، ބައެއް ފަހަރު 1000 ޑޮލަރު އެކިއެކި ފީތަކުގެ ގޮތުގައި ފްރައިޓް ފޮވާޑު ކުރާ ފަރާތްތަކުން ނަގަމުންދާ ކަމަށް އާދިލް ވެސް ވަނީ ފާހަގަ ކުރައްވާފައެވެ.
