ގއ. ވލިނގިލީ ކޮވިޑް ފެސިލިޓީގައި ތިބި ދެމީހަކު ބަލިން ރަނގަޅުވެއްޖެ
ދެމައިންނަކީ އޮގަސްޓު މަހުގެ 15 ގައި މާލެއިން އެރަށަށް ބަދަލުވި އާއިލާއެއްގެ ދެމައިން
ގއ. ވލިނގިލީ ކޮވިޑް ފެސިލިޓީން ބަލިން ރަނގަޅުވި ދެ މީހަކު ދޫކޮށްލަނީ
މި މަހުގެ 2 ވަނަ ދުވަހު ގއ.ވިލިނގިލީ ކޮވިޑް ފެސިލިޓީއަށް ގެންދިޔަ ދެމައިން ބަލިން ރަނގަޅުވުމުން ދޫކޮށްލައިފިއެވެ.
ގއ. ދާންދޫއިން ވިލިނގިލީ ކޮވިޑް ފެސިލިޓީއަށް ގެންދިޔަ ދެމައިންނަކީ އޮގަސްޓު މަހުގެ 15 ގައި މާލެއިން އެރަށަށް ބަދަލުވި އާއިލާއެއްގެ ދެމައިންނެވެ. ދެމައިން އެއްކޮށް ކޮވިޑް ފެސިލިޓީއަށް ބަދަލު ކުރިއިރު، އަންހެން މީހާ އަކީ ހަކުރު ބަލީގެ އިތުރުން ދާއިމީ އެހެނިހެން ބަލިތަކަށް ފަރުވާ ހޯދަމުންދާ ފަރާތެކެވެ. އަދި އެ އާއިލާގައި 18 އަހަރުންދަށުގެ ތިން ކުދިން ތިބި ނަމަވެސް އެކުދިންގެ ޓެސްޓުތައް ނެގެޓިވްވެފައިވާ ދާންދޫ ކައުންސިލް ރައީސް އިސްމާއީލް މުހަންމަދު އޭރު ވަނީ ވިދާޅުވެފައެވެ.
ދާންދޫ ދެމައިންގެ އިތުރުން މިހާރުވެސް ވިލިނގިލީ ކޮވިޑް ފެސިލިޓީގައި އުމުރުން ދުވަސްވީ ދެމަފިރިންނަށް އަންނަނީ ފަރުވާ ދެމުންނެވެ. އެއީ މި މަހުގެ 8 ވަނަ ދުވަހު ގދ. ހޯނޑެއްދޫއިން ކޮވިޑަށް ޕޮޒިޓިވް ވެގެން ގެންދިޔަ ދެމަފިރިންނެވެ. މި ދެމަފިރިންގެ ހާލުވެސް މިވަގުތު ރަނގަޅުވަމުން އަންނަ ކަމަށް ގއ. އަތޮޅު ހޮސްޕިޓަލުން މައުލޫމާތުދެއެވެ.
ގއ. ވލިނގިލީ ކޮވިޑް ފެސިލިޓީން ދެ މީހަކު ރަނގަޅު ވެގެން ދޫކޮށްލާފައިވާއިރު، އަތޮޅުތެރޭގައި ކޮވިޑް ފަރުވާއަށް ގާއިމުކޮށްފައިވާ ފެސިލިޓީތަކުގެ ތެރެއިން 3 ފެސިލިޓީއެއްގައި ފަސް މީހަކަށް ފަރުވާދެމުންދާ ކަމަށް އެޗްއީއޯސީގެ ތަރުޖަމާނު ޑރ. ނަޒްލާ ރަފީގު ވަނީ ވިދާޅުވެފައެވެ. އެގޮތުން ނަޒްލާ ފާހަގަކުރެއްވީ ށ. ފުނަދޫ ކޮވިޑް ފެސިލިޓީގައި ދެ މީހަކަށް، ބ. އޭދަފުށި ކޮވިޑް ފެސިލިޓީގައި އެކަކަށް އަދި ގއ. ވިލިނގިލި ކޮވިޑް ފެސިލިޓީގައި ދެ މީހަކަށް ފަރުވާ ދެމުންދާ ކަމަށެވެ.
މާލެ ނުގެނެސް ކޮވިޑަށް ފަރުވާ ދިނުމުގެ ކަންކަން ކުރިއަށް ގެންދިއުމުގެ ގޮތުން ރާއްޖޭގެ 5 ސަރަހައްދެއްގައި ވަނީ ކޮވިޑް ފެސިލިޓީތައް ގާއިމުކޮށްފައެވެ. ލ. ގަމު ފެސިލިޓީ ޚާއްސަކޮށްފައިވަނީ މ، ފ ،ދ، ތ، ލ އަތޮޅުގެ ރަށްތަކަށެވެ. ގއ. އަދި ގދ. ޒޯނުގެ ކޮވިޑް މެނޭޖްމަންޓް ފެސިލިޓީ ގާއިމުކޮށްފައިވަނީ ގއ. ވިލިނގިލީ ގައެވެ. ނ، ރ، ބ. އަދި ޅ. ގެ ޒޯނުގެ ކޮވިޑް މެނޭޖްމަންޓް ފެސިލިޓީ ގާއިމުކޮށްފައިވަނީ ބ. އޭދަފުށީގައެވެ. ހއ، ހދ. އަދި ށ. ގެ ޒޯނުގެ ކޮވިޑް މެނޭޖްމަންޓް ފެސިލިޓީ ގާއިމުކޮށްފައިވަނީ ށ. ފުނަދޫގައެވެ. އަދި ޏ، ސ. ޒޯނުގެ ކޮވިޑް މެނޭޖްމަންޓް ފެސިލިޓީ ގާއިމުކޮށްފައިވަނީ އައްޑޫ ސިޓީ ހިތަދޫގައެވެ.
މީގެ އިތުރުން، މި ވަގުތު ވެސް ކޮވިޑް ޖެހިފައިވާ ހަތަރު މީހަކަށް އައިސީޔޫގައި އަންނަނީ ފަރުވާދެމުންނެވެ. އޭގެ ތެރެއިން ދެ މީހަކަށް ދަރުމަވަންތަ ހޮސްޕިޓަލްގެ 11 ވަނަ ފަންގިފިލާގެ އައިސީޔޫގައި ފަރުވާދެމުންދާއިރު އަނެއް ދެ މީހުންނަށް އައިސީޔޫގައި ފަރުވާ ދެމުންދަނީ ހުޅުމާލެ މެޑިކަލް ފެސިލިޓީ ގައެވެ.
