އާސެނަލްގައި އިތުރު ތިން އަހަރު މަޑުކުރަން ނިންމާ އެޓީމުގެ ކެޕްޓަން ޕިއޭ-އެމެރިކް އޮބާމަޔަން އެންމެ ފަހުން އެއްބަސްވުން އާކޮށްފިއެވެ.
ގެބޮނަށް އުފަން އުމުރުން 31 އަހަރުގެ އޮބާމަޔަން މީގެ ކުރިން އާސެނަލާއެކު ހަދާފައި އޮތް އެއްބަސްވުން ހަމަވަން އޮތީ އަންނަ އަހަރުގެ ހޫނު މޫސުމުގެ ނިޔަލަށެވެ. އަދި އާސެނަލްގައި އޮބާމަޔަންގެ ކުރިމަގެއް ނެތް ކަމަށް ބުނެ މީގެ ކުރިން ބައެއް ތަޖުރިބާކާރުން ވަނީ އޮބާމަޔަން އާސެނަލް ދޫކޮށް ދިޔުމަށް ގޮވާލާފައެވެ.
އެކަމަކު ގިނަ މަޝްވަރާތަކަކަށްފަހު އެންމެ ފަހުން އޮބާމަޔަން ވަނީ އާސެނަލްގެ އެއްބަސްވުން އިތުރު ތިން އަހަރަށް އާކޮށްފައެވެ. އެހެންކަމުން އޭނާ އާސެނަލްގައި 2023 ވަނަ އަހަރުގެ ހޫނު މޫސުމުގެ ނިޔަލަށް މަޑުކުރާނެއެވެ. ރިޕޯޓުތައް ބުނާ ގޮތުން އައު އެއްބަސްވުމާއެކު އޮބާމަޔަންއަށް ހަފުތާއަކު 250،000 (ދެ ލައްކަ ފަންސާސް ހާސް) ޕައުންޑްގެ މުސާރާއެއް ލިބޭނެއެވެ.
އެއްބަސްވުން އާކުރުމަށްފަހު އޮބާމަޔަން ބުނީ އޭނާ އާސެނަލްގައި މަޑުކުރަން ނިންމީ އެ ކުލަބުގެ ލެޖެންޑަކަށް ވާން ބޭނުންވާތީ ކަމަށެވެ. އަދި އާސެނަލްގައި މަޑުކުރުމަށް ނިންމި ނިންމުމަކީ އޭނާގެ ކެރިއަރުގައި ނިންމި އެންމެ މުހިންމު ނިންމުން ކަމަށްވެސް ވަނީ ބުނެފައެވެ.
އާސެނަލްގެ ކޯޗުގެ މަގާމާ މިދިޔަ އަހަރުގެ ޑިސެމްބަރު މަހު ހަވާލުވި މިކޭލް އާޓެޓާގެ އިރުޝާދުގެ ދަށުން އެޓީމުން މޮޅު ކުޅުމެއް ދައްކަމުން އަންނައިރު، މިހާތަނަށް ވަނީ މިދިޔަ ސީޒަނުގެ އެފްއޭ ކަޕްގެ އިތުރުން މި ސީޒަނުގެ ކޮމިއުނިޓީ ޝީލްޑް ކާމިޔާބުކޮށްފައެވެ. މި ދެ ކާމިޔާބީގައިވެސް އޮބާމަޔަންގެ ދައުރު ބޮޑެވެ.
އޮބާމަޔަން އާސެނަލްގައި މަޑުކުރަން ނިންމިއިރު، މީގެ ކުރިން އޭނާ ހޯދުމަށް ބާސެލޯނާ އާއި ޗެލްސީންވެސް ވަނީ މަސައްކަތް ކޮށްފައެވެ.
ބޮރޫޝިއާ ޑޯޓްމުންޑް ދޫކޮށް 2018 ވަނަ އަހަރުގެ ޖެނުއަރީ މަހު 63 މިލިއަން ޔޫރޯއަށް އާސެނަލަށް ސޮއިކުރި އޮބާމަޔަން ވަނީ މިހާތަނަށް އެޓީމަށް ކުޅެދިން 108 މެޗުގައި 68 ލަނޑު ޖަހާފައެވެ.
