ފުރަތަމަ މެޗުގައި އަނިޔާވެ ރޮބެން ކުޅުމާ ދުރަށް

ނެދަލެންޑްސްގެ ގްރޮނިންގެންއަށް ކުޅުނު ފުރަތަމަ ރަސްމީ މެޗުގައި ފޯވާޑް އާޔެން ރޮބެނަށް އަނިޔާގެ ކުޅުމާ ދުރަށް ދާން ޖެހިއްޖެއެވެ.

މީގެ ކުރިން ފުޓްބޯޅަ ކުޅުން ހުއްޓާލިކަން ރޮބެން އިއުލާން ކުރީ 2018-2019 ވަނަ އަހަރުގެ ސީޒަނަށް ފަހު، އޭނާގެ ކުރީގެ ކުލަބު ބަޔާން މިއުނިކާއެކު ހަދާފައިވާ އެއްބަސްވުން ހަމަވުމުންނެވެ.

އެކަމަކު އޭޕްރީލް މަހުގެ ތެރޭގައި ދިން އިންޓަވިއުއެއްގައި ރޮބެން ވަނީ ކުޅުން ހުއްޓަލިތާ މާގިނަ ދުވަސްތަކެއް ނުވަނީސް އަލުން ކުޅުމުގެ ތެރެއަށް އަންނަން ވިސްނި ކަމަށް ބުނެފައެވެ. އެއާއެކު މިދިޔަ ޖޫން މަހުގެ ފަހުކޮޅު ނެދަލެންޑްސްގެ ގްރޮނިންގެންއިން ވަނީ އުމުރުން 36 އަހަރުގެ ރޮބެން އެޓީމަށް ސޮއިކުރިކަން ހާމަކޮށްފައެވެ.

ޕްރީ-ސީޒަނުގައި ކުޅުނު އެކުވެރިކަމުގެ މެޗެއްގައި ރޮބެން ލަނޑެއް ކާމިޔާބުކުރި ނަމަވެސް، އައު ސީޒަނުގެ ނެދަލެންޑްސް ލީގުގައި ކުޅުނު ފުރަތަމަ މެޗުގައި ރޮބެނަށް ވަނީ އަނިޔާވެފައެވެ. ޕީއެސްވީ އަތުން 3-1 އިން ގްރޮނިންގެން ބަލިވި މެޗުގެ 28 ވަނަ މިނެޓުގައި އަނިޔާވުމުން ރޮބެން ވަނީ ބާލާފައެވެ. އެކަމަކު މި އަނިޔާގެ ތަފުސީލެއް އަދި ރޮބެން ކުޅުމާ ދުރުގައި ހުންނަން ޖެހޭނެ މުއްދަތެއް މިހާތަނަށް ހާމަކޮށްފައެއް ނުވެއެވެ.

ރޮބެން، ފުޓްބޯޅަ ކެރިއަރު ފެށީ 2000 ވަނަ އަހަރު ގްރޮނިންގެންއިންނެވެ. ގްރޮނިންގެންގެ އެކެޑަމީން ތަމްރީނުވި ރޮބެން ވަނީ އެ ކުލަބުގެ ސީނިއާ ޓީމަށް ދެ އަހަރު ކުޅެދީފައެވެ. މި މުއްދަތުގައި ރޮބެން ވަނީ އެޓީމަށް ކުޅެދިން 52 މެޗުގައި 12 ލަނޑު ކާމިޔާބުކޮށްފައެވެ.

އޭގެ ފަހުން ޕީއެސްވީ އާއި ޗެލްސީ އަދި ރެއާލް މެޑްރިޑަށް ކުޅުމަށް ފަހު ކެރިއަރުގެ ބޮޑުބައި އޭނާ ހޭދަކުރީ ބަޔާން މިއުނިކުގައެވެ. އެގޮތުން 2013 ވަނަ އަހަރު ބަޔާނުން ސީޒަނުގެ ތިން ތަށި ކާމިޔާބުކުރިއިރު، ރޮބެން ވަނީ ބަޔާނުގައި މޮޅު ކުޅުމެއް ދައްކާފައެވެ.

ރޮބެން ވަނީ އޭނާގެ ކުލަބު ކެރިއަރުގައި 28 ތަށި އުފުލާލާފައެވެ. އަދި ނެދަލެންޑްސްގެ ހުރިހާ އުމުރުފުރައެއްގެ ގައުމީ ފުޓްބޯޅަ ޓީމަށް ކުޅެފައިވާ ރޮބެން ވަނީ ނެދަލެންޑްސް ސީނިއާ ގައުމީ ޓީމަށް 2003ން 2017ށް ކުޅެ، 96 މެޗުގައި 37 ލަނޑު ޖަހާފައެވެ.