ޓޮޓެންހަމަށް ބަދަލުވާން ބޭލް ބޭނުންވޭ: އޭޖެންޓް

ކުރީގެ ކުލަބު ޓޮޓެންހަމް ހޮޓްސްޕާއަށް ބަދަލުވާން ރެއާލް މެޑްރިޑަށް ކުޅެމުން އަންނަ ވޭލްސްގެ ތަރި ގެރެތު ބޭލް ބޭނުންވާ ކަމަށް އޭނާގެ އޭޖެންޓް ޖޮނަތަން ބާނެޓް ބުނެފިއެވެ.

ރިޕޯޓުތައް ބުނާގޮތުން އުމުރުން 31 އަހަރުގެ ބޭލް ހޯދަން އެންމެ ބޮޑަށް މަސައްކަތްކުރާ ދެ ކުލަބަކީ ޓޮޓެންހަމާއި މެންޗެސްޓާ ޔުނައިޓެޑެވެ. ޔުނައިޓެޑުން ބޭލަށް ފާރަލާން ފެށީ ބޮރޫޝިއާ ޑޯޓްމަންޑަށް ކުޅެމުން އަންނަ އިންގްލެންޑްގެ ފޯވާޑް ޖޭޑަން ސަންޗޯ ހޯދަން ކުރާ މަސައްކަތުގައި ކުރިއެރުމެއް ނުލިބުމުންނެވެ.

އެކަމަކު ޓޮޓެންހަމުން ބޭލް ހޯދުމުގެ މަޝްވަރާތައް މިހާރު ފަށާފައިވާ ކަމަށާއި، ބޭލް ބަދަލުވުން އެންމެ ގާތީ ޓޮޓެންހަމަށް ކަމަށް އިނގިރޭސި މީޑިއާތަކުން ވަނީ ރިޕޯޓުކޮށްފައެވެ.

ދާދި ފަހުން ބީބީސީއަށް ދިން އިންޓަވިއުއެއްގައި ބޭލްގެ އޭޖެންޓް ޖޮނަތަން ބާނެޓް ބުނީ ބޭލް އަދިވެސް ޓޮޓެންހަމް ދެކެ ލޯބިވާ ކަމަށާއި، އެގޮތުން އޭނާ ބަދަލުވާން ބޭނުންވަނީވެސް ޓޮޓެންހަމަށް ކަމަށެވެ.

އިނގިރޭސި ޕްރިމިއާ ލީގުގެ ދެ ކުލަބަކުން ބޭލް ހޯދުމުގެ މަސައްކަތް ކުރަމުން އަންނައިރު، މީގެ ކުރިން ބޭލް ވަނީ ރެއާލް ދޫކޮށް އެހެން ކުލަބަކަށް ބަދަލުވާން މަސައްކަތްކުރި ކަމަށާއި، އެކަމަކު އެކަން ނުވީ ރެއާލުން އެކަމަށް ހުރަސް އެޅުމުން ކަމަށް ބުނެފައެވެ. އަދި ބޭލް ވަނީ ރެއާލުން ދޫދޭނަމަ، ޕްރިމިއާ ލީގަށް އަލުން ބަދަލުވާން ބޭނުންވާ ކަމަށްވެސް ބުނެފައެވެ.

ޓޮޓެންހަމް ދޫކޮށް 2013 ވަނަ އަހަރު ބޭލް ރެއާލާ ގުޅުނީ އޭރު ދުނިޔޭގެ ރިކޯޑު އަގެއް ކަމަށްވާ 100 މިލިޔަން ޔޫރޯއަށެވެ. އަދި ބޭލް މިހާރު ރެއާލާއެކު ހަދާފައިވާ އެއްބަސްވުން ހަމަވާނީ 2022 ވަނަ އަހަރުއެވެ. އެކަމަކު މި ފަހަކަށް އައިސް ރެއާލްގެ ފުރަތަމަ އެގާރައިން ބޭލްއަށް ޖާގައެއް ނުލިބެއެވެ. އެގޮތުން މިދިޔަ ސީޒަނުގައި ބޭލް ރެއާލްގެ ޖާޒީގައި ފެނިގެން ގޮސްފައިވަނީ އެންމެ 14 މެޗުގައެވެ.

އެކަމަކު މީގެ ކުރިން ރެއާލްގައި ބޭލް މޮޅު ކުޅުމެއް ދެއްކިއިރު، އޭނާ ވަނީ ރެއާލާއެކު ޖުމްލަ 12 ތަށި ހޯދާފައެވެ. އަދި ވަނީ ރެއާލަށް ކުޅެދިން 251 މެޗުގައި 105 ލަނޑު ކާމިޔާބުކޮށްފައެވެ.