ގެސްޓްހައުސް މެއިންޓަނެންސްއަށް ޙާއްސަކޮށްގެން ސްޓިމިއުލަސް ޕެކޭޖެއް ތަޢާރަފްކުރުމުގެ މަސައްކަތް ކުރަމުންދާކަމަށް ޓޫރިޒަމް މިނިސްޓަރ އަބްދުﷲ މައުސޫމް ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ޒޫމް މެދުވެރިކޮށް 13 ސެޕްޓެމްބަރުގައި ބޭއްވި ބައްދަލުވުމެއްގައެވެ. މި ބައްދަލުވުމުގައި ގެސްޓްހައުސް އެސޯސިއޭޝަން އޮފް މޯލްޑިވްސް އާއި އެކު ގެސްޓްހައުސް ސިނާއަތުގައި ހަރަކާތްތެރިވާ ގިނަ އަދަދެއްގެ ފަރާތްތަކުން ވަނީ ބައިވެރިވެފައެވެ.
މި ބައްދަލުވުމުގައި ގެސްޓްހައުސްތަކަށް ދިމާވެފައިވާ ކަންބޮޑުވުންތައް ޓޫރިޒަމް މިނިސްޓަރ އަބްދުﷲ މައުސޫމްއާ ހިއްސާކޮއްފައިވެއެވެ.އެގޮތުން މިނިސްޓަރ ވަނީ އެ މިނިސްޓްރީން ގެސްޓްހައުސްތަކަށް ކޮށްދެވިދާނެ ކަންކަމާއި ގުޅޭގޮތުން މަޝްވަރާކުރައްވާފައެވެ. އަދި އިތުރު ސްޓިމިއުލަސް ޕެކޭޖްތައް ތައާރަފްކުރުމުގެ މަސައްކަތް ކުރަމުންދާކަމަށް މިނިސްޓަރ ވަނީ ވިދާޅުވެފައެވެ. މި ޕެކޭޖްތަކަކީ ގެސްޓްހައުސްތަކުގެ މެއިންޓޭނަންސްއަށް ޙާއްސަކޮށްގެން ނެރޭ ޕެކޭޖްތަކެކެވެ.
މީގެ އިތުރުން ޔޫޓިލިޓީ ބިލްތައް ދެއްކުމާއި ޓެކްސް ދެއްކުމުގައި ގެސްޓްހައުސްތަކަށް ދިމާވެފައިވާ ދަތިތައް ހައްލުކޮށްދެއްވުމަށް މަސައްކަތް ކޮށްދެއްވާނެ ކަމަށް ވެސް ޑރ. މައުސޫމް ވަނީ ވިދާޅުވެފައެވެ.
މާލެ ސަރަހައްދު ފިޔަވާ އެހެން ސަރަހައްދުތަކުގެ ގެސްޓުހައުސްތައް ހުޅުވުމަށް ހަމަޖެހިފައިވަނީ އަންނަ މަހުގެ 15 ވަނަ ދުވަހުއެވެ.
މިނިސްޓަރ މީގެ ކުރިން ވިދާޅުވީ އަލުން ގެސްޓްހައުސް ހުޅުވާލުމަށް ނިންމާފައިވަނީ ގިނަ ޝަރުތުތަކާއެކު ކަމަށެވެ. އެގޮތުން ކަމާބެހޭ ފަރާތްތަކުގެ އިރުޝާދުތަކާއެކު އަލުން ވިޔަފާރިތައް ހުޅުވާލާއިރު، މުޅި ދުނިޔެއިން ވެސް ނަމޫނާ ނަގާނެ ގޮތަކަށް މި ކަން ކުރިއަށް ގެންދިއުމަކީ ސަރުކާރުގެ އަމާޒެއް ކަމަށް މިނިސްޓަރ ވަނި ވިދާޅުވެފައެވެ.
